II. Vei Ira Na Kai Korinica 6 - AI VOLA TABU（FIJ1864）

Sa tukuna, ko koya na veika e kilai kina ni sai talatala dina, 1-10, A sa doudou kina ni vosa vei ira ni sa lomani ira sara: a sa kaya me ra lomani koya vakakina; me ra vakatakila na nodra loloma, 11-18.

1IA koi keitou, ni keitou sa cakacaka vata kaya, keitou sa masu talega vei kemudou mo dou kakua ni vakatawayagataka na loloma ni Kalou. (

2Ni sa kaya ko koya, Au a rogoci iko e na gauna ni vinakati, ia e na gauna ni bula kaʼu a vukei iko: raica, na gauna ni vinakati o qo; raica, na siga ni bula edaidai lia o qo.)

3Keitou sa sega ni tarabetaka e dua e na dua na ka, me kakua ni beitaki kina na cakacaka vakaitalatala:

4ia keitou sa vakadinadina e na ka kecega ni keitou sai talatala ni Kalou, e na dauvosota sara, e na ca, e na veivakasaurarataki, e na yaluma,

5e na vakanakuitataki, e na biu ki na veivale ni veivesu, e na tawa tiko dei, e na daucakacaka, e na dauyadra, e na daulolo;

6e nai valavala savasava, e na vuku, e na vosota vakadede, e na yalololoma, e na Yalo Tabu, e na loloma sa tawa veivakaisini,

7e nai vakavuvuli dina, e na kaukauwa ni Kalou, e nai yaragi ni valavala dodonu e na liga i matau kei nai mawi,

8ni keitou sa vakarokorokotaki tiko se tawa dokai, ni keitou sa rogorogo vinaka tiko se rogorogo vakaca: ni keitou sa vaka na dau-veivakacalai, ia keitou sa dina ga:

9sa vaka na tawa kilai, ia ka sa kilai vinaka; sa vakai ira sa mate, ia ka raica, keitou sa bula lako; keitou sa vakai ira sa vunauci, ia ka sega ni vakamatei;

10keitou sa vaka keitou sa daurarawa, ia keitou sa reki tikoga; sa vaka keitou sa dravudravua, ia keitou sa vakavutuniyautaki ira na lewe vuqa; sa vaka ni sa sega vei keitou e dua na ka, ia ka sa tu vei keitou na ka kecega.

11Oi kemudou na kai Korinica, sa dalaga na gusu i keitou vei kemudou, sa vakalalataki na yalo i keitou.

12Dou sa sega ni yaloqiqo e na vuku i keitou, dou sa yaloqiqo ga e na lomamudou.

13Ia me vakaisautaki na ka o qo, (au sa qai vosa me vaka vei ira na luvequ,) dou yalolalaga mai koi kemudou talega.

14Dou kakua ni veitokani vata vakatani kei ira era sa tawa vakabauta: ni sa veitokani vakaevei na yalododonukei na tawa-yalododonu? se sa veiwekani vakaevei na rarama kei na butobuto?

15se rau sa veivinakati vakaevei ko Karisito kei Piliali? se rau sa vakaitavi vata vakaevei ko koya sa vakabauta kei koya sa tawa vakabauta?

16se raui to vata vakaevei na vale ni Kalou kei na veimatakau? ni dou sa vale ni Kalou bula: mo vaka sa kaya ko na Kalou, Au na tiko e na lomadra, ka lako voli kina; ia kaʼu na nodra Kalou, ka ra na noqu tamata.

17O koya o qo mo dou qai lako tani maivei ira, ia dou tawasei tu, sa kaya ko na Turaga, ka dou kakua ni tara na ka sa tawa-savasava; au na qai vakabauti kemudou,

18ia kaʼu na yaco me Tamamudou, ka dou na yaco me luvequ-tagane kei na luvequ-yalewa, sa kaya ko na Turaga Kaukauwa sara.