I. Vei Ira Na Kai Korinica 1 - AI VOLA TABU（FIJ1864）

A WASE I. —Sa vakatekivuna na nonai vola ko Paula e na vosa ni loloma kei na vakavinavinaka, 1-9; a sa vunauci ira ni ra sa dauveileti, a sa vakavulici ira me ra veilomani, 10-16; me ra kakua ni dokai ira walega na tamata, ka me ra vakavinavinaka ga vua na Kalou, 17-31.

1O PAULA, sa kacivi mei apositolo i Jisu Karisito, e na veitalia ni Kalou, kei Sosiceni na wekaqu,

2vei ira nai vavakoso lewe ni soro ni Kalou era sa tiko mai Korinica, vei ira sa tu vata kei Karisito Jisu ka vakasavasavataki, era kacivi me ra yalo savasava, kei ira kecega e na veiyasana kecega era sa masuta na yaca i Jisu Karisito na noda Turaga, io, na noda kei na nodra talega:

3Me yaco vei kemudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

4Au sa vakavinavinaka e na veisiga vua na noqu Kalou e na vukumudou, e na vuku ni loloma ni Kalou sa soli vei kemudou vei Karisito Jisu;

5nr dou sa vakavutuniyautaki e na ka kecega e na vukuna, e na vosa kecega, kei na vuku kecega;

6me vaka ni sa vakadinadinataki vei kemudou nai tukutuku kei Karisito:

7ka dou sa sega kina ni uasivi sobu e na dua nai solisoli vakayalo: ni dou sa waraka na vakarairaitaki ni noda Turaga ko Jisu Karisito:

8o koya ena vakataudeitaki kemudou me yaco na kenai vakataotioti, mo dou tawa cala e na siga ni noda Turaga ko Jisu Karisito.

9Sa dina na Kalou, o kova sa kacivi kemudou mo dou nonai tokani na Luvena ko Jisu Karisito na noda Turaga.

10IA kaʼu sa vakamasuti kemudou, na veiwekani, e na yaca ni noda Turaga ko Jisu Karisito, mo dou tauvata kecega e na vosa, ia mo kakua vei kemudou na veisei; mo dou veivinakati sara ni dou sa lomavata ka lewa vata.

11Ni sa tukuni kemudou mai vei au, kemudou na veiwekani, ko ira e na mataqali i Kiloi, ni dou sa dauveileti vakai kemudou.

12Ia na ka o qo kaʼu sa kaya, ni dou sa kaya yadua, Oi au sa nei Paula; ia, Oi au sa nei Apolosi; ia, Oi au sa nei Kifa; ia, Oi au sa nei Karisito.

13Sa tawase beka ko Karisito? sa vakoti beka ki na kauveilatai e na vukumudou ko Paula? se dou sa papitaisotaki beka e na yaca i Paula?

14Au sa vakavinavinaka vua na Kalou niʼu sa sega ni papitaisotaka e dua vei kemudou, oi rau ga ko Kirisipo kei Keio;

15de dua e kaya ni kaʼu sa veipapitaiso e na yacaqu.

16Au sa papitaisotaki ira talega na mataqali i Sitefana: ia kaʼu sa sega ni nanuma ni kaʼu sa papitaisotaka e dua tani tale.

17Ni sa sega ni talai au ko Karisito meʼu veipapitaisotaki, a ya ga meʼu vunautaka nai tukutuku-vinaka: ia ka sega ga e na vosa sa vuku, de vakatawayagataki kina na kauveilatai i Karisito.

18Ni sa ka lialia vei ira sa rusa na vunautaka na kauveilatai; ia sa kaukauwa ga ni Kalou vei keda sa vakabulai.

19Ni sa volai, Au na vakarusa na nodra vuku era sa dauvuku, ka vakatawayagataka na nodra yalomatua era sa dauyalomatua.

20Evei na vuku? evei na vu-ni-vola? evei na dauveileti ni vuravura o qo? sa sega beka ni vakalialiataka ko na Kalou na vuku ni vuravura o qo?

21Io, ni sa vuku tu ko na Kalou, a ra sa sega ni kila na Kalou na kai vuravura e na nodra vuku, sa qai vinakata ko na Kalou me vakabulai ira era sa vakabauta, e na vosa vakalialia.

22Ni ra sa taroga e dua nai vakatakilakila ko ira na Jiu, a ra sa vakasaqara na vuku ko ira na kai Kirisi;

23ia keitou sa vunautaki Karisito ni sa lauvako ki na kauveilatai, a ka era sa tarabe kina ko ira na Jiu, kei na ka lialia vei ira na kai Kirisi:

24ia vei ira ga era sa kacivi, se ra Jiu se ra kai Kirisi, ko Karisito na kaukauwa ni Kalou, kei na vuku ni Kalou.

25Ni sa vuku na sesewa ni Kalou me uasivi ira na tamata; a sa kaukauwa na malumalumu ni Kalou me uasivi ira na tamata.

26Ni dou sa raica, na veiwekani, na kenai valavala ni dou sa kacivi, ni sa sega ni lewe vuqa era sa vuku vakayago, sa sega ni lewe vuqa era sa kaukauwa, sa sega ni lewe vuqa era sa turaga:

27ia na veika vakalialia e vuravura, sa digitaka ko na Kalou me vakamaduataki ira na vuku; ia na veika sa malumalumu e vuravura sa digitaka ko na Kalou me vakamaduataka na veika sa kaukauwa;

28kei na veika e vaka na kaisi e vuravura, kei na veika e beci, sa digitaka ko na Kalou, kei na veika sa sega walega, me vakarusa na veika sa tu dei;

29me kakua kina na tamata me qaciqacia e matana.

30Ia maivei koya ga dou sa tu vata kina kei Karisito Jisu, o koya sa cakava ko na Kalou vei keda me vu ni vuku, kei na vu ni vakadonui, kei na vu ni vakasavasavataki, kei na vu ni bula;

31me yaco kina na ka sa volai, O koya sa vosa doudou, me vosa doudou e na vuku ni Turaga.