II. Vei Ira Na Kai Korinica 8 - AI VOLA TABU（FIJ1864）

Sa vakarota vei ira me ra gumatua me kumuna vata nai yau me ra solia vei ira ma dravudravua mai Jerusalemi, 1-16. Sa qai tukuni Taito kei rau ka lako koya, 16-24.

1IA keitou sa vakatakila vei kemudou, na veiwekani, na loloma ni Kalou sa soli vei ira na veivavakoso lewe ni soro mai Masitonia;

2ni sa levu sara na nodra reki, ka titobu na nodra dravudravua, a sa uasivi cake vakalevu kina na nodra lomasoli vakaidina, ni ra sa vakatovolei tiko e na ka rarawa sara.

3Niʼu sa vakadinadinataka, ni sa vaka na ka era rawata, io sa uasivi cake e na ka era rawata, ni sa yalodra kina;

4a ra sa vakamamasu ka cikevi keitou vakalevu me keitou kauta na ka-ni-loloma, ka veitokani e na cakacaka loloma e na vukudra era sa lotu.

5A ra sa sega ni vaka na neitou vakasama, ia ka ra sa soli ira mada vua na Turaga, vei keitou talega e na veitalia ni Kalou;

6ia keitou sa masuti Taito kina, me vaka sa vakatekivuna ko koya, me tinia vaka talega kina vei kemudou na cakacaka loloma o qo talega.

7Ia me vaka dou sa uasivi cake e na ka kecega, e na vakabauta, kei na vosa, kei na vuku, kei na gugumatua kecega, kei na nomudou loloma vei keitou, mo dou uasivi cake e na cakacaka loloma o qo talega.

8Au sa sega ni vosataka na vosa ni vunau, a ya ga e na vukudra e so era sa gumatua cake, meʼu vakatovolea talega na kena dina ni nomudou loloma. (

9Ni dou sa kila na loloma ni noda Turaga ko Jisu Karisito, ni ka vutuniyau ko koya, a sa yaco me dravudravua e na vukumudou, mo dou vutuniyau mai e na vuku ni nona dravudravua.)

10Ia kaʼu sa vakatavuvuli ga e na ka o qo: ni sa kilikili kei kemudou na ka o qo, dou a vakatekivuna eliu, ia dou a sega ni cakava walega, dou a gumatua cake talega kina ka sa oti yani e dua na yabaki.

11Ia o qo, mo dou qai vakayacora sara; me vaka dou a gumatua e na via cakava, me qai tini vakakina me vaka na ka sa rawa.

12Kevaka sa liu na gumatua, ena vinakati me vaka na ka sa tu vua e dua, sa sega ni vaka na ka sa tawa tu vua.

13E sa sega ni ka me vakalecataki ko ira na tamata tani, ka vakararawataki koi kemudou:

14a ya ga me vaka ni sa tautauvata, me rauta na nodra dravudravua na nomudoui yau levu e na gauna o qo, me na rauta na nomudou dravudravua talega na nodrai yau levu: me ia kina na vakatauvatani:

15me vaka na ka sa volai, O koya sa vakalevu sa sega na ka e vo vua; kei koya sa vakalailai sa sega na ka e yali vua.

16Ia me ia na vakavinavinaka vua na Kalou, o koya sa vakatubura e na loma i Taito na daunanumi kemudou vakaoqo.

17E dina ya ni sa vakabauta na vakamamasu; ia ni sa gumatua sara vakai koya ga, sa lako kina vei kemudou.

18Ia keitou sa tala vata kaya na wekada, o koya sa rogo vinaka vei ira kecega na veivavakoso lewe ni soro e na vuku ni tukutuku-vinaka;

19ia ka sa sega ni vakaoqori walega, a sa digitaki koya ko ira talega na veivavakoso lewe ni soro me lako voli vata kei keitou ni keitou sa ia ua cakacaka loloma o qo, me vakarokorokotaki kina ko na Turaga, e na vuku ni nomudou gumatua talega:

20ia keitou sa via tarova o qo, me kakua e dua me beitaki keitou e na vuku ni yau levu o qo keitou sa cakacaka kina:

21ni keitou sa qisia na ka e dodonu, ka sega e na matana ga na Turaga, ka e na matadra talega na tamata.

22Keitou sa tala na wekada talega kei rau, o koya keitou sa kunea wasoma ni sa gumatua e na ka e vuqa, ia ka sa qai gumatua vakalevu cake, ni sa vakadinati kemudou vakalevu.

23O Taito, sa noqui tokani ko koya, a sa vukei au e na cakacaka e na vukumudou: oi rau na wekada, erau sai talatala ni veivavakoso lewe ni soro, oi rau e vakarokorokotaki kina ko Karisito.

24O koya o qo mo dou qai vakatakila vei iratou, e na matadra talega na veivavakoso lewe ni soro, nai vakatakilakila ni nomudou loloma, kei na neitou vakacaucautaki kemudou.