Ai Vola I Osea Na Parofita 7 - AI VOLA TABU（FIJ1864）

Sa tukuna tiko ko Osea na nodrai valavala ca na Isireli, kei na nodra cudruvi kina, 1-16.

1NIʼU a kauti ira tale mai na noqu tamata era vakabobulataki, niʼu a vakabulai ira na Isireli, sa qai vakavotuni mai na caka cala nei Ifireimi, kei na ca nei Samaria: ni ra sa cakacaka vakailasu; ia na daubutako sa curu mai, a ra ia na veivakacacani maitautuba na matadaubutako.

2A ra sa tawa vaka e lomadra ni sa nodra ca kece kaʼu sa nanuma ga: sa qai vakavolivoliti ira na nodra cakacaka: sa tu ga e mataqu.

3E na nodra ca era sa vakamarautaki koya kina na tui, kei ira na turaga e na nodra vosa lasu.

4O ira kece era sa ia na veibutakoci, era sa vaka na lovo sa visa na dauvavi madrai, o koya sa cegu ni vakalakalataka ni sa natuka oti na madrai, me vakalevenitaki mada.

5E na siga ni noda tui era sa tauvi mate kina na turaga ni ra katakata e na waini; sa dodoka na ligana ko koya kei ira na dauveivakalialiai.

6Ni ra torova, ka vaka na lovo na lomadra, sa ra lawavaka tiko: sa moce ka sigavaka na nodra dauvavi madrai; e na mataka sa waqa mai ko koya me vaka na buka caucaudre.

7Era sa katakata kece me vaka na lovo, a ra sa kati ira na nodra dauveilewai; o ira kece na nodra tui sa ra bale: sa sega e dua vei ira e masu vei au.

8O ira na Ifireimi, sa ra veiwaki-taki ira vata kei na veimataqali; o ira na Ifireimi, sa ra buli madrai e tawa vukici.

9O ira na kai tani sa kania na nodra kaukauwa, a ra sa sega ni kila ko ira: io, sa sikasika mai e so na tiki ni uludra, a sa sega ni kila ko ira.

10Ia na nodra viavialevu na Isireli sa tukuni ira e na matanavotu: a sa sega ga ni ra saumaki vei Jiova na nodra Kalou, se vakasaqarai koya e na vuku ni ka kecega o qo.

11Ia ko ira na Ifireimi era sa vaka na ruve sesewa e tawa vakayalo: era tagitagi ki Ijipita, era lakovi Asiria.

12Ni ra lako, au na tevuka na noqu lawa me rawai ira; me vaka sa manumanu ni lomalagi au na kauti ira sobu; au na vakanakuitataki ira, me vaka ni sa rogoci e na nodrai soqosoqo.

13Ule ko ira! ni ra sa dro tani vei au: a ca ga ena tauvi ira! ni ra sa talaidredre vei au: ia koi au, kaʼu a vakabulai ira, a ra sa lasutaki au ga.

14Io, sa ra tawa tagi vei au e na vu ni lomadra, ni ra qoqolou koto e na nodrai davodavo: e na vuku ga ni sila kei na waini era sa soqoni vata kina, era sa vuki tani vei au.

15Ia koi au, kaʼu a vakavulici ira ka vakaukauwataka na ligadra, ia vei au era sa vakananuma na vere ca.

16Era na saumaki, ka sega vua sa Cecere: era sa vaka na dakai daulasu: ena bale e nai seleiwau ko ira na nodra turaga e na vuku ni cudru ni yamedra: a ka o qo era na vakalialiai kina e na vanua ko Ijipita.