1O KOYA o qo, o iko na luve ni tamata, mo ia kina na parofisai kei Koko, ka kaya, Sa vosa vakaoqo na Turaga ko Jiova; Raica, sai au na nomu meca, Koko, na nodra turaga na Rosi kei na Meseki kei na Tupali;
2ia kaʼu na vakalesui iko kimuri, ka vakalaiva tikʼani nai kaono ga vei kemudou, ka vakalakovi iko cake mai na yasayasa vakatokalau, ka kauti iko mai ki na veiulu-ni-vanua nei Isireli:
3ia kaʼu na yavita tani na nomu dakai e na ligamu i mawi, ia na nomu gasau e na ligamu i matau kaʼu na vakalutuma tani.
4E na veiulu-ni-vanua nei Isireli, dou na bale, ko iko, kei na nomui valu kecega, kei na veimataqali era tiko kei iko: ki na manumanu veikata kecega ni lomalagi, kei na manumanu ni vanua, kaʼu na soli iko kina mo kani.
5E dela ni vanua ko na bale: ni sai au kaʼu sa cavuta, sa kaya na Turaga ko Jiova.
6Ia kaʼu na tala na buka ki Mekoki, vei ira talega era sa tiko vakacegu wale e na veiyanuyanu: a ra na kila ni sai au ko Jiova.
7Ia na yacaqu tabu kaʼu na vakatakila e na kedra maliwa na noqu tamata na Isireli; au na sega talega ni vakacacana tale na yacaqu tabu: a ra na kila na veimatanitu ni sai au ko Jiova na Yalosavasava nei Isireli.
8Raica, sa yaco mai, io sa caka, sa kaya na Turaga ko Jiova; sa kena siga o qo kaʼu a vosa kina.
9A ra na lako yani ko ira sa tiko o na veikoro vaka-Isireli, a ra na vakacaudreva ka vakama nai yaragi ni valu, nai sasabai kei nai vakaruru, na dakai kei na gasau, kei nai ula, kei na moto, a ra na vakama e na buka ka yabaki vitu:
10a ra na sega kina ni ca buka mai na were, se taya mai na veikau; ni sai yaragi ni valu era na vakacaudreva kina na buka: a ra na tokitaki ira ka tokitaki ira, ka butakoci ira ka butakoci ira, sa kaya na Turaga ko Jiova.
11Ia ena yaco e na siga ko ya, kaʼu na solia vei Koko e dua na nona tikina maikea mei bulubulu mai Isireli, io na nodra buca na daulako e na bati ni waitui vakaki cake: a ra na sogolati kina era lako voli yani: ia era na buluti Koko maikea kei na nonai vavakoso levu: a ra na vakatoka na buca ko ya ko Emoni-koko.
12Ia ena buluti ira tiko ko ira na mataqali nei Isireli, me ra vakasavasavataka na vanua, ka vula vitu.
13A ra na ia na veibulu ko ira kece na lewe ni vanua; ia ena nodra ka rogo na siga kaʼu na vakarokorokotaki kina, sa kaya na Turaga ko Jiova.
14A ra na lesia e so na tamata daucakacaka, me ra lako voli tikoga e na vanua me ra veivuke kei ira era lako voli yani mo buluti ira sa vo e dela ni vanua, me vakasavasavataka: me sa oti na vula e vitu me ra qai qara voli.
15Ia ni ra lako voli tu na daulako e na vanua, ka raica e dua na sui ni tamata, me ra qai cakava kina e dua nai tuvatuva, me ra buluta mada ko ira na dauveibulu e na buca i Emoni-koko.
16Ia ena yacana talega na koro ko Emona. Era na vakasavasavataka vakaoqo na vanua.
17Ia ko iko, na luve ni tamata, sa vosa vakaoqo na Turaga ko Jiova, Mo vosa ki na manumanu kecega e vakalawena, kei na manumanu kecega ni vanua,
Dou soqoni vata, ka lako mai; dou soqoni vata mai na veiyasana kecega ki na noqui madrali kaʼu sa cabora me kemudou, io nai madrali levu e na veiulu-ni-vanua nei Isireli, mo dou kana lewe ni tamata, ka gunu dra.
18Na lewe ni tamata qaqa dou na kania, kei na kedra dra na turaga kei vuravura dou na gunuva, na sipi tagane, kei na lami, kei na koti, kei na karavau, era manumanu uro ni Pasani kecega.
19Ia dou na kana uro mo dou mamau kina, ka gunu dra mo dou mateni kina, e na noqui madrali kaʼu sa cabora me kemudou.
20Ia dou na vakamamautaki mai na noqui kanakana e na ose kei na vale-vodoki, kei na tamata qaqa, kei na tamatai valu kecega, sa kaya na Turaga ko Jiova.
21Ia kaʼu na viritu na noqui ukuuku o na veimatanitu, a ra na raica kece na veimatanitu na noqu lewa dodonu kaʼu sa cakava, kei na ligaqu kaʼu sa vakatauca vei ira.
22A ra na kila na mataqali nei Isireli ni sai au ko Jiova na nodra Kalou mai na siga ko ya ka ia tiko kimuri.
23A ra na kila na veimatanitu ni sa kawa ni nodra caka cala era vakabobulataki kina na mataqali nei Isireli: ni sa kawa ni nodra talaidredre vei au kaʼu a tabonaka kina na mataqu vei ira, ka soli ira yani ki na liga ni nodra meca, a ra sa bale kece kina e nai seleiwau.
24Mo vaka na nodra tawa yalosavasava kei na nodra talaidredre kaʼu a cakacaka vakakina vei ira, ka tabonaka vei ira na mataqu.
25O koya o qo sa vosa vakaoqo kina na Turaga ko Jiova; Au na qai kauti ira tale mai o qo na Jekope era vakabobulataki, ka yalololoma vei ira kece na mataqali nei Isireli, ka lomakatakata e na vuku ni yacaqu tabu;
26ni ra sa vakamaduataki oti, ka cudruvi e na vuku ni nodra talaidredre kecega era a talaidredre kina vei au, ni ra tiko vinaka e na nodra vanua, ka sega e vakarerei ira.
27Niʼu na kauti ira tale maivei ira na veimataqali, ka vakasoqoni ira mai na veivanua ni nodra meca, ka vakarokorokotaki vei ira e na matadra na veimatanitu e vuqa;
28era na qai kila ni sai au ko Jiova na nodra Kalou, kaʼu a vakauti ira vakabobula tani ki na veimatanitu: ia kaʼu sa qai vakasoqoni ira mai ki na nodra vanua, ka tawa vakalaiva tale yani o dua vei ira.
29Au na sega talega ni tabonaka tale na mataqu vei ira: niʼu sa sovaraka na Yaloqu ki na mataqali nei Isireli, sa kaya na Turaga ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
