II. Vei Ira Na Kai Korinica 4 - AI VOLA TABU（FIJ1864）

Sa tukuni koya ko koya ni sa gumatua e na nona cakacaka, 1-6. Na levu na ka rarawa sa vosota ko koya, a sa sega kina ni datuvu, 7-18.

1O KOYA e na vuku ni sa soli vei keitou na cakacaka o qo, me vaka ni sa yaco vei keitou na loloma, keitou sa sega ni datuvu kina;

2ka keitou sa biuta na veika vuni e veivakamaduataki, a sa sega ni daulawaki na neitoui valavala, se keitou vakatanitaka na vosa ni Kalou; ia ni keitou sa tukuna na ka dina, keitou sa vakadonui keitou kina ki na lomadra na tamata kecega, e na mata ni Kalou.

3Ia kevaka sa vuni na neitoui tukutuku-vinaka, sa vuni tu ga kivei ira ga era sa rusa:

4o ira sa vakamatabokotaka na lomadra ko na kalou ni vuravura o qo, era sa tawa vakabauta, me kakua kina ni cilavi ira na rarama ni tukutuku-vinaka ni serau i Karisito, o koya ga na yaloyalo ni Kalou.

5Ni keitou sa sega ni vunautaki keitou, ko Karisito Jisu ga na Turaga; kei keitou, na nomudou tamata e na vuku i Jisu.

6Ni sai koya na Kalou, o koya sa kaya eliu me cila mai na butobuto na rarama, sa cila mai ki na loma i keitou, me cila yani kina na serau ni Kalou, a ya sa vakatakilataka rawa ko na mata i Jisu Karisito.

7Ia sa waqa qele sa tu kina vei keitou nai yau o qo, me sa mai na Kalou na kaukauwa mana levu, ka sega maivei keitou.

8Sa buku na druadrua, ia keitou sa sega ni drigiti; keitou sa lomaocaoca ga, ia keitou sa sega ni yalolailai;

9keitou sa vakacacani, ia keitou sa sega ni biu laivi; keitou sa vakabalei sobu, ia keitou sa sega ni vakarusai;

10keitou sa colata e na yago i keitou e na veisiga kecega na mate ni Turaga ko Jisu, me vakaraitaki talega kina na bula i Jisu e na yago i keitou.

11Ni keitou sa soli tiko e na veisiga, koi keitou sa bula lako, me keitou mate e na vuku i Jisu, me vakaraitaki talega kina na bula i Jisu e na yago i keitou sa mate rawa.

12A sa vakakina, sa daucakacaka vei keitou na mate, ia na bula ga vei kemudou.

13Ia ni sa tu tiko vei keitou na yalo vakabauta ko ya, (me vaka na ka sa volai, Au sa vakabauta, o koya o qo kaʼu sa vosa kina:) sa vakabauta koi keitou talega, o koya o qo keitou sa vosa kina;

14ni da sa kila, o koya ka vakatura cake tale na Turaga ko Jisu ena vakaturi keitou cake talega e na vuku i Jisu, ka vakaraitaki keda kei kemudou.

15Ni sa yaco e na vukumudou na ka kecega me vakarokorokotaki vakalevu cake ko na Kalou e na loloma sa levu sara, ni sa vakavinavinaka ko ira na lewe vuqa.

16E na vuku ni ka o qo keitou sa sega ni datuvu kina; ia kevaka sa rusa mai na tamata etautuba, sa vakavoui na kena eloma e na veisiga kecega.

17Ni sa vakayacora vei keda na serau bibi sa uasivi cake vakalevu sara, ka tawa mudu, na noda rarawa mamada, sa dede vakalailai sara ga:

18ni da sa sega ni vakananuma tiko na veika sa rairai mai, a ya ga na veika sa tawa rairai mai: ni sa dede vakalailai ga na veika sa rairai mai; ia sa tawa mudu na veika sa tawa rairai mai.