Ai Vola I Osea Na Parofita 8 - AI VOLA TABU（FIJ1864）

Era na cudruvi e na vuku ni nodra dautalaidredre vua na Kalou, kei na nodra dauqarava na kalou lasu, 1-14.

1TARA na davui ki gusumu, ka kaya, Ena lako mai ko koya, me vaka na ikeli, ki na vale i Jiova, e na vuku ni ra sa vakacacataka na noqu veiyalayalati, ia ki na noqu vunau era sa talaidredre kina.

2Era na dui tagici au na Isireli, Noqu Kalou, keitou sa kilai iko.

3Sa ra biuta na Isireli na ka sa vinaka: ena vakasavi ira na meca.

4Era sa bulia e so na tui, ka sega ni vu vei au: era sa lesia na turaga, ka sega ni kaʼu kilai ira: e na nodra siliva kei na nodra koula era sa cakava na matakau me nodra, ka me ra muduki laivi ga kina.

5Sa biuti iko na nomu luve ni karavau, Samaria, sa waqa mai na noqu cudru vei ira: e bogi vica mada me ra qai savasava mai?

6Ni sa vu vei ira na Isireli na ka o qori talega: o koya na matai sa cakava; a sa sega ni Kalou: ia ena vorolaki ga na luve ni karavau ni Samaria.

7E na vuku ni sa cagi era sa kaburaka, sa covulaca ga era na tamusuka: sa sega na tolona: ena sega ni vuataka na madrai droka: ke vuataka mai, ke sai ira ga na kai tani era na tiloma.

8Sa tilomi ko ira na Isireli: sa ra qai yaco o qo e na veimatanitu me ra vaka nai yaya e tawa vinakati.

9Ni ra sa qai lako cake ki Asiria, me vaka na asa kila e dua bauga: o ira na Ifireimi sa ra volia na veitau.

10Ia ni ra sa volia e so na matanitu, kaʼu na qai vakasoqoni ira, a ra na rarawa vakalailai mada, ni ra colacola vua na nodra, tui na turaga.

11E na vuku ni sa vakavuqataka ko ira na Ifireimi nai cabocabo-ni-soro me ia nai valavala ca, ena yaco nai cabocabo-ni-soro vei ira me vu ni valavala ca.

12Au sa vola me nodra na ka e vuqa e na noqu vunau, sa nanumi ga me ka tani.

13Ia mei soro e cabori vei au, era sa vakacabora na lewe ni manumanu, ka kania; sa sega ni vakadonui ira ko Jiova; sa na qai nanuma o qo na nodra caka cala, ka cudruva na nodrai valavala ca: era na lesu tale ki Ijipita.

14Ia ko ira na Isireli, ni ra sa guilecavi Koya ka Buli ira, a ra sa tara bure kalou; ia ko ira na Juta, ni ra sa vakavuqataka na koro kaukauwa: kaʼu na biuta kina na buka ki na nodra Veikoro, ena vakama talega na nodra vale vakaturaga.