Vei Ira Na Kai Kalatia 6 - AI VOLA TABU（FIJ1864）

Sa vakavulici ira ko koya me ra yalomalua vei ira era sa cala; ka me ra veivuke tiko, 1-5. Me ra lomasoli, 6-10. Sa qai cavuti ira tale nai vakavuvuli vakailasu; a sa tukuna na ka sa reki kina ko koya, 11-18.

1OI kemudou na veiwekani, kevaka e dua na tamata sa yaco vakidacala me valavala ca, mo dou vakavinakataki koya e na yalo e malumalumu, oi kemudou sa vakayalo; ka me dui vakaraici koya, de sa dauveretaki ko koya talega.

2Dou veivuke ni colata na nomudoui colacola, ka mo dou cakava kina na vunau i Karisito.

3Kevaka e dua sa vakasami koya me ka levu, a sa ka walega, sa qai vakaisini koya vakai koya.

4Ia me vakatovolea na nona cakacaka na tamata yadua, ena qai rekitaki koya e na vuku i koya ga, ka sega e na vukuna e dua tani:

5ni na colata na nonai colacola na tamata yadua.

6Ia ko koya sa vakatavulici e na Vosa, me solia nai vota ni ka kecega e vinaka vei koya sa vakatavulica.

7Mo dou kakua ni vakaisini kemudou; a Kalou ena sega ni vaqaseni; na ka kecega sa kaburaka na tamata ena tamusuka talega.

8Io, ko koya sa kaburaka na ka ni nonai tovo vakayago, ena tamusuka na rusa mai nai tovo vakayago; ia ko koya sa kaburaka na ka ni Yalo, ena tamusuka na bula tawa mudu mai na Yalo.

9Ia me da kakua ni ceguoca e na caka vinaka, ni da na tamusuka e na kena yabaki, kevaka eda sa sega ni oca.

10O koya o qo, ni sa rawa, me da caka vinaka vei ira na tamata kecega, ka vakalevu vei ira era veitokani e na vakabauta.

11DOU raica na levu ni vola kaʼu sa vola vei kemudou e na ligaqu dina.

12O ira era sa via rairai vinaka vakayago, era sa vakasaurarataki kemudou mo dou cilivi; a ya ga me ra kakua kina ni vakacacani e na vuku ni kauveilatai nei Karisito.

13Ia ko ira era sa cilivi era sa sega ni talairawarawa ki na vunau; a ra sa gadreva ga mo dou cilivi me ra rekitaka na lewemudou.

14Ia koi au, me kakua sara mada na ka meʼu rekitaka, a ya ga na kauveilatai ni noda Turaga ko Jisu Karisito, sa lauvako kina vei au e na kauveilatai na veika vakavuravura, kei au talega ki na veika vakavuravura.

15Ni da sa tu vata kei Karisito Jisu sa sega ni yaga me cili, se me tawa cili, a ya ga me vakavoui.

16Ia me yaco na vakacegu kei na loloma, kivei ira kecega era sa valavala tiko me vaka nai vakarau o qo, vei ira talega na Isireli ni Kalou.

17Me kakua e dua me vakasosataki au e na gauna emuri: ni sa tu ga e na yagoqu na we ni kuita e na vuku ni Turaga ko Jisu.

18Me tiko kei na yalomudou, na veiwekani, na loloma ni noda Turaga ko Jisu Karisito. Emeni.