Vei Ira Na Kai Efeso 3 - AI VOLA TABU（FIJ1864）

Sa tukuna ko koya ni ka vakatakila vei koya ko na Kalou na nona lewa me ra bula na veimatanitu, ka sa digitaki koya me vakavulici ira, 1-13. Sa masumasu ko koya, 14-21.

1E NA vuku ni ka o qo koi au ko Paula, sa nei Karisito Jisu, ka sa vesu tu e na vukumudou sa matanitu kisau,

2ni dou a rogoca beka se sa vakaevei na loloma ni Kalou sa soli mai vei au e na vukumudou;

3ni sai vakavuvuli macala sa vakatakila kina ko koya vei au na ka ka vuni tu: (me vaka kaʼu a vola vakalailai eliu,

4ka dou na kila rawa kina, ni dou sa wilika, se sa cava na noqu vuku e na ka vuni kei Karisito;)

5o qori sa tawa vakatakilai vei ira na tamata e na gauna sa oti, me vaka sa qai vakatakilai e na Yalo vei ira na nonai apositolo yalosavasava kei ira sa dauvosa e na Yalo;

6ni ra sai taukei vata na veimatanitu kisau, ka sa mataveiwekani vata, ka sa rawata vata talega na ka sa yalataka ko koya, e na vuku i Karisito, me vaka nai tukutuku-vinaka:

7a ya kaʼu a qisi kina meʼu kenai talatala, me vaka nai solisoli ni loloma ni Kalou, sa soli mai vei au e na cakacaka yaco ni nona kaukauwa:

8vei au, oi au sa uasivi sobu sara vei ira kecega era sa lotu, sa soli kina na loloma o qo, meʼu vunautaka vei ira na veimatanitu nai yau i Karisito, a ya sa tawa kilai rawa;

9ka meʼu vakarairaitaka vei ira na tamata kecega se sa vakaevei na ka ka vuni tu, a ya ka vunia mai nai vakatekivu kei vuravura ko na Kalou, o koya erau sa bulia vata kei Jisu Karisito na ka kecega:

10me yaco kina, e na gauna o qo, nai vavakoso lewe ni soro, mei vakatakilakila vei ira na turaga kei ira sa kaukauwa e na veiyasana vakalomalagi, ni sa takiveivinaka sara na vuku ni Kalou,

11me vaka nai naki sa tawa tekivu eliu, a ya sa nakita ko koya e na vuku i Karisito Jisu na noda Turaga:

12o koya, ni da sa vakabauti koya, eda sa doudou kina ka toro voleka e na vakararavi.

13O koya o qo sa yaloqu kina mo dou kakua ni ceguoca niʼu sa vakararawataki e na vukumudou, a ya sa ka mo dou reki kina.

14E na vuku ni ka o qo kaʼu sa tekiduru kina vei koya na Tama ni noda Turaga ko Jisu Karisito,

15o koya era sa vakayacani kina na mataqali taucoko mai lomalagi kei vuni vura,

16me solia vei kemudou ko koya, me vaka na vutu ni nona vinaka, me vakaukauwataki kemudou e na Yalona mo dou kaukauwa eloma;

17me tiko ga e na lomamudou ko Karisito e na vakabauta; mo dou vakawaka ka tauyavutaki e na loloma,

18ka rawata kina me kila vata kei ira kecega era sa lotu, se cava na kena raraba, kei na kena babalavu, kei na kena titobu, kei na kena cecere;

19ka me kila na loloma i Karisito, a ya sa uasivi cake e na ka e kilai rawa; mo dou sinai me vaka sara sa sinai na Kalou.

20Ia vei koya, sa rawata me cakava na ka sa uasivi cake vakalevu sara e na ka kecega eda sa kerea se vakasama, me vaka na kaukauwa sa cakacaka yaco e na lomada,

21vei koya me ia na vakarokoroko e nai vavakoso lewe ni soro e na vuku i Karisito Jisu, me yacova na gauna kecega ka tawa mudu. Emeni.