I. Vei Ira Na Kai Korinica 3 - AI VOLA TABU（FIJ1864）

Sa tukuna vei ira ko koya ni ra sa gone lailai ga e na lotu, 1-4. Era sa vaka nai vakatau-ni-were ko ira era sa dauvunau, ka sa vaka na matai ni vale, ia na yavu ni vale ko Jisu, 5-15. E dodonu me yalosavasava ko ira sa lotu, 16, 17; a sa ka sesewa vua na Kalou na vuku vakavuravura, 18-23.

1IA koi au, au sa sega ni vosa rawa vei kemudou, na veiwekani, me vaka vei ira era sa vakayalo, me vaka vei ira era sa vakayago ga, me vaka vei ira era sa gone lailai e na tu vata kei Karisito.

2Au sa vagunuvi kemudou e na wai-ni-sucu, ia ka sega e na kakana dina; ni dou a sega ni rawata, edaidai talega dou sa sega ni rawata.

3Ni dou sa vakayago tiko ga: dou sa sega li ni vakayago tu ka valavala vakatamata, ni sa tu vei kemudou na vuni, kei na veileti, kei na veisei?

4dou sa sega li ni vakayago, ni sa kaya tiko e dua, Oi au sa nei Paula; ka dua tani, Oi au sa nei Apolosi?

5Ia ko cei ko Paula, se ko cei ko Apolosi, ai talatala walega dou sa vakabauta e na vukudrau, me vaka ni sa solia ko na Turaga ki na tamata yadua?

6Sa tea koi au, sa vakasuasuataka ko Apolosi; ia na Kalou ga sa vakatubura.

7A sa ka wale kina ko i koya sa tea, kei koya sa vakasuasuataka; a sa sega ni vakakina na Kalou, o koya sa vakatubura.

8Erau sa tautauvata sara ko koya sa tea kei koya sa vakasuasuataka: ia na tamata yadua ena rawata na kenai sau me vaka na nona cakacaka.

9Ni da sa daucakacaka vata kei koya na Kalou; dou sa were ni Kalou, dou sa vale ni Kalou.

10Me vaka na loloma ni Kalou sa soli mai vei au, me vaka na matai ni vale sa vuku, au sa viritaka na yavu, a sa tara kina e dua tani. Ia na tamata yadua me sa raica vinaka nai valavala ni nona tara kina.

11Ni sa sega ni rawata e dua na tamata me viritaka e dua tani tale na yavu, a ya ga sa viritaki tu, o koya ko Jisu Karisito.

12Ia kevaka e dua na tamata sa tara cake e na yavu o qo na koula, na siliva, na vatu dredre, na kau, na co malai, se na tolo ni sila;

13ena vakatakilai na cakacaka ni tamata yadua: ni na vakatakila mai na siga ko ya, ni na vakatakilai e na buka waqa; ia na buka waqa ena vakatovolea na cakacaka ni tamata yadua so sa vakaevei na kenai valavala.

14Kevaka sa tu dei na nona cakacaka e dua na tamata, a ya sa tara cake ko koya, ena rawata na kenai sau.

15Kevaka ena vakamai na nona cakacaka e dua na tamata, ena vakadravudravuataki ko koya; ia ko koya ga ena vakabulai; ia e vaka ga mai na buka waqa.

16Dou sa sega beka ni kila ni dou sa vale ni Kalou, a sa tiko vei kemudou ko na Yalo ni Kalou?

17Kevaka e dua na tamata sa vakacacana na vale ni Kalou, ena vakacacani koya ko na Kalou; ni sa savasava na vale ni Kalou, ia sai kemudou o qori.

18Me kakua e dua e vakaisini koya vakai koya, Kevaka e dua vei kemudou sa nanuma ni sa vuku vakavuravura, me sesewa mada mai ko koya me vuku mai kina.

19Ni sa ka sesewa vua na Kalou na vuku ni vuravura o qo. Ni sa volai, Sa rawai ira na vuku ko koya e na nodrai lawaki.

20Ka vaka tale, Sa kila ko Jiova na nodra nanuma na vuku, ni sa tawa yaga.

21O koya o qo me kakua kina e dua me vosa doudou e na vukudra na tamata. Ni sa nomudou na ka kecega;

22se ko Paula, se ko Apolosi, se ko Kifa, se ko vuravura, se na bula, se na mate, se na veika sa tu edaidai, se na veika ena yaco emuri; sa nomudou o qori kecega;

23ia dou sa nei Karisito; ia sa nona na Kalou ko Karisito.