II. Vei Ira Na Kai Cesalonika 1 - AI VOLA TABU（FIJ1864）

A WASE I. —Sa vakacegui ira ko Paula, ni sa tukuna vei ira na lewa dodonu ni Ratou, 1-12.

1OI keitou ko Paula, kei Silivenu, kei Timoci, ki na nodrai vavakoso lewe ni soro na kai Cesalonika era sa tu vua na Kalou ko Tamada kei na Turaga ko Jisu Karisito:

2Me nomudou na loloma, kei na vakacegu, mai vua na Kalou ko Tamada kei na Turaga ko Jisu Karisito.

3E kilikili kei keitou me keitou ia tikoga na vakavinavinaka vua na Kalou e na vukumudou, na veiwekani, ni sa dodonu ga o qori, e na vuku ni sa tubu vakalevu sara na nomudou vakabauta, a sa uasivi cake yadua na nomudou veilomani vakai kemudou;

4ia keitou sa vakacaucautaki kemudou vei ira na veivavakoso lewe ni soro ni Kalou, e na vuku ni nomudou lomadei kei na vakabauta e na nomudou vakacacani kecega, kei na vakararawataki dou sa vosota:

5o qori ga nai vakatakilakila ni lewa dodonu ni Kalou, mo dou okati kina mo dou yaga me rawata na matanitu ni Kalou, o koya dou sa vakararawataki talega kina:

6ni sa dodonu vua na Kalou me sauma e na ka rarawa vei ira era sa vakararawataki kemudou;

7vei kemudou talega, oi kemudou sa vakararawataki, e na vakacegu vata kei keitou, ni na vakaraitaki mai lomalagi na Turaga ko Jisu kei ira vata kaya na nona agilose kaukauwa,

8e na yameyame-ni-buka waqa, me cudruvi ira era sa tawa kila na Kalou, a sa tawa vakabauta nai tukutuku-vinaka ni noda Turaga ko Jisu Karisito:

9era na cudruvi e na veivakarusai tawa mudu mai na mata ni Turaga, mai na nona kaukauwa vakaidina talega;

10ni na lako mai ko koya me ra vakarokorokotaka ko ira na nona tamata yalosavasava, ka me dokai koya ko ira kecega era sa vakadinata, e na siga ko ya, ni sa vakadinati na neitoui tukutuku vei kemudou.

11O koya o qo keitou sa masulaki kemudou tikoga kina; me okati kemudou na neitou Kalou mo dou yaga me rawata na ka dou a kacivi kina, me vakayacora kecega e na kaukauwa na nona veitalia lomavinaka, kei na cakacaka ni vakabauta:

12me vakarokorokotaki kina na yaca ni noda Turaga ko Jisu Karisito e na vukumudou, koi kemudou talega e na vukuna, me vaka na loloma ni noda Kalou kei na Turaga ko Jisu Karisito.