I. Vei Ira Na Kai Cesalonika 3 - AI VOLA TABU（FIJ1864）

Sa vakatakila na nona loloma vei ira ko koya, ni sa talai Timoci vei ira, a sa daureki e na vukudra, a sa daumasulaki ira, a sa via raici ira, me vakataudeitaki ira, 1-13.

1O KOYA o qo, ni keitou a sega tiko ni vosota rawa, keirau sa vinakata kina me biu duaduaga mai Aceni;

2ia keirau sa talai Timoci, na taci i keirau, kei nai talatala ni Kalou, kei na neiraui tokani e nai tukutuku-vinaka kei Karisito, me vakataudeitaki kemudou, ka vakarota vei kemudou e na vuku ni nomudou vakabauta:

3me kakua e dua me vakayavalati e na vuku ni rarawa o qo: ni dou sa kila ni sai koya eda sa lesi kina.

4Ni sa dina, ni keitou a tiko kei kemudou, keitou a tukuna mada eliu vei kemudou ni da na vakararawataki: a sa yaco vakakina, ia dou sa kila ga.

5E na vuku ni ka o qo, niʼu a sega tiko ni vosota rawa, au a qai talaki meʼu kila na nomudou vakabauta, de sa dauveretaki kemudou beka na dauvere, a sa yaco kina me ka walega na neitou cakacaka.

6Ia ni sa qai lako maivei kemudou ko Timoci vei keitou, a sa kauta mai nai rogorogo vinaka ni nomudou vakabauta kei na loloma, kei na nomudou nanumi keitou vinaka tikoga, kei na nomudou gadreva vakalevu mo dou raici keitou, me vaka na neitou gadreva talega me raici kemudou:

7o koya o qo keitou a vakacegui kina e na vukumudou, na veiwekani, e na vuku ni nomudou vakabauta, e na neitou rarawa kecega kei na yaluma:

8ni keitou sa qai bula, kevaka dou sa tu dei tiko vua na Turaga.

9Ia na cava na vakavinavinaka me keitou ia tale vua na Kalou e na vukumudou, e na reki kecega keitou sa reki kina e na vukumudou e na mata ni noda Kalou:

10ni keitou sa masu vakalevu sara e na bogi kei na siga, me keitou raica na matamudou, me keitou tinia vinaka talega na ka sa sega e na nomudou vakabauta?

11Ia me tuberi keitou mada vei kemudou ko na Kalou na Tamada, kei na noda Turaga ko Jisu Karisito.

12Ia me vakalevutaki kemudou na Turaga mo dou uasivi cake e na loloma vakai kemudou, ka vei ira kecega na tamata, me vaka na neitou vei kemudou:

13me vakataudeitaka kina ko koya na yalomudou me tawa ca ni sa savasava e na mata ni Kalou na Tamada, ni na lako mai na noda Turaga ko Jisu Karisito kei ira vata kaya kecega na nona yalosavasava.