I. Vei Ira Na Kai Korinica 10 - AI VOLA TABU（FIJ1864）

A ka sa yaco vei ira na Isireli eliu, nai vakatakarakara ni ka ni lotu e na gauna o qo, 1-13. Me drotaka na kalou lasu na tamata lotu, 14-22. Me da kakua ni cakava e dua na ka era sa vakacalai kina na tamata lotu, 23-33.

1IA kaʼu sa sega ni vinakata, oi kemudou na veiwekani, mo dou lecava ni ra a tu e ruku ni o ko ira na noda qase kecega, a ra sa lako kecega e loma ni waitui:

2a ra sa papitaisotaki kecega vei Mosese e na o kei na waitui;

3a ra sa kania vata kecega na kakana vakayalo;

4a ra sa gunuva vata kecega na ka-ni-gunu vakayalo: ni ra sa gunu mai na Vatu vakayalo sa muri: ia na Vatu ko ya ko Karisito,

5Ia era sa lewe vuqa vei ira sa sega ni vinakati ira ko na Kalou; ni ra sa duibiubiu e loma ni veikau.

6Ia na veika o qo nai vakatakarakara vei keda, me da kakua kina ni daugadreva na veika ca, me vaka na nodra daugadreva.

7Dou kakua talega ni qarava na matakau, me vakataki ira e so; me vaka ni sa volai, Era sa tiko sobu na tamata me ra kana ka gunu, a ra sa qai tu cake tale mo ra qito.

8Me da kakua talega ni dauyalewa, me vaka era a kitaka e so, a sa bale kina e na siga e dua bau e ruasagavulu ka mani tolu na udolu.

9Me da kakua talega ni dauva-katovolei Karisito, me vaka era sa dauvakatovolea e so, a ra sa vakarusai e na veigata.

10Dou kakua talega ni daudidi, me vaka era sa didi e so, a ra sa vakarusai e na dauveivakarusai.

11Ia na ka kecega o qo sa yaco vei ira mei vakatakarakara: a ra sa volai me da vakatavulici kina, oi keda sa yacovi keda nai vakataotioti ni veigauna.

12O koya me qai vakaraici koya ko koya sa nanuma ni sa tu dei, de bale ga mai.

13Sa sega na dauvere tani sa yaco vei kemudou, a ya ga sa nodra na tamata: ia sa yalodina na Kalou o koya ena sega ni vakalaivi kemudou mo dou dauveretaki vakalevu cake, me vaka ga na nomudou kaukauwa; ena cakava talega kei na dauvere na sala mo dou dro kina, mo dou vosota rawa kina.

14O koya o qo, oi kemudou sa lomani, mo dou qai dro tani mai na qarava na matakau.

15Au sa vosa me vaka vei ira na tamata vuku; dou lewa na ka kaʼu sa kaya.

16A bilo ni vakavinavinaka keitou sa vatonaka, sa sega li ni ka sa noda kina na dra i Karisito? Ai buli madrai eda sa dovia, sa sega li ni ka sa noda kina na yago i Karisito?

17E na vuku ni sa dua bauga na madrai, sa qai yagona e dua bauga koi keda e lewe vuqa, ni sa noda nai votavota ni madrai ko ya e dua bauga.

18Dou raici ira na Isireli vakayago: ko ira era sa kania na veimadrali, sa sega li ni nodra nai votavota vata kei nai cabocabo-ni-soro?

19A cava na ka kaʼu sa kaya? ni sa dua li na ka dina na matakau, se na ka dina na ka sa vakacabori ki na matakau?

20Ia na veika era sa vakacabora ko ira era sa tawa lotu, era sa vakacabora vei ira na tevoro, a sa seira ira vua na Kalou: ia kaʼu sa sega ni vinakata mo dou votai vata kei ira na tevoro.

21Dou sa sega ni gunuva rawa na bilo ni Turaga, kei na nodra bilo talega na tevoro: dou sa sega ni kana rawa e nai kanakana ni Turaga, kei na nodrai kanakana talega na tevoro.

22Eda vakase-cudru vua na Turaga, ne? eda sa uasivi beka vua e na kaukauwa?

23Sa tara ga vei au na ka kecega, a sa sega ni yaga na ka kecega: sa tara na ka kecega, a sa sega ni ka ni vakatataki cake na ka kecega.

24Me kakua e dua me vakasaqara na ka sa yaga vei koya ga, a ya ga vei koya na tani yadua.

25A ka kecega sa volitaki e na rara ni veivoli, mo dou kania, ka kua ni taroga e dua na ka e na vuku ni lewa-eloma:

26ni sa nona na Turaga ko vuravura, kei na ka kecega sa sinai kina.

27Kevaka e dua sa tawa lotu sa sureti kemudou, ka dou sa vinakata me lako, dou kania ga na ka kecega sa viritu e matamudou, ka kua ni veitarogi e na vuku ni lewa-eloma.

28Ia kevaka e dua sa kaya vei kemudou, O qo sa vakacabori ki na veimatakau; dou kakua ni kania e na vuku i koya sa tukuna, e na vuku ni lewa-eloma talega: ni sa nona na Turaga ko vuravura, kei na ka kecega sa sinai kina:

29au sa cavuta na lewa-eloma, ia ka sa sega na nomu, a nona ga nai kadua: ni sa lewai vakacava na noqu veitalia e na lewa-eloma ni dua tani?

30Ia kevaka kaʼu sa kana ka vakavinavinaka kina, meʼu sa vosavakacacataki e na vuku ni cava e na ka kaʼu sa vakavinavinaka kina?

31O koya ga, se dou kana, se dou gunu, koi na ka kecega dou sa kitaka, mo dou qai kitaka kecega me vakarokorokotaki kina na Kalou.

32Dou kakua ni vakacala e dua, sei ira sa Jiu, sei ira sa veimatanitu tani, sei ira nai vavakoso lewe ni soro ni Kalou:

33me vaka kaʼu sa kitaka na ka kecega me vinakata ko ira na tamata kecega, ia kaʼu sa sega ni vakasaqara na ka sa yaga vei au, vei ira ga na lewe vuqa, me ra vakabulai kina.