1IA e na vuku ni veika dou sa vola kina vei au: Sa vinaka vua na tagane me kakua ni veikilai kei na yalewa.
2Ia me kakua ni ia na veibutakoci, me sa bau vakawati na tagane yadua, ka me sa bau vakawati na yalewa yadua.
3Me ia vua na yalewa ko na tagane na ka sa dodonu e na veilomani: me vaka talega kina na yalewa vua na tagane.
4Sa sega ni veitaliataka na yagona na watina-yalewa, a ya ga na watina-tagane: a sa vaka talega kina ni sa sega ni veitaliataka na yagona na watina-tagane, a ya ga na watina-yalewa.
5Dou kakua ni tarova na veikilai vakai kemudou, a ya ga ni; sa vinakata ruarua e na gauna lekaleka, mo dou lalaga ki na lolo kei na masu; ia dou qai veiyacovi tale, de dauveretaki kemudou ko Satani e na vuku ni nomudou dauvei-domoni.
6Ia kaʼu sa vosataka o qo, ni sa tara tu, e sega ni sa vakaroti:
7ni kaʼu sa vinakata me vakataki au na tamata kecega: ia ka sa rawata mai vua na Kalou na tamata yadua nai solisoli e dui yaga, e dua sa vakaoqo, e dua tani tale sa vakakoya.
8Ia kaʼu sa vosataki ira na tawa vakawati kei ira na yada, E yaga vei ira me ra tiko vakakina me vakataki au:
9ia kevaka era sa dredre ni tarovi ira, me ra ia ga na vakawati: ni sa vinaka na vakawati ka ca me rawai e na dodomo.
10Ia kaʼu sa vosataki ira sa vakawati tiko, ia ka sa sega ni vakai au, a ya ga na Turaga, Me kakua ni biuta na watina-tagane na watina-yalewa:
11ia kevaka sa dro, me kakua ni vakawati tale ko koya, se me veivinakati tale kei na watina; me kakua talega ni biuta na watina-yalewa na watina-tagane.
12Ia vei ira ga sa vo kaʼu sa kaya vakai au, sa sega na Turaga: Kevaka e dua na wekada, sa sega ni lotu na watina, a sa via tiko vata kaya na watina, me kakua ni biuta tani.
13Ia me kakua ni dro tani vua na tagane ko na yalewa, sa sega ni lotu na watina, a sa vinakata ga me tiko vata kaya.
14Ni sa vakasavasavataka na watina-tagane sa tawa lotu na watina-yalewa, a sa vakasavasavataka talega na yalewa sa tawa vakabauta na watina-tagane; ia kevaka sa sega ni vakaoqo, era sa tawa-savasava na nomudou gone; ia o qo, era sa savasava.
15Ia kevaka sa dro ko koya sa tawa lotu, me dro ga. Me qai veitalia ga na tagane se na yalewa sa lotu ni sa vakaoqo: ia na tiko vakacegu ga sa kacivi keda kina ko na Kalou.
16Ni ko sa kila vakaevei, o iko na yalewa, se ko na vakabula na watimu, se segai? se ko sa kila vakaevei, o iko na tagane, se ko na vakabula na watimu, se segai?
17Ia me vaka sa solia yadua vei ira na tamata ko na Kalou, me vaka na nona tiko ni sa kacivi koya ko na Turaga, me tiko lako vakakina. Au sa lewa me vakakina e na veivavakoso lewe ni soro kecega.
18Kevaka e dua sa kacivi ni sa cili, me kakua ni biuta na cili. Ke dua sa tawa cili ni sa kacivi, me kakua ni cilivi.
19A ka walega na cili, a ka wale talega na tawa cili, a sa sega ni vakakina na talairawarawa ki nai vakaro ni Kalou.
20Me tiko ga na tamata yadua me vaka na nona tiko ni sa kacivi.
21O sa bobula beka ni ko sa kacivi? kakua ni vuturi kina: ia kevaka e rawarawa mo lalaga, mo vinakata cake:
22ni sa nona na Turaga e na lalaga ko na tamata, o kova sa kaciva ko na Turaga ni sa bobula: sa vaka talega kina ko koya sa lalaga ni sa kacivi, sa bobula vei Karisito.
23Dou sa voli ga e nai voli; dou kakua ga ni nodra bobula na tamata.
24Oi kemudou na veiwekani, me tiko yaduaga na tamata e na mata ni Kalou, me vaka na nona tiko ni sa kacivi.
25Ia e na vukudra era sega ni vakawati, sa sega ni tu vei au na vosa ni Turaga: ia kaʼu sa lewa vakai au ga, me vaka e dua sa rawata na loloma ni Turaga meʼu dina kina.
26A ka o qo kaʼu sa nanuma ni sa yaga e na gauna ni ca o qo, me tiko walega na tamata sa vakakina.
27Sa dua beka na watimu ko sa vauci kina? kakua ni vakatovolea mo sereki tale. Sa sega beka ni dua na watimu, ko sa vauci kina? kakua ni vakasaqara e dua me watimu.
28Ia kevaka ko sa ia na vakawati, ko sa tawa valavala ca kina; ia kevaka sa ia na vakawati na gonealewa, sa sega ni valavala ca kina. Ia ko ira sa vakaoqo ena vakararawataki na yagodra: ia koi au, au sa lomani kemudou.
29Ia na ka o qo kaʼu sa kaya, oi kemudou na veiwekani, Sa vakalekalekataki na gauna sa vo: me vakataki ira kina era sa tawa vakawati ko ira na tagane sa vakawati:
30kei ira era sa tagi, ni e ra vakataki ira era sa sega ni tagi; kei ira era sa reki, me ra vakataki ira era sa tawa reki; kei ira era sa veivoli, me ra vakataki ira sa sega na nodra ka:
31kei ira era sa rekitaka na veika ni vuravura o qo, me ra vakataki ira era sa sega ni rekitaka vakaca: ni sa lako tani yani nai valavala ni vuravura o qo.
32Ia kaʼu sa vinakata mo dou kakua ni lomaocaoca. O koya na tagane sa tawa vakawati sa daunanuma ga ki na veika ni Turaga, se na vinakati koya vakaevei ko na Turaga:
33ia ko koya sa vakawati sa daunanuma ki na veika ni vuravura o qo, se na vinakati koya vakaevei ko na watina-yalewa.
34Sa dua tani na gonealewa kei na yalewa sa vakawati. A yalewa sa tawa vakawati sa daunanuma ki na veika ni Turaga, me savasava tiko na yagona kei na yalona talega: ia ko koya sa vakawati sa daunanuma ki na veika ni vuravura, se na vinakati koya vakaevei ko na watina-tagane.
35Ia na ka o qo kaʼu sa kaya me yaga vei kemudou; au sa sega ni via vakataotaki kemudou, a ya ga ni sa ka e kilikili kei kemudou, mo dou dauqarava na Turaga ka sega ni lomaocaoca.
36Ia me veitalia ga e dua sa nanuma ni sa rogorogo vakaca e na vuku ni nona gonealewa, kevaka sa oti na gauna ni gone, a sa dredre ni tiko wale; sa sega ni valavala ca ko koya: me vakawati ko ira sa vakaoqo.
37Ia ko koya sa tu dei sara na lomana, a sa sega ni dredre vua me tiko wale, a sa rawata ga na yalona, a sa lewa ga e na yalona me taura tiko na nona gonealewa, sa caka vinaka.
38Sa vakaoqo, o koya sa solia me vakawati sa caka vinaka; ia ko koya sa tawa solia me vakawati sa caka vinaka cake.
39Sa vauca na watina-yalewa na vunau, ni sa bula tiko na watina-tagane; ia kevaka sa mate na watina, sa qai tara me ia tale na vakawati vua na tagane sa vinakata ko koya; vua ga sa nona na Turaga.
40Ia sa noqu lewa ni sa kalougata cake ko koya kevaka sa tiko ga vakakoya: ia kaʼu sa vakasama talega ni sa tiko vei au na Yalo ni Kalou.
Who We AreWhat We EelieveWhat We Do
2025 by iamachristian.org,Inc All rights reserved.
