I. Vei Ira Na Kai Cesalonika 4 - AI VOLA TABU（FIJ1864）

Sa vakavulici ira ko koya me ra gumatua, ka yalosavasava, ka veilomani, ka daucakacaka, 1-12. Me ra kakua ni tagicaki ira vakalevu na mate, 13-18.

1A SA vo ga, me keitou vakamasuti kemudou, na veiwekani, ka vakarota e na vuku ni Turaga ko Jisu, mo dou uasivi cake vakalevu sara, me vaka dou a vakatavulici maivei keitou se sa vakaevei nai valavala sa kilikili kei kemudou mo dou ia tiko, mo dou vinaka vua na Kalou.

2Ni dou sa kila na vunau keitou a tukuna vei kemudou e na vuku ni Turaga ko Jisu.

3Ni sa loma ni Kalou o qo, mo dou yalosavasava, mo dou kakua ni dauyalewa:

4me kila yadua vei kemudou me maroroya na yagona me vakasavasavataki ka vakarokorokotaki;

5me kakua ni ia kina na dodomo ni gadreva ca, me vakataki ira na veimatanitu era sa tawa kila na Kalou:

6me kakua e dua me laʼki lawaki ca se vakacacana na kai nona e na ka vakakina; ni sa cudruvaka na ka kecega o qo na Turaga, me vaka talega ni keitou a vakasalataki kemudou kina eliu ka dautukuna.

7Ni sa sega ni kacivi keda na Kalou me da dukadukali, me da yalosavasava ga.

8Ia ko koya sa beca, sa sega ni beca na tamata, na Kalou ga, o koya ka solia mai vei keda na nona Yalo Tabu.

9Ia e na vuku ni veilomani vakaveita-cini, sa tawa yaga meʼu vola vei kemudou; ni dou sa vakatavulici mai vua na Kalou mo dou veilomani tiko.

10Ka sa dina, dou sa kitaka vakakina vei ira kece na veiwekani mai Masitonia taucoko: ia keitou sa vakamasuti kemudou, na veiwekani, mo dou uasivi cake vakalevu sara;

11ka mo dou gumatua sara me tiko malua, ka dauia na nomudou cakacaka, ka daucakacaka e na ligamudou, me vaka ni keitou a vakarota vei kemudou;

12mo dou ia tiko nai valavala e kilikili kivei ira etaudaku, ka mo dou kakua ni dravudravua e na dua na ka.

13IA kaʼu sa vinakata, oi kemudou na veiwekani, mo dou kakua ni lecava e na vukudra era sa moce tu, mo dou kakua kina ni osimataka, me vakataki ira na tani sa sega na nodrai nuinui.

14Ia kevaka eda sa vakadinata, ni ka mate ko Jisu ka tu cake tale mai, ena vaka talega kina ko ira era sa moce tu: e na vuku i Jisu, ena kauti ira tale kei koya ko na Kalou.

15Ni keitou sa tukuna ga o qo vei kemudou me vaka na vosa ni Turaga, ni da na sega ni taumadataki ira era sa moce tu koi keda eda sa bula tiko me yacova na nona lako tale mai na Turaga.

16Ni na lako sobu mai lomalagi ko koya na Turaga e na kaila, e na domo ni agilose turaga, kei na davui ni Kalou: ena qai tu cake taumada ko ira na mate era sa tu vata kei Karisito:

17emuri koi keda, eda sa bula tikoga, eda na kau cake vata kei ira e na o, me da veitata kei na Turaga e na macawa: ia ena vakakina eda na qai tiko vata kaya na Turaga ka tawa mudu.

180 koya mo dou qai veivakaocataki vakai kemudou e na vosa o qo.