Ai Vola I Osea Na Parofita 12 - AI VOLA TABU（FIJ1864）

Era sa vunauci ruarua na Ifireimi kei na Juta, 1, 2. Ai valavala i Jekope na nodra qase sa tukuni vei ira me ra vakamuria, 3-6. A nodrai valavala vakailasu, na Ifireimi na vu ni nodra cudruvi, 7-14.

1O IRA na Ifireimi era sa kana cagi, io, era sa muria na cagi mai cake: e na veisiga kecega era sa kuria na vosa lasu kei na vakacaoa; ia na veiyalayalati sa ra ia kei ira na kai Asiria, a waiwai talega sa kau ki Ijipita.

2Sa dua talega na ka e veiletitaka kei Juta ko Jiova, ia ena cudruvi Jekope ko koya me vaka na nonai valavala; ka vaka na nona cakacaka ena sauma kina vua.

3E na kete i tinana ka taura ko koya na bukubuku ni yava i tuakana, ia ni sa kaukauwa ko koya sa rawai koya na Kalou:

4io, sa rawai koya na agilose ko koya, a sa gumatua: sa tagi ko koya, ka vakamamasu vua: ia mai Peceli ka kunei koya ko koya, maikea talega ka vosa kina vei keda;

5io, ko Jiova na Kalou ni lewe vuqa; sai Jiova na yacana e daukilai kina.

6Ia ko iko, mo lesu mai kina vua na nomu Kalou: nai valavala loloma ka dodonu mo vakabauta, ka waraki koya tikoga na nomu Kalou.

7Sa dua na dauveivoli ko koya, e ligana sai vakarau ni bibi daulasu e tu kina: sa vinakata me ia na veivakasaurarataki.

8A sa kaya ko Ifireimi, Au sa vutuniyau ga, au sa rawata ga e so na noqui yau: e na noqu cakacaka kecega era na tawa kunea vei au na caka cala mei valavala ca.

9Ia sai au ko Jiova na nomu Kalou mai na vanua ko Ijipita, kaʼu na vakatikori iko tale e na vale malo, me vaka e na siga ni so tabu.

10Au a vosa talega e na gusudra na parofita, ia koi au, kaʼu a vakalevutaka na raivotu, e na gusudra talega na parofita kaʼu a ia na vosa vakatautauvata.

11Sa tu beka mai Kiliati na caka cala? era sa yaco ga me lasu wale: mai Kilikali era sa vakamatea na karavau mei soro; io, na nodrai cabocabo-ni-soro sa vaka nai kelekele vatu e na bati ni tova ni veiwere.

12A sa dro ko Jekope ki na vanua ko Siria, io, sa ia na veiqaravi ko Isireli me dua kina na watina, ia me dua na watina sa vakatawa kina na sipi.

13Ia e na dua na parofita sa kauti ira na Isireli mai Ijipita ko Jiova, e na dua na parofita talega sa ra vakatawai kina.

14Sa ra ia na Ifireimi na veivakacudrui vakararawa sara: a kedra dra ena laivi tu kina vei ira, a nodrai rogorogo ca talega ena vakasuka vei ira ko koya na nodra Turaga.