Vei Ira Na Kai Kolosa 3 - AI VOLA TABU（FIJ1864）

Sa vakarota vei ira ko kaya me ra yalo-vakalomalagi, 1-4. Me ra yalosavasava sara, 5-11. Sa vakarota me ra veilomani, ka ia tiko na vakavinavinaka, ka kitaka kecega nai valavala vinaka, 12-25.

1IA kevaka dou sa vakaturi cake vata kei Karisito, mo dou vakasaqara na veika maicake, sa tiko kina ko Karisito e na liga i matau ni Kalou.

2Dou daunanuma na veika maicake, kakua ga na veika e vuravura.

3Ni dou sa mate tu, ia na nomudou bula sa vuni vata kei Karisito e na Kalou.

4Ni na rairai mai ko Karisito, sa noda vu-ni-bula, dou na qai rairai vata kaya e nai ukuuku.

5O koya mo dou qai vakamatea na veitikimudou vakavuravura, a dauyalewa, nai valavala tawa-savasava, na garogaro ca, na dodomo ca, kei na kocokoco, a ya na dauqarava na kalou lasu:

6ni sa veika o qo sa yaco kina na cudru ni Kalou vei ira era sa dautalaidredre:

7ia koi kemudou talega, dou a ia eliu nai valavala vakakina, ni dou a bula lako vakakina.

8Ia o qo, mo dou luvata na ka kecega o qo, a daucudru, na daulesa, na lomaca, na vosa ca, na vosa dukadukali mai na gusumudou.

9Kakua ni dauveilasuyaki, ni dou sa luvata tu na tamata makawa kei na nonai valavala;

10ka dou sa vakasuluma o qori sa vou, o koya sa vakavoui tiko e na vuku me vaka na yaloyalona ka buli koya:

11ia sa ka o qo sa sega kina ni vakasami se kai Jutia se kai tani, se cili se tawa cili, ko na tawa vuku, na kai lekutu, na bobula, nai taukei: ia sa uasivia sara e na ka kecega ko Karisito.

12O koya mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na loma dauloloma, e na yalovinaka, e na yalomalumalumu, e na yalomalua, e na dauvosota vakadede;

13dou veivosoti vakai kemudou, ka kakua ni veicudruvi, kevaka sa dua na ka dou sa veibeitaki rawa kina: me Vaka sa sega ni cudruvi kemudou ko Karisito, mo dou vaka talega kina.

14Ia me tu ecake e na ka kecega o qo na loloma, a ya sai vau vakaidina.

15Ia me lewa sara e na lomamudou na vakacegu ni Kalou, ni dou sa kacivi tu ki na ka o qo, ni dou sa yago e dua bauga: ia mo don ia tiko na vakavinavinaka.

16Me tiko vakalevu e na lomamudou na vosa i Karisito e na vuku kecega; dou veivakatavulici ka veivunauci vakai kemudou e na veisere kei na vosa sa vakakina kei na veimeke vakayalo, dou sere tiko vua na Turaga ni sa tiko na loloma e na yalomudou.

17Ia na ka kecega dou sa kitaka, se na vosa se na cakacaka, me ia kece e na yaca ni Turaga ko Jisu, ko koya dou sa ia tiko kina na vakavinavinaka vua na Kalou na Tamada.

18Oi kemudou na watina-yalewa, mo dou talairawarawa vei ira na watimudou, me vaka sa dodonu vua na Turaga.

19Oi kemudou na watina-tagane, mo dou lomani ira na watimudou, ka kakua ni yaloca vei ira.

20Oi kemudou na gone, mo dou talairawarawa vei ira na nomudou qase e na ka kecega: ni sa vinaka sara o qo vua na Turaga.

21Oi kemudou na qase, mo dou kakua ni vakacudrucudrui ira na luvemudou, de ra datuvu kina.

22Oi kemudou na tamata, mo dou talairawarawa vei ira na nomudou turaga vakayago e na ka kecega; kakua ni ia walega e na matanavotu, me vinakati kemudou kina ko ira na tamata; dou ia ga e na loma dina, ni dou sa rerevaka na Kalou:

23ia na ka kecega dou sa cakava, kitaka mai na vu ni yalomudou, me vaka vua na Turaga, me kakua ni vaka vei ira walega na tamata;

24ni dou sa kila dou na rawata mai na Turaga nai votavota mei sau: ni dou sa qarava na Turaga ko Karisito.

25Ia ko koya sa caka ca ena rawata nai sau ni ca sa cakava; ka sa sega ni vinakati vakailoa e dua na tamata.