I. Vei Ira Na Kai Korinica 8 - AI VOLA TABU（FIJ1864）

Sa vosataka ko koya na kania na veika sa vakacabori ki na veimatakau, 1-7. Sa sega ni ca dina vua na Kalou ni ra kania ko ira na tamata lotu, ia ka sa ca kevaka sa vakacalai kina e so sa malumalumu na nodra vakabauta, 8-13.

1IA e na vuku ni veika sa vakacabori ki na veimatakau, eda sa kila ni sa tu vei keda kecega na vuku. Na vuku sa vu ni, qaciqacia, a loloma ga sa vu ni vakatataki cake.

2Ia kevaka c dua sa nanuma ni sa kila e dua na ka, sa sega ni kila e dua na ka me vaka e dodonu me kila.

3Ia kevaka e dua sa lomana na Kalou, sa kilai vua ko koya.

4E na vuku ni kania na veika sa vakacabori ki na veimatakau, eda sa kila ni sa ka wale duaduaga e vuravura na matakau, a sa dua bauga na Kalou ka sega tale e dua tani.

5Io, sa dina ni sa tu na veika era sa vakatokai me kalou, se mai lomalagi se e vuravura, (me vaka ni ra sa lewe vuqa na kalou, ka lewe vuqa talega na turaga,)

6ia vei keda sa dua bauga na Kalou, a Tamada, sa maivei koya na ka kecega, eda sa nona ga koi keda; a sa dua bauga na Turaga ko Jisu Karisito, sa caka kina na ka kecega, a sa nonai tavi koi keda.

7Ia ka sa sega ni nodra kecega na tamata na vuku o qo: io, sa so era sa nanuma ni sa dina na matakau, a ra sa vaka me ra kania na ka sa vakacabori ki na matakau; a sa dukadukali kina na yalodra ni sa malumalumu.

8Ia na kakana sa sega ni ka eda sa vinaka kina vua na Kalou: io, kevaka eda sa kana, eda sa sega kina ni vinaka cake; kevaka eda sa sega ni kana, eda sa sega kina ni ca sobu.

9Ia mo dou raica vinaka de yaco na nomudou veitalia vakaoqo me ka me tarabe kina ko ira era sa malumalumu.

10Io, kevaka e dua sa raici iko sa tu kina na vuku ni ko sa tiko e na vale ni matakau mo kana, ena qai sega li ni doudou cake kina na loma i koya sa malumalumu me kania na veika sa vakacabori ki na veimatakau?

11ia na nomu vuku ena vu li ni nona rusa na wekada sa malumalumu, sa mate kina ko Karisito?

12Ia ni dou sa valavala ca vakaoqori vei ira na veiwekani, ka vakamavoataka na lomadra sa malumalumu, dou sa valavala ca vei Karisito.

13A sa vakakina, kevaka sa tarabe na wekaqu e na kakana, au na sega sara ni kania na lewe ni manumanu ka yacova mada na kenai vakataotioti kei vuravura, de tarabe e na vukuqu na wekaqu.