II. Vei Ira Na Kai Korinica 1 - AI VOLA TABU（FIJ1864）

A WASE I. —Sa vakavinavinaka vuana Kalou ko Paula e na vukudra na kai Korinica, kei na vukuna talega, 1-11. Sa via raici ira, a sa sega ni yalowai, sa berabera kina ni lako, 12-24.

1O PAULA, nai apositolo i Jisu Karisito e na veitalia ni Kalou, kei Timoci na wekaqu, kivei ira nai vavakoso lewe ni soro ni Kalou mai Korinica, kei ira kecega era sa lotu mai Akaia taucoko:

2Me nomudou na loloma kei na vakacegu mai vua na Kalou ko Tamada, kei na Turaga ko Jisu Karisito.

3Me vakarokorokotaki ko na Kalou, o koya na Tama ni noda Turaga ko Jisu Karisito, a Tama ni loloma, kei na Kalou ni vei vakalecataki kecega;

4o koya sa vakalecataki keda e na neitou rarawa kecega, me keitou vakalecataki ira rawa era sa rarawa e na dua na ka, e na veivakaocataki keitou sa vakalecataki kina mai vua na Kalou.

5Ni sa vaka ni sa yaco vakalevu sara vei keitou na rarawa e na vuku i Karisito, sa vakalecataki keitou vakalevu sara vakakina ko Karisito.

6Ia kevaka keitou sa vakararawataki, sa ka mo dou vakalecataki kina ka vakabulai, ka sa yaco o qo ni dou sa vosota talega na veika rarawa keitou sa vakararawataki kina; se keitou vakalecataki, sa ka mo dou vakalecataki kina ka vakabulai.

7Ia ka sa tu dei na neitoui nuinui e na vukumudou, ni keitou sa kila, ni dou sa vakaitavi e na vakararawataki, sa vaka talega kina e na vei vakalecataki.

8Ni keitou sa sega ni vinakata, oi kemudou na veiwekani, mo dou lecava na neitou rarawa sa yaco vei keitou mai Esia, ni keitou sa toqetoqea vakalevu sara, sa dredre kina na vosota, ka keitou sa sega kina ni dinata ni keitou na bula:

9ia keitou sa vaka ni keitou sa lewai me keitou mate, me keitou kakua ni vakararavi kina vei keitou, vua ga na Kalou sa vakaturi ira cake tale na mate:

10o koya ka vakabulai keitou mai na mate levu ko ya, a sa vakabula tikoga: o koya talega keitou sa vakararavi kina ni na vakabula tikoga;

11ni dou veivuke talega e na masulaki keitou, me lewe vuqa kina era vakavinavinaka e na vuku i keitou, e na vuku ni ka sa soli vei keitou e na vukudra na lewe vuqa.

12Ia o qo na ka keitou sa reki kina, nai tukutuku ni neitou lewa-eloma, ni ka loma e dua bauga, ka loma dina vua na Kalou, na neitoui valavala e vuravura o qo, ka vakalevu sara vei kemudou, sa sega ga e na vuku vakavuravura, a ya ga e na loloma ni Kalou.

13Ni sa sega na ka tani keitou sa vola vei kemudou, o qori ga dou sa wilika se kila; ia kaʼu sa vakadinata ni dou na kila ka yacova nai vakataotioti,

14me vaka na nomudou kilai keitou ga e na ka e so; ni keitou sa nomudou ka mo dou reki kina, me vaka ni dou sa neitou talega, e na siga ni Turaga ko Jisu.

15Ia e na vakadinata o qo kaʼu a nanuma meʼu lako vei kemudou eliu, (me yaco kina vakarua vei kemudou nai solisoli loloma;)

16ka taka vei kemudou ki Masitonia, ka lesu tale mai Masitonia vei kemudou, mo dou kauti au kina e na noqui lakolako ki Jutia.

17Ia ni kaʼu a nanuma me vakaoqo, au sa qai yalowai, se segai? se na ka kaʼu sa nakita, au sa nakita vakavuravura beka, me tu kina vei au na io io, kei na sega sega?

18Ia sa vaka na nona dina na Kalou, sa vakakina ni sa sega ni io kei na sega na neitou vosa vei kemudou.

19Ni sa sega ni io kei na sega na neitou vunautaka vei kemudou na Luve ni Kalou, ko Jisu Karisito, oi keitou kei Silivenu kei Timoci, a sa cakava ga ko koya me io:

20ni sa io na vosa ni yalayala kecega ni Kalou e na vukuna, era sa vakaemeni talega e na vukuna, me vakarokorokotaki ko na Kalou e na vuku i keitou.

21Ia sai koya na Kalou sa vakataudeitaki keitou kei kemudou me da tu vata kei Karisito, a sa lumuti keda;

22o koya talega sa dregati keda, a sa solia na Yalo e na lomada mei matai.

23Ia kaʼu sa kaciva na Kalou me lewa na yaloqu me vaka ni sa dina, ni sa noqu lomani kemudou ga kaʼu sa vakaberaberataka kina na lako ki Korinica.

24Sa sega ni ka ni keitou sa veitaliataka na nomudou vakabauta, ka keitou sa veivuke ga e na nomudou reki: ni sa vakabauta dou sa tu dei kina.