II. Vei Ira Na Kai Korinica 10 - AI VOLA TABU（FIJ1864）

Sa vunauci ira nai talatala vakailasu ni ra sa beci koya e na vuku ni nona malumalumu vakayago; ia ka sa levu na nona kaukauwa vakayalo, 1-18.

1IA koi au ko Paula, kaʼu sa masuti kemudou e na yalomalumalumu kei na yalomalua i Karisito, oi au sa malumalumu niʼu sa tiko vei kemudou, ia kaʼu sa doudou vei kemudou niʼu sa tiko tani;

2io, kaʼu sa vakamamasu meʼu kakua ni doudou niʼu sa tiko vata e na kaukauwa, kaʼu sa vakasama meʼu doudou kina vei kemudou e so, o ira sa vakasami keitou ni keitou sa valavala me vaka na ka vakayago.

3Ni sa dina ya ni sa vakayago na neitou bula, ia keitou sa sega ni vala me vaka na ka vakayago: (

4ni sa sega ni ka vakayago na neitoui yaragi, a sa kaukauwa e na vuku ni Kalou ga me talaraki kina na bai ni valu kaukau wa:)

5ni keitou sa talaraka sobu na veinanuyaki, kei na ka cecere kecega sa vakalevulevui koya ki na vuku ni Kalou, ka keitou sa vakamalumalumutaka na nanuma kecega me talairawarawa vei Karisito;

6ia keitou sa vakarau tu me cudruvaka kecega na talaidredre, ni na vakayacori dina na nomudou talairawarawa.

7Dou sa lewa beka me vaka na ka sa rairai? Kevaka e dua sa vakadinata ni sa nei Karisito ko koya, me vakasama o qo tale ko koya, ni sa vaka sa nei Karisito ko koya, keitou sa nei Karisito vaka talega kina.

8Ia kevaka kaʼu sa vakalevulevui au vakalevu cake vakalailai e na vuku ni kaukauwa sa solia mai vei keitou na Turaga, mo dou vakatataki cake kina, ia ka sega ga mo dou vakarusai kina, au na sega ni madua.

9Meʼu kakua ni vaka ni kaʼu sa vakarerei kemudou e nai vola; (

10ni ra sa kaya, Sa bibi ka kaukauwa nai vola; ia sa malumalumu ga na tiko vei keda, kei na ka vakasewasewani na vosa;)

11me qai nanuma ko koya sa vakakina na ka o qo, ni rau na tautauvata ga, na neitou vosa e nai vola ni keitou sa tiko tani kei na neitoui valavala ni da sa tiko vata ga.

12Ni keitou sa tawa kitaka me keitou vakataki ira e so, se vakatauvatani keitou kei ira era sa dautukuni ira vakai ira; ia ko ira ni ra sa vakarauti ira vakai ira, ka vakatauvatani ira vakai ira, era sa sega ni vuku.

13Ia koi keitou, keitou na sega ni vakalevulevui keitou e na veika sa yawasivita nai vakarau, me vaka ga nai vakarau ni yalayala a ya sa vota vei keitou ko na Kalou, ai vakarau me keitou yaco dina vei kemudou.

14Ni keitou sa sega ni yawasivita na neitoui yalayala, me vaka ni keitou sa sega ni yacovi kemudou: ni keitou sa yacovi kemudou talega e nai tukutuku-vinaka kei Karisito:

15keitou sa sega ni dokai keitou e na veika sa yawasivita nai vakarau, e na vuku ni nodra cakacaka na tamata tani; ia keitou sa vakanuinui ga, ni na vakalevutaki oti na nomudou vakabauta, keitou na vakalevulevui kina vei kemudou me vaka na neitoui yalayala me keitou uasivi,

16me keitou vunautaka nai tukutuku-vinaka e na yasana sa yawasiviti kemudou, me keitou kakua ni vakalevulevui keitou e na vuku ni yalayala ni tamata tani, e na veika sa vakarauti tu.

17Ia ko koya sa vosa doudou, me vosa doudou e na vuku ni Turaga.

18Ni sa sega ni vinakati ko koya sa tukuni koya, o koya ga sa tukuna ko na Turaga.