I. Vei Ira Na Kai Korinica 13 - AI VOLA TABU（FIJ1864）

Sa tukuna ko koya ni sa tawa yaga na vuku, se na vakabauta, se na vosota na; ca, kevaka e sega vei keda na loloma, 1-3. Sa qai tukuna na kenai valavala kei na kena vinaka na loloma, 4-13.

1KEVAKA kaʼu sa vosataka na nodra vosa na tamata kei na agilose, ka sega vei au na loloma, au sa vaka walega na kaukamea sa rorogo, se na lali sa tataqiriqiri.

2Ia kevaka kaʼu sa parofisai rawa, ka kila talega na ka kecega e vuni, kei na vuku kecega; ia kevaka sa tu vei au na vakabauta kecega, meʼu kauta tani kina na veiulu-ni-vanua, ka sega vei au na loloma, au sa ka walega.

3Ia kevaka kaʼu sa vota na noqu ka kecega, ia kevaka kaʼu sa solia na yagoqu me vakamai, ka sa sega vei au na loloma, sa sega ni yaga vei au.

4Sa dauvosota vakadede na loloma, sa yalovinaka; sa sega ni vuvu na loloma; sa sega ni valavala vakaukauwa na loloma, sa sega ni qaciqacia,

5sa sega ni cakava na ka sa tawa kilikili kaya, sa sega ni vakasaqara na ka sa yaga vei koya ga, sa sega ni cudrucudru, sa sega ni daulomaca;

6sa sega ni rekitaka nai valavala ca, a sa rekitaka na dina;

7sa ubia na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.

8Sa sega ni mudu na loloma: ia na parofisai, ena takali ga; na vosa tani e vuqa, ena mudu ga; na vuku, ena takali ga.

9Ni da sa kila vakalailai ga, ia eda sa parofisai vakalailai ga.

10Ia ni na sa yaco na ka taucoko, ena qai takali na ka sa lailai ga.

11Niʼu a gone, au a dauvosa me vaka na gone, au a kila me vaka na gone, au a dauvakanananu me vaka na gone; ia niʼu sa yaco me tamata bula, au sa biuta tani na ka vakagonegonea.

12Io, edaidai eda sa raica me vaka na titiro e nai iloilo buawa; ia emuri, ena vaka na veirai e na matanavotu: edaidai kaʼu sa kila vakalailai ga; ia emuri, kaʼu na kila me vaka niʼu sa kilai.

13Ia o qo, sa tu na vakabauta, nai nuinui, na loloma, a ka o qo e tolu; a sa uasivi cake vei iratou na loloma.