Vei Ira Na Kai Kolosa 4 - AI VOLA TABU（FIJ1864）

Sa vakavulici ira na tamata me ra daumasu, ka me ra valavala vakavuku vei ira era sa tawa lotu, 2-6. Sa qai ia na loloma vei ira, ka sa tinia nai vola, 7-18.

1OI kemudou na turaga, dou solia vei ira na tamata na ka e dodonu ka tautauvata; ni dou sa kila sa nomudou talega e dua na Turaga mai lomalagi.

2MO dou daumasu tikoga, ka cikevaka tiko ka vakavinavinaka;

3ka masulaki keitou talega, me dolava vei keitou ko na Kalou na katuba ni vosa, me keitou tukuna na ka vuni kei Karisito, a ya kaʼu sa vesuki tu kina:

4meʼu vakaraitaka o qo, me vaka sa kilikili kei au me tukuna.

5Dou ia tiko nai valavala vuku vei ira etaudaku, ka volia me nomudou na gauna.

6Me ia tikoga na nomudou vosa e na yalovinaka, ka veiwakitaki e na vuku, mo dou kila kina se cava sa dodonu mo dou vosa tale kina vei ira na tamata yadua.

7Ena tukuna vei kemudou na noqu ka kecega ko Tikiko, a wekaqu kaʼu sa lomana, kei nai talatala yalodina, kei na noqui tokani, e na Turaga:

8ia kaʼu sa talai koya vei kemudou e na vuku ni ka o qo, me kila na nomudou veika, ka me vakalecataka na yalomudou;

9oi rau kei Onisimo, na wekaqu sa yalodina kaʼu sa lomana, o koya sa dua vei kemudou. Erau na vakatakila vei kemudou na ka kecega eke.

10Sa loloma yani vei kemudou ko Arisitariko keirau sa vesuki vata kaya, kei Marika na luve ni gane i Parinapa, (o koya dou sa vakaroti oti kina: kevaka sa lako vei kemudou, dou vakacegui koya;)

11kei Jisu, a yacana talega ko Jusito, eratou sa cili. O iratou ga o qo eratou sa daucakacaka vata kei au e na ka ni matanitu ni Kalou, a ratou sa dauvakacegui au.

12Sa loloma yani vei kemudou ko Epafira, sa dua vei kemudou, ai talatala i Karisito, sa daugumatua tikoga ni sa masulaki kemudou, mo dou tu dei ka vinaka sara ka vakasinaiti tu e na ka kece sa veitaliataka na Kalou.

13Niʼu sa vakadinadina vua, ni sa lomakatakata sara e na vukumudou, e na vukudra talega mai Leotisea, kei na vukudra mai Aiirapoli.

14Sa loloma yani vei kemudou ko Luke, na vu-ni-wai lomani, kei Tima.

15Me cavu mada na loloma vei ira na veiwekani mai Leotisea, vua talega ko Nimifa, vei ira talega nai vavakoso lewe ni soro mai nona vale.

16Ia ni sa wili oti nai vola o qo e na kemudou maliwa, dou kitaka me wiliki talega e na kedra maliwa nai vavakoso lewe ni soro mai Leotisea; mo dou wilika talega o qori mai Leotisea.

17Kaya talega vei Arikipo, Mo vakaraica na cakacaka o sa rawata mai vua na Turaga, mo kitaka sara.

18Au sa ia yani na loloma e na ligaqu dina, koi au ko Paula. Dou nanuma na noqui vesu. Me nomudou na loloma. Emeni.