Ai Vola I Tanieli Na Parofita 8 - AI VOLA TABU（FIJ1864）

Sa raica ko Tanieli na raivotu ni sipi tagane kei na koti tagane, a sa rogoca na kenai loku nai otioti ni ca sa lesi me yacova na vale tabu, 1-14. Si vakaukauwataki Tanieli ko Kepirieli, a sa vakamacalataka vua na raivotu, 15-27.

1E NAI katolu ni yabaki ni lewa i Pelisasari na tui sa dua na raivotu e rairai vei au, koi au ko Tanieli, a sa tarava na ka ka rairai vei au eliu.

2Ia kaʼu a raica na raivotu; a sa yaco, niʼu a raica, kaʼu sa tiko mai Susani na koro turaga, e na yasayasa vaka-Elama; ia niʼu a raica na raivotu, kaʼu a tiko e na bati ni uciwai ko Ulei.

3Ia kaʼu a ta cake e na mataqu ka vakaraica, ka raica, sa dua na sipi tagane ka tu e na bati ni uciwai, a sa rua na kena kaukamea: ia na kaukamea o qori sa cecere; ka dua sa cecere vei rau, ia ko ya sa cecere, sa tubu cake emuri.

4Au a raica na sipi tagane ni sa cula tu kivakaki ra, kei na tokalau, kei na ceva; a sa sega e so na manumanu sa tu rawa e matana, sa sega talega e sa ia rawa na veikaliraki mai na ligana; sa cakacaka ga ko koya me vaka na nona veitalia, a sa yaco me levu.

5Ia niʼu a vakananuma tiko, raica, sa dua na koti tagane sa lako mai ra e dela i vuravura taucoko, a sa tawa tara na qele: ia na koti tagane o qo sa dua na kena kaukamea vakaidina e na maliwa ni matana.

6A sa lako mai ko koya ki na sipi tagane sa rua na kena kaukamea, o koya kaʼu a raica ni sa tu e na bati ni uciwai, a sa ciciva mai e na nona cudru kaukauwa.

7Ia kaʼu a raici koya ni sa toro mai ki na sipi tagane, a sa yaloca vua, ka yavita na sipi tagane, ka musuka ruarua na kena kaukamea: a sa sega na kaukauwa vua na sipi tagane me tu rawa e matana, a sa biuti koya sobu ki na qele, ka buturaka: a sa sega e dua sa kaliraka na sipi tagane mai na ligana.

8Ia na koti tagane sa tubu kina me ka levu sara: ia ni sa kaukauwa ko koya, sa qai ramusu mai na kena kaukamea levu; a sa tubu cake mai e va na ka vakaidina me kenai sosomi, kivakaki na mata ni cagi e va kei lomalagi.

9Ia mai na dua vei iratou sa tubu mai e dua na kaukamea lailai, a sa yaco me levu sara, kivakaki na mata ni ceva, ki cake talega, ka vakaki na vanua matalau.

10A sa viavialevu mai, io vei ira nai vavakoso vakalomalagi; a sa biuta sobu ki na qele e so vei ira nai vavakoso kei na kalokalo, ka buturaka.

11Io vei koya talega na turaga ni vavakoso sa viavialevu kina ko koya, a sa kauta tani nai soro ni veisiga, a sa biu wale na tikina ni nona vale tabu.

12Ia nai vavakoso, sa soli vata yani kei nai soro ni veisiga e na vuku ni talaidredre, a sa biuta na ka dina ki na qele; a sa cakacaka tiko ka yaco.

13Au a qai rogoca e dua na yalosavasava ni sa vosa, a sa vosa e dua tale na yalosavasava vua sa vosa, Me bogi vica tiko na raivotu ni soro ni veisiga, kei na talaidredre e veivakarusai, me soli vata kina na vale tabu kei nai vavakoso me buturaki sobu?

14A sa kaya vei au ko koya, Me bogi rua na udolu ka tolu na drau; ena qai vakasavasavataki na vale tabu.

15A sa yaco, niʼu sa raica oti, koi au ko Tanieli, na raivotu, ka sa vakasaqara tiko na kenai balebale, raica, sa qai tu mai e mataqu e dua sa raici vakatamata.

16Ia kaʼu sa rogoca na domo vakatamata e na loma ni uciwai ko Ulei, a sa kaci, ka kaya, I Kepirieli, mo vakatakila vua o qo na raivotu.

17A sa lako voleka mai ko koya ki na tikina kaʼu sa tu kina: ia ni sa lako mai ko koya, kaʼu sa rere, ka bale vakatobocu: a sa kaya vei au, Mo kila, na luve ni tamata: ni sa bale ga ki na gauna ni vakataotioti na raivotu.

18Ia ni sa vosa mai vei au ko koya, kaʼu sa moce lotu, a sa kotora na qele na mataqu: a sa tarai au ko koya, ka vakaturi au e na yavaqu.

19A sa kaya ko koya, Raica, au na vakatakila vei iko na ka ena yaco e nai otioti ni cudru: ni sa gauna sa loku ena yaco ga kina nai otioti.

20A sipi tagane ko a raica ka rua na kena kaukamea, sai rau na tui Metia kei na tui Perisia.

21Ia na koti vutivuti, na tui Javana ko ya: kei na kaukamea levu e na maliwa ni matana, nai matai ni nodra tui.

22Ia ni ka musuki o qori, ka tu mai e va me kenai sosomi, sa matanitu e va ena tubu mai na matanitu ko ya, ka sega ni kaukauwa vata kaya.

23Ia e na gauna kimuri ni nodratou matanitu, ni sa qai taucoko mai na nodra ca na dautalaidredre, ena qai tu cake mai e dua na tui e mata qaqa, ka daukila vere.

24Ia ena gumatua ko koya ni sa qaqa, ka sega ni sa nona dina na qaqa: ena ka vakaidina na nona ia na dauveivakacacani, ena yaco ko koya, ka cakacaka tiko, ka vakarusai ira sa kaukauwa, io na mataqali tabu.

25Ia ni sa qaseqase talega ko koya ena vakayacora na vere e na ligana; e lomana talega ena daudokai koya, ia ni sa sautu tiko ena vakarusai ira kina na lewe vuqa: ena bolei koya talega na nodra Turaga na turaga; ia ni sa sega na liga e tauca ena musuki ga ko koya.

26Ia na raivotu ni yakavi kei na mataka e sa tukuni, sa dina ga: ia ko iko, mo tinia nai vola ni raivotu; ni sa ka me bogi vuqa.

27Ia koi au ko Tanieli, kaʼu a ceguoca mai, ka tauvi mate e na bogi e so; ka oti, kaʼu sa tu cake mai, ka cakava na nona cakacaka na tui; ia kaʼu a kidacalataka na raivotu, a sa sega ga e kila kina.