Vei Ira Na Kai Efeso 4 - AI VOLA TABU（FIJ1864）

Sa vakarota vei ira ko koya me ra veilomani, a sa tukuna ni sa qisi ira na nonai talatala ko na Kalou me ra dui vakaitavi e na cakacaka, 1-16. Sa qai vakarota vei ira me ra kakua ni muria na veimatanitu era sa tawa lotu, 17-32.

1O KOYA o qo kaʼu masuti kemudou kina, oi au sa vesu tu e na vuku ni Turaga, mo dou ia tiko me vaka sa kilikili kei nai valavala dou sa kacivi kina,

2mo dou yalomalumalumu sara ka yalomalua, mo dou vosota vakadede ka veivosoti vakai kemudou e na loloma;

3mo dou gumatua sara mo dou maroroya na lomavata ni Yalo, ni dou sa vauci vata e na veivinakati.

4Sa dua bauga nai vavakoso, ka dua bauga na Yalo, me vaka dou sa kacivi ki nai nuinui e dua bauga ni dou a kacivi;

5sa dua bauga na Turaga, sa dua bauga na vakabauta, sa dua bauga na veipapitaisotaki,

6sa dua bauga na Kalou na Tamada kecega, o koya sa veitaliataka na ka kecega, a sa curuma na ka kecega, ka tiko e na lomamudou kecega.

7Ia ka sa soli vei keda yadua na loloma me vaka nai vakarau ni solisoli nei Karisito.

8O koya o qo sa kaya kina ko koya, Ni sa lako ki cake ko koya, sa vakabobulataki ira e lewe vuqa me ra bobula, a sa solia nai solisoli e so vei ira na tamata.

11Ia sai koya sa solia e so, me rai apositolo; ka so, me ra dauvosa e na Yalo; ka so, me ra tamata vunau; ka so, me rai vakatawa kai vakavuvuli:

12me ra vakavinakataki kina ko ira sa lotu, me ia na cakacaka ni talatala, me vakatataki cake nai vavakoso nei Karisito:

13me da yaco sara koi keda kecega me da lomavata e na vakabauta, ka kila sara na Luve ni Kalou, me da tautauvata kei nai vakarau ni tamata dina, era sa sinai sara kei Karisito:

14me da kakua ni vagonegonea tiko, ka veitosoyaki ka veikauyaki e na cagi kecega ni vakavuvuli, e nai lawaki ca ni tamata, e na dauveivaqaseni sa nakiti kina na veivakacalai;

15ia me da ia na ka dina e na yalololoma, me da tubu cake vei koya e na ka kecega, vei koya ga na uluda, o Karisito:

16o koya sa sema vata maikina na yago taucoko, ka vauci vata, e na vuku ni ka yaga sa cakava nai sema yadua, me vaka na ka sa cakava sara na tikina kecega ni sa dui vakaitavi, a sa vakatuburi cake ki na yago tabu ni sa vakatataki cake vakai koya e na loloma.

17O koya o qo kaʼu sa vosa kina, ka vakarota matua kina e na vuku ni Turaga, mo dou kakua ni valavala tiko me vakataki ira na veimatanitu tani, e na lomadra lialia,

18ni sa vakabutobutotaki na lomadra, a ra sa tawa veiriti kei na bula sa mai vua na Kalou, e na vuku ni lialia sa tu e na yalodra, e na vuku ni sa kaukauwa na lomadra:

19ia ni ra sa tawa madua rawa, era sa soli ira ki na cakacaka vakasisila, me ra cakava na ka kecega sa tawa-savasava ni ra sa dau-garova.

20Ia koi kemudou, dou a sega ni rawata vakaoqo nai vakavuvuli kei Karisito;

21kevaka dou a rogoci koya, ka sa vakatavulici vei koya, me vaka na dina sa tu vei Jisu:

22e na vuku ni valavala eliu, mo dou luvata tani kina na tamata makawa, a ya sa ca mai e na vuku ni gadreva ca sa veivakaisini;

23mo dou vakavoui mai e na yalomudou kei na lomamudou;

24ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.

25O koya ga o qo ni dou sa biuta tani kina na lasu, me vosa dina na tamata yadua vua na kai nona: ni da sa tikina vata vakai keda.

26Ni dou sa cudru, kakua ni valavala ca; me kakua ni dromu na mata-ni-siga ni dou sa cudru tiko:

27kakua talega ni lalaga vua na tevoro.

28Me kakua ni butako tiko ko koya ka daubutako, ka me daucakacaka ga, ka kitaka e na ligana na ka sa yaga, me so kina na nona ka me soli vei koya sa dravudravua.

29Me kakua ni lako mai na gusumudou e dua na vosa velavela, o koya ga sa vinaka me ia kina na veivakatataki, me vaka na kena yaga, me yaco kina na vinaka vei ira era sa rogoca.

30Ia dou kakua ni vakararawataka na Yalo Tabu ni Kalou, o koya dou sa dregati kina me yaco mada na siga ni bula.

31Me biu tani kece vei kemudou na yaloca, kei na cudrucudru, kei na daunene, kei na veiba, kei na vosavakacaca, kei na ca kecega sa vakakina:

32ia dou veilomani vakai kemudou, dou lomavinaka, dou kakua ni veicudruvi, me vaka sa sega ni cudruvi kemudou na Kalou e na vuku i Karisito.