II. Vei Ira Na Kai Korinica 11 - AI VOLA TABU（FIJ1864）

E na vuku ni ra sa beci Paula nai talatala vakailasu, sa tukuni koya ko koya, ni sa dauvunau ka sega ni voli kina; a sa levu sara na nona cakacaka, ka vakaidina na ca sa vosota ko koya, 1-33.

1AU sa vaka mo dou vosoti au mada vakalailai ga e na lialia: io, dou vosoti au dina mada ga.

2Niʼu sa lomani kemudou sara me vaka na loloma ni Kalou: niʼu a musuki kemudou vua e dua me watimudou, meʼu vakaraitaka kina vei Karisito e dua na gonealewa savasava.

3Ia kaʼu sa rere, de dua na ka ena vakacalai kina na lomamudou mai na kena dina vei Karisito, me vaka ka vakacalai Ivi eliu na gata e na nonai lawaki ca.

4Ia ka sa dodonu ga mo dou vosoti koya sa qai lako mai, kevaka sa vunautaka e dua tani na Jisu, o koya keitou sa tawa vunautaka eliu, se sa yaco vei kemudou e dua tani na Yalo, o koya sa tawa yaco vei kemudou eliu, se dua tani nai tukutuku-vinaka, a ya dou a sega ni vakabauta eliu.

5Niʼu sa vakasama niʼu sa sega sara ni uasivi sobu vei iratou nai apositolo eratou sa uasivi cake.

6Ia kevaka kaʼu sa vaka na kaisi e na vosa, au sa sega ni vakakina e na vuku; ia keitou a vakaraitaki sara vei kemudou e na ka kecega.

7Au sa qai valavala ca beka niʼu sa vakamalumalumutaki au mo dou vakalevutaki kina, niʼu sa vunautaka vei kemudou nai tukutuku-vinaka ni Kalou ka tawa voli kina?

8Au a vakadravudravuataki ira na veivavakoso lewe ni soro tani e so, niʼu sa vakaivolitaki, meʼu ia kina na cakacaka vei kemudou.

9Ia niʼu a tiko kei kemudou, ka dravudravua, au a sega ni vakaogai koya e dua: ni ra a vakarauta sara na noqu dravudravua ko ira na veiwekani era a lako mai Masitonia; ia e na ka kecega au a vakaraici au meʼu kakua ni vakaogai kemudou, ia kaʼu na vakaraici au tiko.

10Sa vaka kaʼu sa dina e na mata i Karisito, ena sega sara ni tarovi na noqu vosa doudou e na ka o qo e na yasayasa vaka-Akaia.

11E na vuku ni cava? niʼu sa tawa lomani kemudou li? Sa kila ga na Kalou.

12Ia na ka kaʼu a cakava, au na cakava tikoga, meʼu muduka tani kina na vuna maivei ira era gadreva na vuna; me ra kune ga me ra vakataki keitou e na ka era sa vakalevulevui ira kina.

13Ni ra sai apositolo vakailasu ko ira sa vakaoqo, era sa tamata daucakacaka veivakaisini, era sa vakamataliataki ira me rai apositolo kei Karisito.

14Ia ka sa sega na ka e veivakidacalataki o qo; ni sa vakamataliataki koya ko Satani me agilose ni rarama.

15O koya o qo sa sega ni ka levu kina me vakamataliataki talega ko ira na nonai talatala me ra vakai ira nai talatala ni valavala dodonu: ia na kedrai tinitini ena vaka na nodra cakacaka.

16Au sa kaya tale, Me kakua na tamata me nanuma kaʼu sa lialia; ia kevaka sa sega ni vakaoqo, mo dou vosota ga na noqu lialia, meʼu vakalevulevui au vakalailai mada koi au talega.

17A ka kaʼu sa kaya, au sa tawa kaya me vaka na ka ni Turaga, me vaka ga na ka lialia, niʼu sa vakalevulevui au e na doudou o qo.

18Ni ra sa lewe vuqa era vakalevulevui ira vakayago ga, oi au talega kaʼu na vakalevulevui au.

19Ni dou sa reki me vosoti ira era sa lialia, ni dou sa vuku.

20Ni dou sa vosota ga, kevaka dou sa vakabobulataki vua e dua, kevaka dou sa vakadravudravuataki vua e dua, kevaka dou sa lawakitaki vua e dua, kevaka e dua sa vakalevui koya, kevaka e dua sa tavia na matamudou.

21Au sa vosa, me vaka kaʼu sa beci, me vaka ni keitou a malumalumu. Ia kevaka e dua sa doudou e na dua na ka, (au sa vosa vakalialia,) au sa doudou vaka talega kina.

22O ira beka era sa Iperiu? au sa vakakina. Era sa luve i Isireli beka? au sa vakakina. Era sa kawa i Eparaama beka? au sa vakakina.

23Era sai talatala i Karisito beka? (au sa vosa me vaka na lialia,) au sa uasivi cake; au a daucakacaka vakalevu cake, au a yaviti vakalevu sara, au a tiko vakavuqa cake e na vale ni veivesu, au a kolai mate vakavuqa.

24Sa yaviti au vakalima ko ira na Jiu a sa vo ga e dua me vakayavasagavulu.

25Au a yaviti vakatolu e nai titoko, au a viriki vakadua e na vatu, au a mate vakatolu e waqa, au a tiko e na wai titobu ka bogi dua ka siga dua;

26au a veilakoyaki vakavuqa, au a ca e na veiuciwai, au a ca maivei ira na daubutako, au a ca maivei ira na kai noqu, au a ca maivei ira era sa tawa lotu, au a ca e loma ni koro, au a ca e loma ni veikau, au a ca e loma ni waitui, au a ca maivei ira na veiwekani vakailasu;

27au a dauoca ka daurarawa, au a dauyadra vakavuqa, au a dauviakana ka dauviagunu, au a daulolo vakavuqa, au a liliwa ka luvawale.

28Ia ka sa sega ni wili na veika sa vo, o qori talega sa bitaki au e na veisiga, na daunanumi ira kecega na veivavakoso lewe ni soro.

29O cei beka sa malumalumu, kaʼu sa sega ni malumalumu? o cei sa tarabe, kaʼu sa sega ni lomakatakata?

30Kevaka e dodonu meʼu vakalevulevui au, au na vakalevulevui au e na vuku ni noqu malumalumu.

31A Kalou na Tama ni noda Turaga ko Jisu Karisito, o koya sa nona na vakarokoroko ka tawa mudu, sa kila niʼu sa sega ni vosa lasu.

32Mai Tamasiko, na matanivanua nei Arita na tui sa kaya me vakatawai na koro ko Tamasiko, ni sa via tauri au;

33ia kaʼu sa tukuci sobu yani e loma ni dua niu su, mai na katuba ecake e taudaku ni bai, ka bula kina mai na ligana.