Ai Vola I Tanieli Na Parofita 10 - AI VOLA TABU（FIJ1864）

Ni sa vakamalumalumutaki koya oti ko Tanieli, sa qai raica e dua na raivotu, 1-9. Ni sa kidroa vakalevu ko koya, sa vakaukauwataki koya na agilose, 10-21.

1E NAI ka tolu ni yabaki i Koresi na tui Perisia sa dua na ka sa vakaraitaki vei Tanieli, na yacana sa vakatokai vua ko Pelitisasari; a sa ka dinadina, ia sa dua nai valu balavu: a sa kila na ka o qo ko koya, ni sa macala vua na raivotu.

2E na gauna ko ya, oi au ko Tanieli, kaʼu a tagi tikoga ka tolu sara na wiki.

3Na kakana vinaka kaʼu a sega ni kania, kei na lewe ni manumanu kei na waini sa sega ga ni curu ki gusuqu, e nai lumu talega kaʼu a tawa lumu kina, a sa taucoko mada na wiki e tolu.

4Ia e nai karuasagavulu ka va ni siga ni matai ni vula, niʼu a tiko e na bati ni uciwai levu, ko Etikeli;

5au a qai ta cake e na mataqu, ka vakaraica, ka raica, sa dua na tamata sa vakaisulu e nai sulu laino, ia na tolona sa vauci e na koula dina ni Ufasi:

6a yagona talega sa vaka na perili, kei na matana sa raici tautauvata kei na livaliva, kei na matana e rua sa vaka na cina caucaudre e rua, kei na ligana kei na yavana sa vaka na mata ni parasa matavinaka, kei na domo ni nona vosa sa vaka na domo ni lewe vuqa.

7Ia kaʼu a raica, koi au duaduaga ko Tanieli, na raivotu: ia ko ira na tamata keitou tiko vata sa ra tawa raica na raivotu; ia na sautaninini levu sa tauvi ira, a ra sa dro me vunitaki ira.

8Ia koi au kaʼu a laivi duaduaga mai, ka raica na raivotu levu o qo, a sa tawa vo vei au na kaukauwa: ia na kequ vinaka sa vuki me ca, a sa sega ni kaʼu rawata tiko na kaukauwa.

9Ia kaʼu a rogoca ga na domo ni nona vosa: ia niʼu a rogoca na domo ni nona vosa, kaʼu sa moce lutu no e mataqu, ia na mataqu sa koto ga ki na qele.

10Ka, raica, sa qai dua na liga sa tarai au, a sa vakaduri au e na duruqu kei na qeteqete ni ligaqu.

11A sa kaya vei au, O iko Tanieli, na tamata daulomani, mo kila na vosa kaʼu sa tukuna vei iko, ka tu cake e na yavamu: niʼu sa qai talai mai vei iko. Ia ni sa vosataka ko koya na vosa o qo vei au, kaʼu sa wavu ka sautaninini tu.

12Sa qai kaya vei au ko koya, Mo kakua ni rere, Tanieli: ni sa mai na kenai matai ni siga ko a vakasara kina na lomamu me kila, ka vakararawataki iko e na mata ni Kalou, ka rogoci ga na nomu vosa, ia koi au kaʼu sa lako mai e na vuku ni nomu vosa.

13Ia na turaga ni matanitu ko Perisia sa vorati au ka ruasagavulu ka dua na bogi: ka raica, ko Mikaeli, nai matai ni turaga, sa lako mai me vukei au; kaʼu mani tiko ga yani maikea kei ira na tui Perisia.

14Au sa qai lako mai me vakatakila vei iko na ka ena yacovi ira na kai nomu e na gauna maimuri: ni na vakabogi tautau na raivotu.

15Ia ni sa vosa oti vakaoqo vei au ko koya, kaʼu sa vakacuva na mataqu ki na qele, ka galu toka.

16Ka, raica, sa dua e raici tautauvata kei na luvedra na tamata sa qai tara mai na tebenigusuqu: kaʼu a qai dalaga na gusuqu, ka vosa, ka kaya vua sa wavu tu e mataqu, Noqu turaga, e navuku ni raivotu sa lesu mai kina vei au na noqu rarawa, ia kaʼu sa sega ni rawata tiko na kaukauwa.

17Ni na rawa vakaevei vua na tamata ni noqu turaga o qo na veivosaki kaya na noqu turaga o qo? ia koi au, sa sega ga vei au na kaukauwa, na cegu talega sa tawa vo vei au.

18Sa baki mai tarai au tale e dua sa vaka na tamata na kena raici, a sa vakaukauwataki au,

19ka kaya, O iko, na tamata daulomani, kakua ni ko rere: mo vakacegu, mo kaukauwa ga, io, mo kaukauwa ga. Ia ni sa vosa oti vei au ko koya, kaʼu sa kaukauwa mai ka kaya, Me vosa mai, na noqu turaga; ni ko sa vakaukauwataki au.

20Sa qai kaya ko koya, O sa kila se vakaevei beka na kawana kaʼu sa lako mai kina vei iko? ia o qo, kaʼu na lesu tale mada me vala kaya na tui Perisia: ia niʼu sa lako yani, raica, ena qai lako mai na tui Javana.

21Ia kaʼu na tukuna vei iko na ka sa volai e nai vola dina: a sa sega e dua sa veivuke kei au e na veika o qo, o Mikaeli ga na nomudou turaga.