I. Vei Ira Na Kai Korinica 5 - AI VOLA TABU（FIJ1864）

Sa vunauci ira ko Paula ni ra sa sega ni madua ni sa dua vei ira sa valavala ca sara, 1-5. E vinaka me da kakua ni veitokani kei ira na tamata ca, se muri ira era sa lotu ka valavala ca tiko; e vinaka me tawasei tani na tamata sa vakakina, 6-13.

1SA rogo sara ni sa dua vei kemudou sa dauyalewa, ia na dauyalewa ko ya sa sega ni vosataki vei ira era sa tawa lotu, ni sa dua sa taura na wati i tamana.

2Ia dou sa qaciqacia, ka sega ni tagi, me kau tani kina vei kemudou ko koya sa kitaka na cakacaka o qo.

3Ia koi au, niʼu sa yali vakayago, a sa voleka kina na yaloqu, au sa lewai koya oti sa cakava na ka o qo, me vaka kaʼu sa tiko kina,

4e na yaca ni noda Turaga ko Jisu Karisito, ni dou sa soqoni vata tu, kei na yaloqu, kei na kaukauwa ni noda Turaga ko Jisu Karisito,

5me soli koya sa vakaoqo vei Satani me vakarusai kina na yagona, me vakabulai na yalona e na siga ni Turaga ko Jisu.

6Sa sega ni vinaka na nomudou vosa doudou. Dou sa sega beka ni kila ni sa dauvakalevenitaka nai buli taucoko na leveni lailai?

7O koya mo dou qai vuya laivi tani na leveni makawa, mo dou yaco kina mei buli vou, me vaka ni dou sa tawa vakalevenitaki. Ni sa vakamatei oti e na vukuda na noda lako-sivia, io, ko Karisito.

8O koya me da qai ia na solevu, me kakua ga e na leveni makawa, se na leveni ni yaloca, kei nai valavala ca; a ya ga e na yalosavasava kei na yalodina sa tawa vakaleveni.

9Au a vola vei kemudou e nai vola mo dou kakua ni dautiko vata kei ira na dauyalewa:

10ia ka sa sega ga vei ira na dauyalewa ni vuravura o qo, se vei ira na daukocokoco, se na daukovekove, se na dausoro ki na matakau; ni sa yaga vakakina mo dou lako tani e vuravura.

11Ia o qo ga, kaʼu sa vola vei kemudou, mo dou kakua ni dautiko vata kei na dua sa vakatokai me wekada, o koya sa dauyalewa tiko, se daukocokoco, se dausoro ki na matakau, se dauveivakasewasewani, se daumateni, se daukovekove: mo dou kakua ni kana vata kaya sa vakakina.

12Ni sa noqui tavi beka meʼu lewai ira era sa tawa curu? sa sega li ni ko ira era sa curu dou sa lewa?

13Ia ko ira sa tawa curu sa lewa ko na Kalou. O koya mo dou qai kauta tani vei kemudou na tamatai valavala ca ko ya.