II. Vei Ira Na Kai Cesalonika 3 - AI VOLA TABU（FIJ1864）

Sa kaya ko koya me ra masulaki koya; a sa vakacegui ira, ka masulaki ira, a sa vakavulici ira me ra kakua ni vucesa, se guca, 1-15. Sagai tinia na nonai vola, 16-18.

1MEʼU tinia, oi kemudou na veiwekani, dou masulaki keitou, me cici yani na vosa ni Turaga, ka dokai tiko, me vaka vei kemudou:

2me keitou vakabulai talega maivei ira na tamata tawa dodonu ka ca: ni sa sega vei ira kecega na vakabauta.

3Ia sa lomadina na Turaga, o koya ena vakataudeitaki kemudou, ka maroroi kemudou mai na ca.

4Ia keitou sa vakadinata na Turaga e na vukumudou, ni dou sa qai cakava ka na cakava emuri na veika keitou sa vakarota vei kemudou.

5Ia me tubera mada na yalomudou ko na Turaga ki na loloma ni Kalou, kei na dauvosota me vakataki Karisito.

6Ia keitou sa vakarota vei kemudou, na veiwekani, e na yaca ni noda Turaga ko Jisu Karisito, mo dou kakua ni tiko vata kei koya yadua na veiwekani sa dauia nai valavala vakatani, ka sega ni vaka nai vakavuvuli sa rogoca ko koya maivei keitou.

7Ni dou sa kila ni sa kilikili kei kemudou me vakadamurimuri keitou; ni keitou a sega ni ia nai valavala vakatani e na kemudou maliwa;

8ka keitou a sega ni kania walega na kena na tamata e dua; ia keitou a oga ka oca e na bogi kei na siga, me keitou kakua kina ni vakabibitaka e dua vei kemudou:

9e sega e na vuku ni keitou sa tawa veitalia rawa, me keitou sa mai nomudoui vakarau kina mo dou vakadamurimuri keitou.

10Io, ni keitou a tiko kei kemudou, sa neitoui vakaro o qo vei kemudou, me kakua ga ni kana ko koya sa tawa cakacaka.

11Ni keitou sa rogoca ni sa tu e so vei kemudou, era sa ia tiko nai valavala vakatani, era sa sega sara ni cakacaka, a ra sa makutu vakatani.

12Ia ko ira era sa vakaoqo keitou sa vakarota ka vakamasuta e na vuku ni noda Turaga ko Jisu Karisito, me ra tiko malua ka daucakacaka, ka kania ga na kedra.

13Ia koi kemudou, na veiwekani, dou kakua ni ceguoca e na cakacaka vinaka.

14Ia kevaka e dua sa sega ni talairawarawa ki na neitou vosa e nai vola o qo, dou vakatakilakilataka na tamata ko ya, ka kakua ni tiko vata kaya, me madua kina ko koya.

15Ia mo dou kakua ga ni vakasami koya me vaka ni sa meca, ka vakatavulica ga me vaka na wekamudou.

16Ia me solia tiko mada ga ko na Turaga ni veivakacegui me nomudou na vakacegu e na ka kecega. Me tiko vei kemudou kecega na Turaga.

17Au sa ia na loloma koi au ko Paula e na ligaqu dina, ai vakatakilakila e nai vola kecega: au sa vola vakakina.

18Me nomudou kecega na loloma ni noda Turaga ko Jisu Karisito. Emeni.