I. Vei Ira Na Kai Korinica 4 - AI VOLA TABU（FIJ1864）

E dodonu me da vakarokorokotaki ira nai talatala i Karisito 1-7. O iratou nai apositolo eratou sa vakararawataki vakalevu; ia sai iratou ga sa tamadra vakayalo na kai Korinica, a sa dodonu me ra muri iratou, 8-21.

1ME vakasami keitou na tamata yadua, ni keitou sa nona tamata cakacaka ko Karisito, kei nai talatala e na veika vuni ni Kalou.

2Ia sa kilikili kei ira nai talatala, me ra kune ni ra tamata dina.

3Ia sa ka lailai sara vei au mo dou lewai au, se me ra lewai au na tamata; io, au sa sega dina ni lewai au vakai au.

4Niʼu sa sega ni beitaka e dua na ka vei au; ia kaʼu sa sega ni vakadonui kina: ia ko koya ga sa lewai au ko na Turaga.

5O koya mo dou qai kakua ni lewa taumada e dua na ka, ka malua me lako mada mai na Turaga, o koya ena vakaraitaka na veika vuni ni butobuto, ena vakavouya talega na nanuma ni yaloda: ia ena qai dokai na tamata yadua mai vua na Kalou.

6Ia na veika o qo, kaʼu sa vakabaleta vei keirau kei Apolosi e na vukumudou, na veiwekani; mo dou vakatavulici kina maivei keirau me kakua ni uasivia na ka sa volai tu na nomudou lewa, mo dou kakua kina ni qaciqacia e na vukuna e dua, ka beca e dua tani.

7Io, ko cei sa qisi iko mo uasivi cake? se a cava sa tu vei iko sa tawa soli vei iko? ia kevaka sa soli vei iko, o sa qaciqacia e na vuku ni cava, me vaka ni sa tawa soli vei iko?

8Dou sa qai mamau, dou sa qai vutuniyau, dou sa vakataki ira na tui ni keitou sa takali: ia kaʼu sa vinakata kevaka dou sa lewa dina, me datou lewa vata talega kei kemudou.

9Ia kaʼu sa nanuma ni sa lesi keitou nai apositolo ko na Kalou me keitou muri sara, me keitou vakataki ira era sa lesi me mate: ni keitou sa vakasesevotuni ki vuravura, vei ira talega na agilose, kei ira na tamata.

10Keitou sa lialia e na vuku i Karisito, ia koi kemudou dou sa vuku ni dou sa tu vata ga kei Karisito; keitou sa malumalumu, ia dou sa kaukauwa; dou sa vakarokorokotaki, ia keitou sa beci.

11Ka yacova na gauna o qo keitou sa viakana, ka viagunu, ka luvawale, ka vakararawataki, ka sega na neitoui tikotiko;

12a keitou sa oca, ni keitou sa daucakacaka e na liga i keitou: ni keitou sa vakasewasewani, keitou sa vosavinaka; ni keitou sa vakacacani, keitou sa vosota:

13ni keitou sa vosavakacacataki, keitou sa vakatamamasu ga: keitou sa yaco me vaka na soqosoqo ni vuravura o qo, io, na duka sa quaraki mai na ka kece, ka yacova na siga edaidai.

14Au sa sega ni vola na veika o qo me vakamaduataki kemudou, ia kaʼu sa vakatavulici kemudou ni dou sa vakai ira na noqu gone ni toko.

15Io, kevaka sa udolu vakatini na nomudoui vakavuvuli vei Karisito, sa sega ni lewe vuqa na tamamudou; niʼu sa vakasikavi kemudou mo dou nei Karisito Jisu e nai tukutuku-vinaka.

16O kova kaʼu sa masuti kemudou kina, mo dou vakadamurimuri au.

17Au sa talai Timoci vei kemudou e na vuku ni ka o qo, o koya na noqu gone ni toko ka yalodina e na Turaga, ia ena vakasa e na lomamudou ko koya na noqui valavala vei Karisito, me vaka na ka kaʼu sa vakatavulica e na veiyasana kece e na veivavakoso lewe ni soro kecega.

18Sa qaciqacia ko ira e so, me vaka niʼu na tawa lako yani vei kemudou.

19Ia kaʼu na lako vakasauri vei kemudou, kevaka sa vinakata na Turaga, ia kaʼu na sega ni kila na nodra vosa era sa qaciqacia, a ya ga na kaukauwa.

20Ni sa sega ni ka e na vosa walega na matanitu ni Kalou, o ya ga e na kaukauwa.

21A cava dou sa vinakata? meʼu na lako vei kemudou niʼu sa taura na kuita, se e na loloma, kei na yalo malua?