II. Vei Ira Na Kai Korinica 3 - AI VOLA TABU（FIJ1864）

Sa vakatakila ko kaya ni sa sega ni dokai koya ni sa tubu na lotu e na vukuna, sa vakamolimoli ga kina vua na Kalou, 1-6. Sa qai vakatakila ni sa uasivi cake e na vunau Mosese nai tukutuku-vinaka kei Jisu, 7-18.

1KEITOU sa vakatekivu tale beka me tukuni keitou? se sa yaga beka vei keitou me keitou tukuni vei kemudou e nai vola e so, me vakai ira e so, se me keitou tukuni vakakina maivei kemudou?

2Oi kemudou ga na neitoui vola sa volai e na loma i keitou, sa kila ka wilika ko ira na tamata kecega:

3sa vakaraitaki ga ni dou sai vola i Karisito keitou sa cakava, sa tawa volai e na wai ni volavola, a ya ga e na Yalo ni Kalou bula; sa sega ga e na dela ni vatu, a ya ga e na dela ni yalomudou sa malumu.

4Ia sa vakaoqo na neitou vakararavi vua na Kalou e na vuku i Karisito:

5ni keitou sa sega ni rawata vakai keitou me vakasama e dua na ka: ia sa mai vua na Kalou ga na neitou kaukauwa;

6o koya sa vakarautaki keitou me keitoui talatala ni veivalayalati vou: a sa tawa vaka sa volai, a ka vakayalo ga: ni sa ia na veivakamatei na ka sa volai, a sa ia na veivakabulai na ka vakayalo.

7Ia kevaka sa yaco vata kei na serau na cakacaka sa ia kina na veivakamatei, sa volai ka ceu e na vatu, a ra sa tawa vakaraica rawa kina na mata i Mosese ko ira na luve i Isireli e na vuku ni serau ni matana, ia sa ka e biu tani o qo:

8ena sega beka ni dina cake ni na dua na serau ni cakacaka vakayalo?

9Io, kevaka sa dua na serau ni cakacaka ni cudruvi, ena uasivi cake vakalevu kina na serau ni cakacaka ni veivakadonui.

10Ia na ka ka serau, sa takali ga na kena serau ni sa vakatauvatani kei na ka o qo, e na vuku ni serau sa uasivi cake.

11Io, kevaka ka serau na ka e biu tani, ena dina vakalevu cake ni sa serau na ka sa tu vakadua.

12Ia ni sa tu vei keitou nai nuinui vakaoqo, keitou sa ia ga na vosa macala sara:

13ia ka sa sega ni vaka na nona ubia ko Mosese na matana e na pulou, me ra kakua ni vakaraica matua ko ira na luve i Isireli ki nai otioti ni ka e biu tani:

14ia ka sa vakamatabokotaki na lomadra: ni sa tu ga na pulou ko ya ka yacova na siga o qo ni sa wili na veiyalayalati makawa, sa sega ga ni kau tani: ni sai Karisito sa kau tani kina o qo.

15Ia ka sa yacova na siga o qo, ni sa wili ko Mosese, sa tu ga e na lomadra na pulou.

16Ia ni na saumaki o qo vua i na Turaga, ena qai kau tani na pulou.

17Ia sa ka vakayalo ko ya ko na Turaga; ia sa lalaga ko koya, sa tu kina na Yalo ni Turaga.

18Ia koi keda kecega, ni sa tawa tabonaki tiko na matada, eda sa raica na serau ni Turaga me vaka e nai iloilo, ka sa vakamataliataki me da vakataki koya, ni sa tubu cake tiko na serau me uasivi, me vaka e na Turaga o koya sa ka vakayalo ko ya,