I. Vei Ira Na Kai Cesalonika 5 - AI VOLA TABU（FIJ1864）

Sa tukuna na siga ni lewa, a sa vakarota vei ira me ra gumatua sara e nai valavala vinaka kecega, a sa qai masulaki ira, ka sa tinia na nonai vola, 1-28.

1IA ka sa tawa yaga meʼu vola vei kemudou, na veiwekani, meʼu tukuna na veigauna kei na veiyabaki.

2Ni dou sa kila dina sara vakai kemudou ni na lako mai na siga ni Turaga, me vaka na daubutako e na bogi.

3Io, ni ra na kaya, Sa mai vakacegu ka tiko vinaka; ena qai yaco vakidacala mai vei ira na rusa, me vaka na yaluma vua na yalewa sa bukete; a ra na tawa dro tani rawa,

4Ia koi kemudou na veiwekani, dou sa sega ni tiko e na butobuto, me yacovi kemudou kina na siga ko ya me vaka na daubutako.

5Oi kemudou kecega na gone ni rarama, kei na gone ni siga: eda sa sega ni vaka na bogi, se na butobuto.

6O koya o qo me da qai kakua ni moce, me vakataki ira na tani; me da vakatawa ga ka yalomatua.

7Ia ko ira era daumoce era sa moce e na bogi; kei ira era daumateni era sa mateni e na bogi.

8Ia koi keda, eda sa vaka na siga, me da yalomatua, me da vauca mei vakaruru ni lomasereda na vakabauta kei na loloma; kei na vakanuinuitaka na bula, mei vakaruru ni uluda.

9Ni sa sega ni lesi keda ko na Kalou mc da rusa, ko ya ga me da rawata na bula e na vuku ni noda Turaga ko Jisu Karisito;

10o koya ka mate e na vukuda, me da bula vata kaya kina, se da yadra se da moce.

11O koya o qo mo dou qai veivakaocataki vakai kemudou, ka veivakatataki cake vakai kemudou, me vaka ga ni dou sa kitaka tiko.

12Ia keitou sa vakamasuti kemudou, na veiwekani, mo dou kilai ira era sa daucakacaka vei kemudou, ka lewai kemudou e na Turaga, ka vakavulici kemudou;

13ka mo dou vakarokorokotaki ira, ka lomani ira vakalevu sara, e na vuku ni nodra cakacaka. Mo dou veivinakati vakai kemudou.

14Ia keitou sa vakarota vei kemudou, na veiwekani: mo dou vunauci ira era sa talaidredre, vakalecataki ira era sa yalolailai, vukei ira era sa malumalumu, dauvosoti ira kecega na tamata.

15Raica me kakua e dua sa veisausaumitaka na ca vua e dua; ka mo dou muria tikoga na ka e vinaka, vakai kemudou, vei ira talega na tamata kecega.

16Dou reki tikoga.

17Dou daumasu ka kakua ni mudu.

18Dou ia na vakavinavinaka e na vuku ni ka kecega: ni sa loma ni Kalou o qo vei kemudou e na vuku i Karisito Jisu.

19Dou kakua ni bokoca na Yalo.

20Dou kakua ni beca nai vakavuvuli.

21Vakatovolea na ka kecega; taura matua na ka e vinaka.

22Qarauni kemudoui mai nai valavala kecega sa ca.

23Ia me vakasavasavataki kemudou sara mada na Kalou ni veivakacegui; ka me maroroi taucoko, me kakua sara ni cala, na yalomudou kei na lomamudou kei na yagomudou, ka yacova na siga ena lako tale mai kina na noda Turaga ko Jisu Karisito.

24Sa dina ko koya sa kacivi kemudou, ena kitaka talega ko koya.

25Oi kemudou na veiwekani, masulaki keitou.

26Dou ia na loloma vei ira kecega na veiwekani e na veireguci e na yalosavasava.

27Au sa vakarota vei kemudou e na yaca ni Turaga, me wiliki nai vola o qo vei ira kecega na veiwekani yalosavasava.

28Me nomudou na loloma ni noda Turaga ko Jisu Karisito. Emeni,