I. Vei Ira Na Kai Korinica 14 - AI VOLA TABU（FIJ1864）

Sa tukuna ko koya ni sa takiveiyaga nai solisoli kecega ni Yalo Tabu, a sa uasivi cake nai solisoli eda yaga kina vei ira na tamata, 1-5. Me kakua ni vosataki e nai vavakoso lewe ni soro na ka sa tawa kilai na kenai balebale, 6-33. Sa tabu ni vunau ko ira na yalewa, 34-40.

1DOU vakasaqara na loloma; dou gadreva talega na veika vakayalo, ka vakalevu mo dou vosa e na Yalo.

2Ia ko koya sa vosa e na dua na vosa tani, sa sega ni vosa vei ira na tamata, vua ga na Kalou; ni sa sega e dua sa kila; a sa cavuta ko koya na veika e vuni e na lomana.

3Ia ko koya sa vosa e na Yalo sa vosa vei ira na tamata mo vakatataki ira, ka vakatavulici ira, ka vakacegui ira.

4Ko koya sa vosa e na dua na vosa tani, sa vakatataki koya ga; ia ko koya sa vosa e na Yalo, sa vakatataki ira nai vavakoso lewe ni soro.

5Ia kaʼu sa vinakata mo dou vosa kecega e na vosa tani e vuqa, ka vakalevu cake mo dou vosa e na Yalo; ni sa uasivi cake ko koya sa vosa e na Yalo vei koya sa vosa e na vosa tani e vuqa, kevaka sa sega ni vakatakila na kenai balebale ko koya, me vakatataki kina ko ira nai vavakoso lewe ni soro.

6Ta sa vakakina, na veiwekani, kevaka kaʼu sa lako vei kemudou ka dauvosa e na vosa tani e vuqa, au na yaga vakacava vei kemudou, kevaka kaʼu sa sega ni vosa talega vei kemudou e nai vakatakilakila, se e na vuku, se e na vosa e na Yalo, se e nai vakavuvuli?

7Ia na veika sa tawa bula ka sa daurorogo, se na bitu-ni-vakatagi se na api, kevaka sa sega ni dui rorogo na domona, ena kilai vakaevei se sa cava nai balebale ni ka sa laga e na bitu-ni-vakatagi se na api?

8Ia kevaka ena rorogo na davui-ni-valu e nai rorogo sa tawa kilai, o cei ena vakarautaki koya mo laʼki valu?

9Sa vakakina koi kemudou, kevaka dou sa sega ni cavuta na vosa sa kilai rawa, ena kilai vakaevei na ka sa vosataki? ni dou na vosa walega ki na cagi.

10E dina beka, ni sa vuqa vakakina na vosa vakatani e vuravura, a sa sega e dua sa tawa vakaibalebale.

11Ia kevaka kaʼu sa sega ni kila nai balebale ni vosa, au na kai tani vua sa vosa, ena kai tani talega vei au ko koya sa vosa.

12Sa vakakina koi kemudou, ni dou sa gadreva na veika vakayalo, dou vakasaqara talega mo dou uasivi cake e na ka sa vakatataki kina ko ira nai vavakoso lewe ni soro.

13Ia ko koya sa vosa e na dua na vosa tani, me masu talega me vakatakila rawa na kenai balebale.

14Io, kevaka kaʼu sa masu e na dua na vosa tani, sa masu na yaloqu ga, ka sa sega ni vua na noqu nanuma.

15Sa qai vakaevei? au na masu e na yaloqu, au na masu e na nanuma talega; au na sere e na yaloqu, au na sere e na nanuma talega.

16Kevaka sa sega ni vakakina, ni ko sa vakavinavinaka e na yalomu ga, ena vakaemeni vakaevei e na nomu vakavinavinaka ko koya sa tiko e na yasana na tamata tawa vuku, ni sa tawa kila na ka ko sa kaya?

17Ni sa dina ga ni ko sa vakavinavinaka vakavinaka, ia ka sa sega ni vakatataki kina ko koya.

18Au sa vakavinavinaka vua na noqu Kalou, niʼu sa uasivi cake vei kemudou kecega e na vosataka na vosa tani e vuqa:

19ia kaʼu sa vinakata vakalevu meʼu vosataka vata kei na noqu nanuma na vosa e lima walega o na kedra maliwa nai vavakoso lewe ni soro, meʼu vakavulici ira na tani talega kina, ka vakalailai na vosa e tini na udolu e na vosa tani.

20Oi kemudou na veiwekani, dou kakua ni gone lailai e na vuku; e na lomaca dou gone lailai ga, ia e na vuku dou tamata bula.

21Sa volai e na vunau, Ko ira sa vosa tani, kei na tebenigusu tani, kaʼu na vosa kina vei ira na tamata o qo; ia ko ira era na sega ga ni rogoci au kina, sa kaya na Turaga.

22A sai vakatakilakila kina na vosa tani e vuqa vei ira sa tawa vakabauta, ia ka sa sega vei ira sa vakabauta; ia na vosa e na Yalo sa sega ni ka vei ira sa tawa vakabauta, vei ira ga sa vakabauta.

23Ia kevaka sa soqoni vata e na dua na yasana nai vavakoso taucoko ni lewe ni soro, a ra sa vosa kecega e na vosa e vuqa, a sa lako mai e so sa tawa vuku, se tawa vakabauta, era na sega li ni kaya dou sa lialia?

24Ia kevaka sa parofisai kecega, a sa lako mai e dua sa tawa vakabauta, se tawa vuku, sa vakadinadina kina vei ira kecega, sa lewai ko koya vei ira kecega:

25a sa vakaraitaki vakakina na veika e vuni e na yalona; ena bale vakatobocu kina, ka masu vua na Kalou, ka na tukuna ni sa dina ni sa tiko vei kemudou na Kalou.

26Sa qai vakaevei, oi kemudou na veiwekani? ni dou sa soqoni vata, sa dui taura yadua na sere, ai vakavuvuli, a vosa tani, ai vakatakilakila, a vakaibalebaletaka Me caka na ka kecega mo dou vakatataki kina.

27Kevaka e dua sa vosa e na vosa tani, me lewe rua ga, se lewe tolu sara, me ra veitaravi yadua ga; ia me dua e vakatakila na kenai balebale.

28Ta kevaka sa sega e dua me vakatakila na kenai balebale, me galu ga e nai vavakoso lewe ni soro; me vosa vua ga vakai koya, vua talega na Kalou.

29Ia me lewe rua se lewe tolu na parofita me vosa, me lewa ga ko ira sa vo.

30Ia kevaka sa vakatakilai e dua na ka vua sa tiko voleka, me galu mada ko koya sa liu.

31Ni sa rawa mo dou parofisai kecega, ia dou ia yadua ga, me vakatavulici kecega, ka vakacegui kecega.

32Ia ka sa dui rawa na yalodra na parofita ko ira na parofita.

33Ni sa sega ni vu ni veisei ko na Kalou, ni vakacegu ga, me vaka ni sa yaco e na nodrai vavakoso kecega era sa lotu.

34Me galu ga ko ira na nomudou yalewa e na veivavakoso lewe ni soro: ni sa sega ni tara vei ira me ra vosa; ia me ra yalomalumalumu ga, me vaka na vosa ni vunau.

35Ia kevaka era sa via kila e dua na ka, me ra dui taroga na watina mai nodratou: ni sa ka e veivakamaduataki me ra vosa na yalewa e nai vavakoso lewe ni soro.

36Ena sai kemudou beka sa lako maikina na vosa ni Kalou? se sa lako mai kivei kemudou ga?

37Kevaka e dua sa vakasami koya ni sa parofita, se tamata vakayalo, me vakatusa ni sai vakaro ni Turaga na veika kaʼu sa vola vei kemudou.

38Ia kevaka e dua sa tawa kila, me kakua ga ni kila.

39O koya o qo, na veiwekani, mo dou qai gadreva mo dou parofisai, kakua talega ni tarova na vosataka na vosa tani o vuqa.

40Me caka matamatavinaka na ka kecega, ka vakadodonu talega.