II. Vei Ira Na Kai Korinica 5 - AI VOLA TABU（FIJ1864）

Sa tukuna ko koya ni sa vakadinata sara na ka vinaka ena yaco ni na tu cake tale na mate, a sa namaka me nona, 1-9. Ia e na vuku ni sa kila ni na lewai ko ira na tamata kecega, sa vakamasuti ira na tamata me ra veivinakati kei na Kalou, 10-21.

1NI keitou sa kila, kevaka sa rusa mai na neitou vale vakavuravura o koya sa vakacevaceva, sa dua na neitou sa tara ko na Kalou, a vale sa tawa caka e na liga, a ya sa tawa rusa rawa, e na lomalagi.

2Io keitou sa vutugu e na kena o qo, ni keitou sa gadreva sara tiko me vakaisulutaki e na neitou vale sa mai lomalagi:

3e na vuku ni keitou sa vakaisulu, keitou na kune ka sega ni luvawale.

4Ni sa vutugu koi keitou, oi keitou sa tiko e na vale vakacevaceva, ni keitou sa bitaki: ni keitou sa sega ni via luvata, a ya ga me keitou vakaisulu tale, me tiloma na ka sa mate rawa na bula.

5Ia sai koya na Kalou sa qisi keitou ki na ka o qo, o koya sa solia talega vei keitou na Yalo mei matai.

6O koya o qo keitou sa doudou kina, ni keitou sa kila, ni keitou sa tiko e na yago, keitou sa tawase kei na Turaga: (

7ni sa vakabauta keitou sa lako voli kina, ka sega ga o na raica:)

8keitou sa doudou tiko, a keitou sa vinakata cake me keitou tawase kei na yago, ka tiko vata kei na Turaga.

9O koya o qo keitou sa dauvakatovolea kina, se keitou tiko vata, se tawase, me keitou vinaka ga vua.

10Ni sa lokuci me rairai koi keda kecega e na mata ni tikotiko ni veilewai nei Karisito; me rawata yadua nai sau ni veika ni yagona, me vaka na veika sa cakava ko koya, se vinaka se ca.

11Ia ni keitou sa kila na vakarerei ni Turaga, keitou sa vakamasuti ira na tamata; ia keitou sa vakaraitaki vua na Kalou; au sa dinata talega niʼu sa vakaraitaki e na nomudou lewa-eloma.

12Ia keitou sa sega ni tukuni keitou tale vei kemudou, ia keitou sa solia ga vei kemudou na ka e so mo dou rekitaki keitou kina, me so kina na ka mo dou kaya vei ira sa ka rairai walega na nodra reki a sa sega na ka eloma.

13Ia kevaka keitou sa sesewa, sa ka vua na Kalou; kevaka keitou sa yalomatua, sa ka e na vukumudou.

14Ni sa rawai keitou sara na loloma i Karisito: ni keitou sa lewa vakaoqo, kevaka sa mate e dua e na vuku ni tamata kecega, era sa mate kecega;

15a sa mate ko koya e na vuku ni tamata kecega, me ra kakua ni bula tiko e na vukudra ga, ko ira era sa bula, a ya ga e na vukuna sa mate e na vukudra ka tu cake tale.

16Ia sa qai sega e dua na tamata sa neitoui tau vakayago; e dina ya ni ka neitoui tau vakayago ko Karisito, ia sa qai sega tale ni neitoui tau vakakina.

17Ia kevaka e dua na tamata sa tu vata kei Karisito, sa qai buli vou: sa lako tani na veika makawa; raica, sa yaco me vou na ka kecega.

18A sa mai vua na Kalou na ka kecega, o koya sa vakaveivinakatitaki keda kei koya e na vuku i Jisu Karisito, a sa solia vei keitou me vunautaka na veivinakati;

19ni sa vakakina, ni sa ia na Kalou, me vakaveivinakatitaki vu ravura e na vuku i Karisito, a sa sega ni wilika vei ira na nodrai valavala ca; a sa solia vei keitou nai tukutuku ni veivinakati.

20Keitou sa yaco kina mei talatala i Karisito, me vaka ni sa vakamasuti kemudou ko na Kalou vei keitou: keitou nai sosomi kei Karisito, keitou sa vakamamasu, mo dou veivinakati kei na Kalou.

21Ni sa qisi koya ko koya mei soro ni nodai valavala ca, o koya sa sega vua na cala; me da caka kina me vakadonui vua na Kalou e ua vukuna.