Vei Ira Na Kai Kalatia 5 - AI VOLA TABU（FIJ1864）

Sa vakarota vei ira ko koya me ra tu dei e na lalaga sa yaco vei ira e na vuku i Jisu; me ra dauloloma 1-15. Sa qai kaya me ra muria na Yalo Tabu, 16-18. Sa qai tukuna na cakacaka ni tovo vakayago, 19-21, kei na vua ni Yalo Tabu, 22-26.

1O KOYA mo dou qai tu dei e na lalaga sa vakalalagataki keda kina ko Karisito, ka mo dou kakua ni vakataotaki tale e nai vua mo dou bobula kina.

2Raica, oi au ko Paula au sa kaya vei kemudou, Kevaka dou sa ia tiko na cilivi, ena vakatawayagataki kina vei kemudou ko Karisito.

3Niʼu sa vakadinadina tale vei ira na tamata yadua sa cilivi, ni sa vauci tu me muria na vunau taucoko.

4Dou sa tawase tu maivei Karisito, oi kemudou kecega sa vaka mo dou vakadonui e na vunau; dou sa qai bale mai na loloma.

5Ni sa vakabauta eda sa waraka ka vakanuinui kina, e na veivuke ni Yalo, me da vakadonui.

6Io, ni da sa tu vata kei Karisito Jisu, sa sega ni yaga me cili, se me tawa cili; a ya ga na vakabauta sa daucakacaka yaco e na loloma.

7Dou a cici vinaka eliu; o cei beka sa tarovi kemudou mo dou kakua ni talairawarawa kina ki nai vakavuvuli dina?

8A vakadinata o qo sa sega ni maivei koya sa kacivi kemudou.

9A tikina lailai ni leveni sa vakalevenitaka nai buli taucoko.

10Au sa vakararavi ga vei kemudou e na vuku ni Turaga, ni dou na sega ni lomavakatani; ia ko koya ga sa vakayavalati kemudou, ena rawata na kenai sau, io ko ira yadua.

11Ia koi au, na veiwekani, kevaka kaʼu sa vunautaka tiko na veicili, a cava kaʼu sa vakacacani tiko kina? sa qai mudu na veivakatarabetaki e na kauveilatai.

12Au sa vinakata me ra muduki tani era sa vakayavalati kemudou.

13Ni dou sa kacivi, na veiwekani, mo dou lalaga; ia dou kakua ni ia na lalaga me tubu kina na ka vakayago, ia dou ia tikoga na veivuke ni veilomani vakai kemudou.

14Ni sa daucaka sara na vunau taucoko e na vosa e dua bau, o qori ga: Mo lomana na kai nomu me vakataki iko.

15Ia kevaka dou sa veikata ka veikani vakai kemudou, dou raica vinaka de dou veivakarusai vakai kemudou.

16Ia kaʼu sa kaya, Dou lako voli e na Yalo, ka dou na sega ni cakava kina na gadreva ca ni tovo vakayago.

17Ni sa veivala na gadreva ni tovo vakayago kei na Yalo, a sa veivala na Yalo kei nai tovo vakayago: ia sa veimecaki koi rau o qo; dou sa sega kina ni cakava na veika dou sa vinakata.

18Ia kevaka sa tuberi kemudou na Yalo, dou na sega ni lewai e na vunau.

19Ia sa votu na cakacaka ni tovo vakayago, a ya sa vakaoqo: A dauveibutakoci, na daudara, nai valavala tawa-savasava, na daugarogaro,

20na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu,

21na dauvuvu, na daulaba, na daumateni, na dausoqo vakalialia, kei na veika sa vakakina: a veika o qo au sa tukuna eliu vei kemudou, me vaka kaʼu a tukuna makawa talega, ni na sega ni rawata na matanitu ni Kalou ko ira era sa kitaka na veika vakaoqo.

22Ia na vua ni Yalo na loloma, na reki, na vakacegu, na vosota vakadede, na yalomalua, na yalololoma, na vakabauta,

23na yalomalumalumu, nai valavala malua: sa sega na vunau sa cudruvi kina na veika o qo.

24Ia ko ira era nei Karisito era sa vakota ki na kauveilatai nai tovo vakayago kei na dodomo ca kei na gadreva ca.

25Kevaka eda sa bula e na Yalo, tou lako voli talega e na Yalo.

26Me da kakua ni gadreva me da dokai walega, se veicudruvi, se veivuvutaki.