Vei Ira Na Kai Kalatia 3 - AI VOLA TABU（FIJ1864）

Sa tarogi ira ko koga se na vuku ni caca era su biuta kina na vakabauti Jisu, me ra vakararavi ki na vunau i Mosese; ni da sa vakadonui e na vakabauta; ka kalougata kina we vakai Eparaama, 1-9. Sa vakatakila e na ka e vuqa ni sa dina na ka o qo, 10-29.

1OI kemudou na kai Kalatia, dou sa sesewa, o cei beka sa lari kemudou, mo dou kakua ni talairawarawa tiko ki nai vakavuvuli dina; ni sa vakaraitaki oti e na matamudou ko Jisu Karisito me vaka ni sa vakoti ki na kauveilatai e na kemudou maliwa?

2A ka ga o qo kaʼu sa via kila maivei kemudou, Sa cakacaka ni vunau, se na rogoca na vakabauta, dou sa rawata kina na Yalo?

3Dou sa sesewa vakaoqo, ne? ni dou sa vakatekivuna e na Yalo, dou sa qai tinia beka e na ka vakayago?

4Dou a vosota vakaoqo e vuqa na ka me tawa yaga, se segai? kevaka sa dina ga ni sa tawa yaga.

5Io, ko koya sa dausolia vei kemudou na Yalo, a sa daucaka-mana e na kemudou maliwa, sa rawata li ko koya mai na cakacaka ni vunau, se mai na rogoca na vakabauta?

6Me vaka sa vakadinata na Kalou ko Eparaama, a sa okati vua mei valavala dodonu.

7O koya mo dou qai kila, o ira era sa muria na vakabauta, o ira ga o qo era sa luve i Eparaama.

8Ia nai Vola talega, ni sa kila makawa ni sa vakabauta sa dauvakadonui ira kina na veimatanitu ko na Kalou, sa vunautaka mada eliu vei Eparaama nai tukutuku-vinaka, Ena vakalougatataki na veivanua kecega e na vukumu.

9A ra sa vakalougatataki vata kei Eparaama sa dauvakabauta ko ira sa muria na vakabauta.

10Ni sa nodra me cudruvi, o ira kecega era sa muria na cakacaka ni vunau; ni sa volai, Ena cudruvi ko ira yadua sa sega ni tu dei e ua ka kecega sa volai e nai vola ni vunau me cakava.

11Ia ka sa macala sara ni sa sega ni vunau sa vakadonui kina e dua e na mata ni Kalou; ni sa volai, Ena bula na tamata dodonu e na vuku ni sa vakabauta.

12Ia sa sega ni ka ni vakabauta na vunau; ia Ko koya ga sa cakava na veika o qori ena bula kina.

13Sa voli keda ko Karisito mai na veicudruvi ni vunau, ni sa cudruvi ga ko koya e na vukuda, (ni sa volai, Sa cudruvi ko ira yadua sa rube e na kau:)

14me yaco kina na ka e veivakalougatataki nei Eparaama vei ira na veimatanitu e na vuku i Jisu Karisito; me dai rawata kina na Yalo ka yalataki, ni da sa vakabauta.

15Oi kemudou na veiwekani, au sa vosa me vaka e dua na tamata: Kevaka sa tamata ga sa ia na veiyalayalati, a sa vakadinadinataki, sa qai sega e dua sa vakatawayagataka se vakaikuritaka.

16Ta ka sa vosataki vei Eparaama na veiyalayalati, vei ira talega na nona kawa. Sa sega ni kaya ko koya, Vei ira na veikawa, me vaka ni sa lewe vuqa; a ya ga me vaka ni sa le dua bau, (Vei ira talega na nomu kawa,) o koya ko Karisito.

17Ia na ka ga o qo kaʼu sa kaya, a veiyalayalati ka vakadinadinataka eliu ko na Kalou vei Karisito, sa sega ni vakatawayagataka ko na vunau sa muria ni sa oti mada e va na drau ka tolusagavulu na yabaki, me cakava kina me tawa yaco na vosa ni yalayala.

18Io, kevaka sa vunau sa yaco kina nai votavota, sa qai sega e na yalayala: ia na vosa ni yalayala ga sa solia kina ko na Kalou vei Eparaama.

19Sa qai mei cavai beka na vunau? Sa vakaikuritaki o qori e na vuku ni talaidredre, me yaco mada na kawa sa vosa kina na yalayala; a ra sa tukuna ko ira na agilose e na gusu ni dua na dautataro.

20Ia sa sega ni dautataro sa ia kina sa dua bauga na ka; ia na Kalou ga sa dua bauga.

21Erau sa qai dua tani sara beka na vunau kei na vosa ni yalayala ni Kalou? E segai sara: io, kevaka sa soli e dua na vunau sa ia rawa kina na veivakabulai, ena qai dina ni sa vunau sa yaco kina na veivakadonui.

22Ia ka sa sogolatia na ka kecega nai Vola, ka beitaka e na cala, me soli kina na ka sa yalataki, e na vuku ni vakabauti Jisu Karisito vei ira era sa vakabauta.

23Ia ni sa tawa yaco na vakabauta, eda sa vakatawai me ia tiko na vunau, ni da sa sogolati tiko ki na vakabauta ena vakaraitaki emuri.

24A sa yaco kina na vunau mei vakavuvuli me tuberi keda vei Karisito, me da vakadonui kina e na vuku ni vakabauta.

25Ia ni sa yaco na vakabauta, sa qai sega ni veitaliataki keda tiko nai vakavuvuli me da tuberi.

26Ni sa luve ni Kalou koi kemudou kecega e na vuku ni dou sa vakabauti Karisito Jisu.

27Ni sai Karisito dou sa vakasulumi kemudou kina, oi kemu dou yadua sa papitaisotaki vei Karisito.

28Sa sega eke na Jiu se na kai matanitu tani, sa sega eke na bobula se nai taukei, sa sega eke na tagane kei na yalewa: ni sa dua bauga koi kemudou kecega, e na vuku i Karisito Jisu.

29Ia kevaka dou sa nei Karisito, dou sa qai kawa i Eparaama, ka na yaco mei taukei me vaka na vosa ni yalayala.