I. Vei Ira Na Kai Cesalonika 2 - AI VOLA TABU（FIJ1864）

Sa tukuna ko kaya ni ratou sa tukuna vinaka nai tukutuku-vinaka kei Karisito vei ira, a ra sa vakadinata sara, 1-16. Sa kaya ni sa tarovi koya ko Satani me kakua ni laʼki raici ira, a sa via lako vakalevu, 17-20.

1NI dou sa kila, na veiwekani, na neitou laʼki tiko vei kemudou, ni sa sega ni ka walega:

2ia ni keitou a vakararawataki mada eliu, ka vakasewasewani mai Filipai, me vaka dou sa kila, keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivala.

3Ni sa sega sara ni ia na neitoui vakaro e na veicavilaki, se na yalo tawa-savasava, se na veivakaisini:

4ia ni sa vinakati keitou oti na Kalou me keitou lesi me keitou vunautaka nai tukutuku-vinaka, keitou sa vosa vakakina; a sa sega ga me keitou vinaka vei ira na tamata, vua ga na Kalou, o koya sa lewa na yalo i keitou.

5Ni dou sa kila ni keitou sa sega sara ni vosa vakavukai, se ia na kocokoco rairai vinaka; sa kila ko na Kalou:

6se keitou domona me dokai keitou ko ira na tamata, se koi kemudou, se ko ira na tamata tani, ia ka sa rawarawa me keitou veivakaocataki, ni keitou sai apositolo i Karisito.

7Ia keitou a yalovinaka e na kemudou maliwa, me vaka na meimei ni sa susugi ira na luvena;

8sa vakakina, ni keitou sa yalololoma sara vei kemudou, keitou sa vinakata me solia vei kemudou nai tukutuku-vinaka ni Kalou, ia ka sega ni koya walega, a neitou bula talega, e na vuku ni keitou sa lomani kemudou.

9Ni dou sa nanuma ga, na veiwekani, na neitou daucakacaka kei na oca: ni keitou sa daucakacaka tiko e na bogi kei na siga, me keitou kakua sara kina ni vakabibitaki kemudou, keitou sa vunautaka vei kemudou nai tukutuku-vinaka ni Kalou.

10Dou a raica dina, kei na Kalou, ni sa savasava ka dodonu ka tawa cala na neitoui valavala e na kemudou maliwa, oi kemudou sa vakabauta:

11ni dou sa kila ni keitou sa vakarota vei kemudou ka vakamasuti kemudou ka vakadreti kemudou yadua, me vaka na tamana vei ira na luvena,

12mo dou ia nai valavala sa kilikili kei ira sa nona na Kalou, o koya sa kacivi kemudou ki na nona matanitu kei na vanua vakaiukuuku.

13E na vuku ni ka o qo keitou sa tawa mudu kina ni vakavinavinaka vua na Kalou, ni dou a vakabauta na vosa ni Kalou dou a rogoca maivei keitou, dou sa sega ni vakabauta me vosa ni tamata, me vaka ga na kena dina, na vosa ni Kalou, o qori sa cakacaka talega vei kemudou sa vakabauta.

14Ni dou a mai vakadamurimuri ira na veivavakoso lewe ni soro ni Kalou mai Jutia era sa tu vata kei Karisito Jisu, oi kemudou na veiwekani: ni dou a vosota na veika ca maivei ira na kai nomudou, me vakataki ira maivei ira na kai Jutia;

15o ira era a vakamatea na Turaga ko Jisu, kei ira talega na nodra parofita, a ra sa vakacacani keitou; a ra sa sena ni vinaka vua na Kalou, a ra sa veicati talega kei ira kecega na tamata;

16a ra sa tarovi keitou ni keitou sa vosa vei ira era sa tawa lotu me ra bula kina, era sa vakasinaita tikoga kina na nodrai valavala ca: ia sa yaco vei ira na cudruvi me ra vakaoti.

17IA koi keitou, ni keitou sa kau tani vakayago vei kemudou, na veiwekani, e na gauna lekaleka ga, ia ka sa sega vakayalo, keitou sa gumatua sara kina ka gadreva vakalevu me raica na matamudou.

18O koya o qo keitou a via lako kina vei kemudou, oi au ko Paula, kaʼu a vakakina vakadua ka vakarua talega; ia ka sa tarovi keitou ko Satani.

19Ia ka cava na neitoui nuinui se marau, sei sala ni reki? sa sega li ni koi kemudou e na mata ni noda Turaga ko Jisu Karisito e na nona lako tale mai?

20Ni sai kemudou na neitoui ukuuku kei na neitou reki.