I. Vei Ira Na Kai Korinica 2 - AI VOLA TABU（FIJ1864）

Sa tukuna ko koya ni sa sega ni vunau e na vuku vakavuravura, 1-5; a sa vuku ga na nona vunau ni sa vukei koya na Yalo Tabu, 6-13; a sa sega kina ni kila na kenai balebale ko koya sa sega ni yalovou, 14-16.

1IA koi au, niʼu sa lako mai vei kemudou, na veiwekani, au sa sega ni lako mai e na vosa vinaka se na vuku, niʼu sa tukuna vei kemudou na vosa sa tukuni kina na Kalou.

2Ni sa dei na yaloqu meʼu kakua ni kila e dua na ka tani e na kemudou maliwa, o Jisu Karisito duaduaga, kei na nona lauvako ki na kauveilatai.

3Ia kaʼu a tiko vata kei kemudou e na malumalumu, kei na rere, kei na sautaninini levu.

4Ia na noqu vosa, niʼu sa vunau, sa sega ni ia e na vosa vakaveitemaki ni vuku vakatamata, a sa ia e na vakadinadinataki ni Yalo, kei na cakamana:

5me kakua kina ni tu na nomudou vakabauta e na nodra vuku na tamata, a ya ga e na kaukauwa ni Kalou.

6Ia keitou sa tukuna na vuku e nodra maliwa era sa yalomatua sara: a sa sega ga na vuku ni vuravura o qo, se na nodra na turaga ni vuravura o qo, a ya sa yaco me ka wale:

7ia na vuku ni Kalou ga, keitou sa tukuna e na ka vuni, io, o qori ka vunitaki eliu, a ya ka lesia ko na Kalou ni sa tawa caka ko vuravura me da vakalougatataki kina;

8ia ka sa sega e dua na turaga ni vuravura o qo sa kila: ni ra sa vakota ki na kauveilatai na Turaga vakaiukuuku e na vuku ni ra sa sega ga ni kila.

9Ia ka sa vaka nai vola, Sa sega na mata sa kunea, se na daliga sa rogoca, se na loma ni tamata sa curu kina, na veika sa vakarautaka ko na Kalou me nodra era sa lomani koya.

10Ia vei keda ga sa vakatakila mai ko na Kalou e na Yalona; ni sa dauvakasaqara na ka kecega ko na Yalo, io, na veika titobu ni Kalou.

11Io, ko cei na tamata sa kila na veika ni tamata, a yalo ni tamata ga a ya sa tiko e lomana? sa vaka talega kina na veika ni Kalou sa sega e dua sa kila, sa kila ga ko na Yalo ni Kalou.

12Ia eda sa sega ni rawata na yalo ni vuravura, ko na Yalo ga sa mai vua na Kalou; me da kila kina na veika sa solia walega mai vei keda ko na Kalou.

13A veika o qori keitou sa tukuna talega, ia ka sa sega ga e na vosa sa vakatavulica ko na vuku ni tamata, a ya ga sa vakatavulica ko na Yalo Tabu; ni keitou sa vakarautaka vata na veika vakayalo kei na veika vakayalo.

14Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua: a sa tawa kila rawa ko koya, e na vuku ni sai koya ga na Yalo sa kilai kina o qori.

15Ia ko koya sa vakayalo sa kila na ka kecega, a sa sega e dua sa kilai koya.

16Io, ko cei sa kila na loma ni Turaga, me vakatavulici koya kina? Ia eda sa rawata na loma i Karisito.