II. Vei Ira Na Kai Korinica 9 - AI VOLA TABU（FIJ1864）

Sa tukuna ko kaya na ka sa talai Taito kina kei rau na veiwekani, 1-5. A sa qai vakarota vei ira na soli yau vei ira mai Jerusalemi, 6-15.

1E NA vuku ni cakacaka loloma vei ira era sa lotu, sa sega ni yaga meʼu vola kina vei kemudou:

2niʼu sa kila na nomudou gumatua, kaʼu a vakacaucautaki kemudou kina vei ira na kai Masitonia, io, ni sa vakarau ko Akaia ka yabaki dua sa oti yani; a sa vakatakatataki ira na lewe vuqa na nomudou lomakatakata.

3Ia kaʼu sa talai iratou yani na veiwekani, de vakawaletaki na neitou vakacaucautaki kemudou e na vuku ni ka o qo; io, me vaka ga na ka kaʼu a kaya, mo dou sa vakarau tu:

4de lako vata kei au e so vei ira na kai Masitonia, ka kunei kemudou ni dou sa tawa vakarau, ia keitou (me kakua ni cavuti kemudou,) na madua e na vuku ni veivakacaucautaki doudou o qo.

50 koya o qo kaʼu sa vaka ni sa dodonu meʼu masuti iratou na veiwekani, me ratou liu yani vei kemudou, me ratou vakarautaka mada eliu na nomudoui loloma, a ya sa vosataki eliu, me vakarau tu mada ko ya, me vaka nai loloma, ka me kakua ni vaka na ka ni domonikoco.

6Ia o qo, O koya sa kaburaka vakalailai, ena tamusuka talega vakalailai; ia ko koya sa kaburaka vakalevu, ena tamusuka talega vakalevu.

7Me vaka ua ka sa vinakata ko ira yadua e na yalona; me kakua e na vo-raki, se ni sa vakasaurarataki: ni sai koya sa solisoli e na marau sa vinakata ko na Kalou.

8A sa rawarawa vua na Kalou me vakalevutaka vei kemudou na ka-ni-loloma kecega: me tu vei kemudou e na veisiga nai yau kecega e yaga e na ka kecega, ka mo dou uasivi cake kina e na cakacaka dodonu kecega: (

9me vaka na ka sa volai, Sa duibiubiuta ko koya; sa ia nai solisoli vei ira na dravudravua: sa tu dei ka tawa mudu na nonai valavala dodonu.

10Ia ko koya sa dausolia na sila vua sa daukaburaka kei na madrai me kakana, me solia mada na sila vei kemudou me levu, ka vakalevutaka na vua ni nomudoui valavala dodonu;)

11mo dou vakavutuniyautaki e na ka kecega, mo dou ia kina nai loloma kecega, sa vakayacori kina vei keitou na vakavinavinaka vua na Kalou.

12Ni sa sega ni vakarauti walega na nodra dravudravua era sa lotu, ni sa ia na cakacaka o qo, a sa tubu cake vakalevu talega kina na vakavinavinaka vakalevu vua na Kalou;

13ni ra sa vakarokorokotaka na Kalou e na vuku ni dou sa vakatovolei e na cakacaka o qo, ni dou sa tukuna kina ni dou sa talairawarawa ki nai tukutuku-vinaka kei Karisito, e na vuku talega ni cakacaka loloma levu o qo kivei ira, vei ira talega na tamata kecega;

14e na nodra masulaki kemudou talega, ni ra sa daulomani kemudou e na vuku ni loloma levu ni Kalou sa tu vei kemudou.

15Me ia na vakavinavinaka vua na Kalou e na vuku ni nonai solisoli sa tawa tukuni rawa.