II. Vei Ira Na Kai Korinica 12 - AI VOLA TABU（FIJ1864）

Sa qai tukuna vei ira ni sa rawarawa vua me vakalevui koya e na vuku ni ka levu sa vakatakila oti vei koya ko na Kalou; ia ka sa via vakalevui koya e na vuku ga ni nona malumalumu, 1-13. Sa qai kaya ni na lakani vei ira, ka lewai ira, 14-21.

1E DINA ya ni sa sega ni yaga vei au meʼu vakalevulevui au; ni kaʼu na cavuta na veirai votu kei na vei vakarairai ni Turaga.

2Au sa kila e dua na tamata o koya sa tu vata kei Karisito, ni ka kau cake mada ko koya o qo ki nai katolu ni lomalagi, a sa qai oti na yabaki e tinikava, (se vakayago beka, se sega, au sa tawa kila; se sega beka ni vakayago, au sa tawa kila; sa kila ko na Kalou;)

3io, au sa kila na tamata sa vakaoqo, (se vakayago ga, se tawa vakayago, au sa tawa kila; sa kila ko na Kalou;)

4ni sa kau cake ki parataisi, a sa rogoca na vosa sa tawa tukuni rawa, a ya sa tawa tara me tukuna na tamata.

5E na vuku i koya o qo kaʼu na doudou kina ni reki; ia e na vukuqu ga, kaʼu na sega ni doudou kina ni reki, e na vuku ga ni noqu malumalumu.

6Ia kevaka kaʼu sa vinakata me rekitaki au, au na sega ni lialia kina; niʼu na kaya ga na ka e dina: ia kaʼu sa kua so ga, de dua sa vakasami au niʼu sa uasivi cake e na ka sa raica vei au, se rogoca vei au.

7Ia deʼu vakalevulevui sara e na vuku ni sa levu sara na vei vakarairai, sa dua na rarawa sa lesi vei au e na lewequ, e dua nai talatala i Satani me vakararawataki au, deʼu vakalevulevui sara.

8E na vuku ni ka o qo, me kau tani vei au, kaʼu a vakamasuta vakatolu na Turaga.

9A sa kaya vei au ko koya, Sa rauti iko na noqu loloma: ni sa vakalevui na noqu kaukauwa, i ni sa malumalumu e dua. O koya o qo sa yaloqu sara cake kina meʼu rekitaka na noqu malumalumu, me tiko kina vei au na kaukauwa i Karisito.

10O koya o qo kaʼu sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, e na vuku i Karisito: niʼu sa malumalumu, au sa qai kaukauwa.

11Au sa yaco me lialia niʼu sa vakalevulevui au; oi kemudou ga sa cikevi au; ni ka dodonu mo dou vosavakavinakataki au; niʼu sa sega ni uasivi sobu vei iratou nai apositolo eratou sa uasivi cake; a sa dina ya niʼu sa ka wale.

12E dina ni sa vakayacori e na kemudou maliwa na veivakatakilakila ni apositolo e na dauvosota kecega, e na veika-mana, kei na veika e veivakidacalataki, kei na cakacaka mana.

13Ni dou sa uasivi sobu vei ira na veivavakoso lewe ni soro tani e na cava, e na vuku ga ni ka o qo, niʼu sa sega ni vakaogai kemudou? mo dou kakua ni cudruvi au e na vuku ni ka ca o qo.

14Raica, au sa vakarau meʼu lako vakatolu yani vei kemudou; ia kaʼu na sega ni vakaogai kemudou: ni sa sega ni nomudou veika, oi kemudou ga, kaʼu sa vakasaqara: ni sa sega ni kilikili kei ira na gone me ra binia vata nai yau me nodra na qase, ko ira ga na qase, me nodra na gone.

15Ia sa yaloqu sara meʼu lomasoli ka meʼu vakaoti e na vuku ni yalomudou; io, kevaka sa vaka na kena levu ni noqu loloma vei kemudou na kena lailai kaʼu sa lomani kina.

16Ia me vaka ga ko ya, au a sega ni bitaki kemudou: ia niʼu a yaloqaseqase, kaʼu a ia nai lawaki, ka vauci kemudou.

17Au a vakavutuniyautaki maivei kemudou li vei ira kaʼu a tala vei kemudou?

18Au a masuti Taito, ka tala vata kaya e dua maivei ira na veiwekani. Sa vakavutuniyautaki maivei kemudou li ko Taito? keirau a sega li ni valavala e na yalovata? keirau a sega li ni we dua?

19Dou sa vakasama tale beka ni keitou sa vosavakavinakataki keitou vei kemudou? keitou sa vosa e na mata ni Kalou, me vaka ni keitou sa tu vata kei Karisito: ia na ka kecega o qo, oi kemudou sa daulomani, mo dou vakatataki cake kina.

20Niʼu sa rere, deʼu lako yani ka tawa kunei kemudou me vaka na ka kaʼu sa vinakata, ia kaʼu na qai kune vei kemudou me vaka na ka dou sa tawa vinakata: de so na veileti, e so na vuvu, e so na cudrucudru, e so na veiba, e so na kakase, e so na vakasolokakana, e so na qaciqacia, e so na veisei;

21de vakamalumalumutaki au e na matamudou na noqu Kalou, niʼu sa lako tale yani, ka deʼu tagicaki ira kina era lewe vuqa era sa valavala ca oti, ka sega ni veivutuni e na dukadukali kei na dauyalewa, kei na daudara, era a kitaka.