I. Vei Ira Na Kai Korinica 16 - AI VOLA TABU（FIJ1864）

Sa vakarota vei ira koya me ra solia na ka e so vei ira na tamata lotu mai Jutia, era sa dravudravua, 1-9. Sa tukuni Timoci vei ira, a sa vakavulici ira, ka sa qai tinia na nonai vola, 10-24.

1IA e na vuku ni ka sa kumuni vata me nodra era sa lotu, me vaka niʼu sa vosa oti vei ira na veivavakoso lewe ni soro mai Kalatia dou kitaka vakakina koi kemudou talega.

2E nai matai ni siga ni wiki, mo dou dui tugana nai yau e so me karona, me vaka sa vakalougatataki kina ko koya, me kakua kina ni ia na kumuna vata niʼu na lako yani.

3Ia ni kaʼu sa tadu, o iratou dou na vinakata kaʼu na talai iratou me kauta nai vola e so kei na nomudoui loloma talega ki Jerusalemi.

4Ia kevaka sa yaga meʼu lako talega koi au, era na lako vata kei au.

5Ia kaʼu na lako vei kemudou, niʼu na lako-basika e Masitonia: niʼu na lako-basika e Masitonia.

6Ia kaʼu na tiko beka vei kemudou, io, kaʼu na tiko beka vei kemudou e na veivula i liliwa, mo dou kauti au kina e na noqui lakolako ki na vanua kaʼu na lako kina.

7Niʼu sa sega ni via taka vei kemudou e na lako voli o qo; ia kaʼu sa nakita meʼu tiko mada kei kemudou, kevaka sa vinakata ko na Turaga.

8Ia kaʼu na tiko ga mai Efeso me yaco mada na solevu ni kalimasagavulu ni bogi.

9Ni sa dola tu vei au na katuba levu ka yaga, a ra sa lewe vuqa talega na dauveivorati.

10Ia kevaka sa tadu ko Timoci, dou raica me tiko tawa rere vei kemudou; ni sa kitaka ko koya na cakacaka ni Turaga, me vakai au talega.

11O koya me kakua kina na tamata me beci koya: ia mo dou kauti koya voli ga e na vakacegu, me lako mai kina vei au; niʼu sa waraki kova kei iratou na veiwekani.

12Ia e na vuku i Apolosi na wekada, au sa masuti koya vakalevu me ako yani vei kemudou kei iratou na veiwekani: a sa sega sara ni lomana me lako vei kemudou e na gauna o qo; ia ni na gauna vinaka vua, ena qai lako yani.

13Dou vakatawa, dou tu dei e na vakabauta, dou tamata qaqa, dou gumatua.

14Me caka na nomudou ka kecega e na yalololoma.

15Ia kaʼu sa masuti kemudou, na veiwekani, (dou sa kila na mataqali i Sitifana, ni sai sevu kei Akaia, a ratou sa soli iratou me ratou qaravi ira sa lotu:)

16mo dou vakamalumalumutaki kemudou vei ira sa vakaoqo, vei ira yadua talega era sa veivuke, ka daucakacaka.

17Ia kaʼu sa reki ena nodratou lako mai ko Sitifana kei Forituneto kei Akaiko: ni ratou sa cakava na ka sa sega maivei kemudou.

18Ni ratou sa vakaceguya na yaloqu kei na yalomudou talega; o koya mo dou qai kilai ira era sa vakaoqo.

19Sa loloma yani vei kemudou na veivavakoso lewe ni soro mai Esia. Sa loloma vakalevu yani vei kemudou ko Akuila kei Pirisila e na Turaga, kei ira nai vavakoso lewe ni soro e na nodrau vale.

20Era sa loloma yani vei kemudou na veiwekani kecega. Dou ia na loloma vakai kemudou e na veireguci e na yalosavasava.

21Oi au ko Paula, au sa vola na noqu loloma yani.

22Kevaka sa dua sa tawa lomana na Turaga ko Jisu Karisito, me cudruvi ko koya, ni sa lako mai na Turaga.

23Me tiko vei kemudou na loloma ni Turaga ko Jisu Karisito.

24Me tiko vei kemudou kecega na noqu loloma e na vuku i Karisito Jisu. Emeni.