1E NAI matai ni yabaki i Tario na luve i Easiverosi, na kawa ni kai Metia, o koya ka buli me tui ni matanitu ni kai Kalitea;
2e nai matai ni yabaki ni nona lewa, oi au ko Tanieli, kaʼu a kila mai nai vola nai wiliwili ni yabaki, a ya sa yaco kina na vosa vei Jeremaia na parofita, ni na taucoko e vitusagavulu na yabaki ka lala tu ga ko Jerusalemi.
3Ia kaʼu a vaqara na mataqu vua na Turaga na Kalou, meʼu vakasaqarai koya e na masumasu, kei na kere loloma, e na lolo, kei nai sulu taqarotu, kei na dravusa:
4ia kaʼu a masu vei Jiova na noqu Kalou, ka ia na noqu vakatusa, ka kaya, Turaga, na Kalou levu ka rerevaki, sa vakabauta tiko na veiyalayalati kei na loloma vei ira sa lomani koya, kei ira sa vakabauta na nona vunau;
5keimami sai valavala ca, ka cala, ka caka ca, ka talaidredre, ni keimami sa lesu tani mai na nomu vunau kei na nomu lewa;
6keimami sa sega talega ni vakarorogo vei ira na nomui talatala na parofita, era vosa e na yacamu vei ira na neimami tui, kei na neimami turaga, kei na neimami qase, kei ira kecega na lewe ni vanua.
7Sa nomu, Turaga, na cakacaka dodonu, a sa neimami na mata madua, me vaka e na siga o qo; io koi keimami na kai Juta kei na lewe i Jerusalemi, kei na Isireli kecega, ko ira sa voleka, kei ira sa yawa; e na veivanua kece ko sa dui vakasevi ira kina, e na vuku ni nodra talaidredre era sa talaidredre kina vei iko.
8Io, Turaga, sa neimami na mata madua, ko ira na neimami tui, kei na neimami turaga, kei na neimami qase, e na vuku ni keimami sai valavala ca vei iko.
9Sa nei koya na Turaga na neimami Kalou na yalololoma kei na dauveivakadonui, ka ni keimami sa talaidredre ga vua;
10ka sega talega ni vakarorogo ki na domo i Jiova na neimami Kalou, me muria na nona vunau, sa tauca vei keimami e na gusudra na nonai talatala na parofita.
11Ia ko ira kece na Isireli era sa talaidredre ga ki na nomu vunau, ni ra sa lesu tani, me kakua ni vakarorogo ki na domomu; o koya o qo sa sovaraki kina vei keimami na cudru kei na vosavavakini sa volai e na vunau i Mosese nai talatala ni Kalou, e na vuku ni keimami sai valavala ca vei koya.
12A sa vakadinadinataka ko koya na nona vosa ka cavuta me keimami, kei na kedra na neimami dauveilewai sa lewai keimami, ni sa vakayacora kina vei keimami na ca levu: ni sa sega ni caka e ruku i lomalagi kecega me vaka na ka sa caka ki Jerusalemi.
13Me vaka na ka sa volai e na vunau i Mosese, sa vakakina na ca kece sa yacovi keimami: ia keimami a sega ga ni cakava na neimami masumasu e na mata i Jiova na neimami Kalou, me keimami lesu tani mai na neimami caka cala, ka kila na nomu vunau dina.
14O koya o qo sa vakananuma kina ko Jiova na ca, me vakayacora vei keimami: ni sa yalododonu ko Jiova na neimami Kalou e na nona cakacaka kecega sa cakava: ni keimami sa tawa vakarorogo ki na domona.
15Ia ko iko, Jiova na neimami Kalou, ko a kauti keimami na nomu tamata mai na vanua ko Ijipita e na liga kaukauwa, a sa cakava na yacamu me rogo me vaka e na si ga o qo; keimami sai valavala ca, keimami sa caka ca.
16Turaga, me vaka na nomu cakacaka dodonu kece, me lesu tani mada ga na nomu cudru kei na nomu lesa mai na nomu koro ko Jerusalemi, na nomu ulu-ni-vanua tabu: ni sa kawa ga ni neimami valavala ca, kei na nodra caka ca na neimami qase, sa vakarogocataki kina ko Jerusalemi kei ira na nomu tamata vei ira kece era tiko voliti keimami.
17Ia mo rogoca mada, neimami Kalou, na masumasu ni nomu tamata, kei na nona kere loloma, ia e na vuku ni Turaga, mo cakava me cila mai na matamu ki na nomu tikina tabu sa lala tu.
18Noqu Kalou, mo vakalakala daligamu, mo rogoca; me yadra na matamu, mo raica na neimami vanua sa lala, kei na koro sa vakatokai e na yacamu: ni sa sega e na vuku ni neimami cakacaka dodonu keimami sa tauca kina na neimami masumasu e matamu, e na vuku ga ni nomu yalololoma levu.
19Turaga, rogoca; Turaga, loloma mai; Turaga, mo vakarorogo ka cakava; e na vukumu ga, noqu Kalou, mo kakua kina ni vakaberabera, e na vuku ni sa yacamu ga sa vakatokai ki na nomu koro kei ira na nomu tamata.
20Ia niʼu a vosa tiko, ka masu, ka vakatusa na noqui valavala ca, kei na nodrai valavala ca na kai noqu na Isireli, ka sa tauca na noqu kere loloma e na mata i Jiova na noqu Kalou e na vuku ni ulu-ni-vanua tabu ni noqu Kalou:
21io, niʼu a vosa tiko e na masumasu, ia na tamata ko Kepirieli, o koya kaʼu a raica e na raivotu ni sa qai vakatekivu, sa vuka sara mai, ka tarai au e na tiki ni yakavi sa cabori kina nai soro.
22A sa vakatakila mai, ka vosa vei au, ka kaya, I Tanieli, au sa qai lako mai me vakavukui iko, mo kila kina.
23Ni sa qai vakatekivu na nomu kere loloma sa yaco mai na vosa, ia kaʼu sa lako mai me tukuna; ni sa tamata daulomani ko iko: o koya o qo mo kila kina na vosa, ka vakasalataka na raivotu.
24Sa wiki e vitusagavulu sa loku vei ira na kai nomu kei na nomu koro tabu, me tarova na talaidredre, ka bokoca nai valavala ca, ka sorovaka na caka cala, ka vakayacora mai na cakacaka dodonu e tawa mudu, ka dregata na raivotu kei na parofisai, ka lumuti Koya sa Yalosavasava sara.
25Ia mo kila ka vakasama, ni na tekivu vata na kenai tukuni yani na vosa me vakavouya ka tarai Jerusalemi tale ka yacova na Mesaia na Turaga, kei na wiki e vitu, kei na wiki e onosagavulu ka rua: ena qai vakavoui ka caka tale na sala, kei nai keli ni koro, io, e na gauna ni ca.
26Ia ni sa oti na wiki e onosagavulu ka rua, ena qai muduki na Mesaia, ka sega e na vukuna: ia na koro kei na tikina tabu sa na vakarusa ko ira na tamata ni turaga ena lako mai; ia na kenai otioti ena yaco vata kei na dobui, ena yacova talega nai otioti ni valu na dauveivakarusai sa lesi.
27Ia ena vakadeitaka ko koya na veiyalayalati kei ira e lewe vuqa ka dua na wiki: ia e na veimama ni wiki, ena vakaotia ko koya nai soro kei nai madrali, ia e na taba ni tikina tabu ena tu kina na ka vakasisila sa dauveivakarusai, io, me yacova nai vakataotioti, ia na ka sa lesi ena sovaraki vua na dauvakarusai.
Who We AreWhat We EelieveWhat We Do
2025 by iamachristian.org,Inc All rights reserved.
