II. Vei Ira Na Kai Korinica 13 - AI VOLA TABU（FIJ1864）

Sa qai kaya me laʼki cudruvi ira era sa valavala ca tiko; a sa vakarota me ra liaci ira vakai ira, 1-10. Sa masulaki ira, ka tinia na nonai vola, 11-14.

1AI katolu o qo ni noqu lako yani vei kemudou. Ena vakadinadinataki na vosa kecega e na gusu ni dautukutuku e lewe rua, se lewe tolu.

2Au a vakasalataka eliu, a sa qai vakasalataka, me vaka nai karua ni noqu tiko vei kemudou; ia o qo, niʼu sa tawa tiko, au sa vola yani vei ira sa valavala ca eliu, kei ira kecega na tani, kevaka kaʼu na lako tale yani, kaʼu na sega ni yalomalua:

3ni dou sa vakasaqara e dua nai vakatakilakila ni sai Karisito kaʼu sa vosa kina, o koya sa sega ni malumalumu vei kemudou, a sa kaukauwa vei kemudou.

4E dina ya ni sa vakoti ki na kauveilatai ko koya ni sa malumalumu, a sa qai bula e na kaukauwa ni Kalou. Keitou talega, keitou sa malumalumu vata kaya, ia keitou na bula vata kaya e na kaukauwa ni Kalou vei kemudou.

5Dou liaci kemudou, se dou tu e na vakabauta, se segai; vakatovolei kemudou. Dou sa sega beka ni kilai kemudou, ni sa tiko vei kemudou ko Jisu Karisito, kevaka dou sa sega ni tawa vinakati?

6Ia kaʼu sa dinata ni dou na kila ni keitou sa sega ni tawa vinakati.

7Ia kaʼu sa masu vua na Kalou, mo dou kakua sara ni valavala ca; e sega me keitou rairai kina ni keitou sa vinakati kina, a ya ga mo dou cakava na ka e dodonu, io, kevaka keitou sa tawa vinakati.

8Ni sa sega ni rawarawa vei keitou e dua na ka me tarovi na dina, a ya ga me tokona na dina.

9Ni keitou sa reki, ni keitou sa malumalumu tu, ka kaukauwa koi kemudou; ia na ka talega o qo keitou sa gadreva, mo dou tawa cala.

10O koya o qo kaʼu sa vola kina ua veika o qo niʼu sa tiko tani, deʼu ia na vosa rarawa ni da sa tiko vata, me vaka na kaukauwa sa solia mai vei au ko na Turaga me ia kina na veivakatataki, me kakua ga na veivakarusai.

11Meʼu tinia, oi kemudou na veiwekani, sa loloma! Mo dou tawa cala, mo dou vakacegui sara, mo dou lomavata, mo dou veivinakati tiko; ia ena tiko vata kei kemudou na Kalou ni loloma kei na vakacegu.

12Dou ia na loloma vakai kemudou e na veireguci e na yalosavasava.

13Sa loloma yani vei kemudou ko ira kecega era sa lotu.

14Me tiko vei kemudou kecega na yalololoma ni Turaga ko Jisu Karisito, kei na loloma ni Kalou, kei na veilomani ni Yalo Tabu. Emeni.