I. Vei Ira Na Kai Cesalonika 1 - AI VOLA TABU（FIJ1864）

A WASE I. —Sa tukuna vei ira ko Paula tu sa daunanumi ira tiko, ka masulaki ira, ni sa kila era sa lotu dina sara, 1-10.

1OI keitou ko Paula, kei Silivenu, kei Timoci, ki na nodrai vavakoso lewe ni soro na kai Cesalonika, o ira sa tu vua na Kalou ko Tamada kei na Turaga ko Jisu Karisito: Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

2Keitou sa vakavinavinaka tikoga vua na Kalou e na vukumudou kecega, ni keitou sa cavuti kemudou e na neitou masu;

3keitou sa tawa mudu ni nanuma na nomudou daucakacaka e na vakabauta, kei na nomudou oca e na loloma, kei na nomudou vosota e nai nuinui ki na noda Turaga ko Jisu Karisito, e na mata ni Kalou ko Tamada;

4ni keitou sa kila, oi kemudou na veiwekani sa daulomana ko na Kalou, na nomudou digitaki:

5ni sa sega ni yaco vei kemudou na neitoui tukutuku-vinaka e na vosa walega, ko ya ga e na kaukauwa talega, kei na Yalo Tabu, kei na vakadinadina vakalevu; ni dou sa kila na neitoui valavala e na vukumudou ni keitou a tiko vata kei kemudou.

6Ia dou a dauvakadamurimuri keitou, kei na Turaga, ni dou a vakabauta na vosa e na veivakararawataki levu, kei na reki e na Yalo Tabu:

7dou a vaco kina mo dou nodrai vakarau kecega era sa vakabauta mai Masitonia kei Akaia.

8Ni sa rogovaki yani maivei kemudou na vosa ni Turaga ki Masitonia kei Akaia, a sa sega ni koya walega, sa lako yani talega nai rogorogo ni nomudou vakabauta na Kalou ki na veiyasana kecega; a sa sega kina ni yaga mo keitou kaya e dua na ka.

9Ni ra sa tukuna ga ko ira e na vuku i keitou nai valavala ni neitou laʼki tiko vei kemudou, ni dou sa saumaki mai na veimatakau vua na Kalou, mo dou qarava na Kalou bula ka dina;

10mo dou waraka talega na Luvena mai lomalagi, sa vakatura cake tale ko koya mai na mate, o Jisu, o koya sa vakabulai keda mai na cudru sa bera mai.