Vei Ira Na Kai Kalatia 4 - AI VOLA TABU（FIJ1864）

Sa veitaliataki keda eliu na vunau i Mosese; ia ni sa qai lako mai ko Karisito, eda sa qai lalaga mai na vunau, 1-11. Sa nanuma ko Paula na nodra loloma eliu rei koya: kei na nona loloma vei ira, 12-20. Sa qai tukuna ni ra kawa vakayalo i Eparaama, 21-31.

1IA kaʼu sa kaya, Ni sa gone tiko nai taukei emuri, sa tauvata kei nai talatala walega, ia ka sa nona ga na ka kecega;

2a sa veitaliataki koya ko ira nai vakavuvuli kei ira na qase, me yaco mada na gauna ka lokuca eliu ko tamana.

3Sa vakakina koi keda eliu, ni da a gone tiko, sa veitaliataki keda me vaka na bobula na veivu ni ka sa vakavuravura:

4ia ni sa yaco dina sara na gauna, sa qai tala yani na Luvena ko na Kalou, o koya sa sucu mai na dua na yalewa, sa sucu me veitaliataki koya ko na vunau,

5me voli ira kina sa veitaliataki ira ko na vunau, me da vakabauti kina me da luvena bau.

6Ia ni dou sa qai luvena, sa tala ko na Kalou na Yalo ni Luvena ki na lomamudou, o koya sa daukaci, Apa, Tama i keimami.

7O koya o qo ko sa qai sega kina ni talatala walega, a luvena ga; ia kevaka ko sa luvena, ko na qai taukena na veika ni Kalou e na vuku i Karisito.

8Ia eliu, ni dou a sega ni kila na Kalou, dou a dauqaravi ira sa sega ni nodrai tovo me kalou.

9Ia edaidai, ni dou sa qai kila na Kalou, se dina beka ga ni sa qai kilai kemudou na Kalou, dou sa qai lesu tale vakacava ki na veivu ni ka, a ya sa malumalumu ka dravukasi, ka dou sa vinakata mo dou qarava tale?

10Dou sa vakatabuya e so na siga, kei na vula e so, kei na gauna e so, kei na yabaki e so.

11Au sa rere e na vukumudou, de tawa yagana noqu cakacaka vei kemudou.

12Oi kemudou na veiwekani, au sa masuti kemudou, mo dou vakataki au; niʼu sa vakataki kemudou: dou sa sega ni vakacacani au vakalailai.

13Ia dou sa kila, niʼu a vunautaka tiko eliu vei kemudou nai tukutuku-vinaka, sa malumalumu na yagoqu.

14Ia e na vuku ni ka ni yagoqu sa vakatovolei au, dou sa sega ni beci au se vakatatabuya; ia dou a vakacegui au me vaka e dua na agilose ni Kalou, me vakataki Karisito Jisu.

15Sa qai cava na nomudou marau eliu? niʼu sa vakadinadina vei kemudou, kevaka ka rawarawa, dou a vecuka tani na matamudou, me solia mai vei au.

16Au sa qai yaco beka me nomudou meca, niʼu sa vosa dina vei kemudou?

17Era sa gumatua ni lomani kemudou, e sega e nai valavala vinaka, io era sa via tawasei kemudou tani, mo dou gumatua ni lomani ira.

18Ia ka sa vinaka na gumatua tikoga e na cakacaka vinaka, me kakua ni ia walega niʼu sa tiko vata kei kemudou,

19na luvequ lalai, oi kemudou kaʼu sa taratara tale kina, me buli mada ko Karisito e na lomamudou!

20Ia kaʼu sa via tiko edaidai vei kemudou ka me dua tani na domoqu; niʼu sa nuinuica e na vukumudou.

21Dou tukuna mai vei au, oi kemudou sa via vauci e na vunau, dou sa sega beka ni rogoca na vunau?

22Ni sa volai, ni sa lewe rua na luvena-tagane ko Eparaama, a tinana e dua na vada, a tinana kadua na marama:

23ia ko koya sa mai vua na vada, sa sucu vakatamata; ia ko koya sa mai vua na marama, sa vaka na vosa ni yalayala.

24Ia na veika o qo sai vakatakarakara: ni sa veiyalayalati e rua koi rau na yalewa o qo; e dua mai na ulu-ni-vanua ko Sinei, a ya sa vakasucu gone me ra bobula, o qori ko Ekari.

25Ia ko Ekari oqo na ulu-ni-vanua ko Sinei mai Arepea, a sa tautauvata kei Jerusalemi sa tu edaidai, a sa bobula tiko kei ira na luvena.

26Ia sa lalaga ko Jerusalemi maicake, o koya na tinada kecega.

27Ni sa volai, Mo reki, ko iko na yava sa tawa vakaluveni; mo tabalaka na kaci, o iko sa tawa taratara: ni sa qai lewe vuqa na luvena ko koya ka biu, ka lewe lailai vua sa vakawati.

28Ia koi keda, oi kemudou na veiwekani, eda sa vakataki Aisake, ni da sa gone ni vosa ni yalayala.

29Ia ka sa vaka sara kei na ka eliu, ni sa vakacacani koya sa vakayalo ko koya sa sucu vakatamata, sa vaka talega kina e na gauna o qo.

30Ia na cava sa kaya nai Vola? Vakasava tani na vada kei na luvena; ni rau na sega ni taukei vata na luve ni vada kei na luve ni marama.

31Sa vakaoqo, oi kemudou na veiwekani, eda sa sega ni luve ni vada, a ya ga ni marama.