1E NAI karuasagavulu ka lima ni yabaki ni neimami tiko vakabobula, e nai vakatekivu ni yabaki, e nai katini ni siga ni vula, e nai katinikava ni yabaki ni koro ni samuti, e na siga dina ko ya sa tiko vei au na liga i Jiova, a sa kauti au yani kikea.
2E na raivotu ni Kalou sa kauti au mai ki na vanua nei Isireli, ka vakatikori au ki dela ni dua na ulu-ni-vanua cecere sara, a sa vaka e tu maikina e dua na koro sa tara rawa tu ki na mata ni ceva.
3A sa kauti au kikea ko koya, ka, raica, sa dua na tamata, ka raici tu me vaka sa parasa, a sa dua na dali laino e na ligana, ka dua na gasau i vakarau; a sa wavu tu ko koya e na matamata-ni-koro.
4A sa kaya vei au na tamata o qori,
Na luve ni tamata, mo vakaraica o na matamu, ka rogoca e na daligamu, ka vakasara na lomamu ki na ka kecega kaʼu na vakaraitaka vei iko; ni sa kawa ni ka o qo, meʼu vakaraitaka vei iko, ko sa kauti mai kina kike: tukuna na ka kece ko sa raica ki na mataqali nei Isireli.
5Ka, raica, sa dua na bai mai taudaku ni vale ka tu volita, ia e na ligana na tamata sa dua kina na gasau i vakarau na kena balavu e caga tinikarua, ka dua na tikina, a sa vakarauta na kena raraba ni bai, a sa gasau e dua: kei na kena cecere, a sa gasau e dua.
6Sa qai lako mai ko koya ki na matamata-ni-koro sa qaradonu vakaki cake, a sa cabeta na kenai kabakaba, ka vakarauta e dua nai lago ni matamata-ni-koro, a sa gasau e dua na kena raraba; kei nai lago kadua, a sa gasau e dua na kena raraba.
7Ia na veivalevale sa dui gasau e dua na kena balavu, ka dui gasau e dua na kena raraba; ia na kena tadrua ni veivalevale sa dui caga tini; ia nai lago ni matamata-ni-koro e nai curucuru ni matamata-ni-koro kiloma sa gasau e dua.
8Sa vakarauta talega ko kova nai curucuru ni matamata-ni-koro kiloma, a sa gasau e dua.
9Sa qai vakarauta ko koya nai curucuru ni matamata-ni-koro, a sa caga tinikaono; kei na kena duru, a sa caga e va; ia nai curucuru ni matamata-ni-koro sa tu kiloma.
10Ia na veivalevale ni matamata-ni-koro ki cake sa tolu vaka, ka tolu vaka; sai vakarau vata tolutolu ga: a sai vakarau vata na duru ni kedra katuba e na tabana o qo kei na tabana ko ya.
11A sa vakarauta na kena raraba ni curucuru ni matamata-ni-koro, a sa caga ruasagavulu; kei na kena cecere, a sa caga ruasagavulu ka ono.
12Ia na kedra mata vale na veivalevale sa dui caga rua e na tabana o qo, ka dui caga rua e na tabana ko ya; ia na veivalevale sa dui caga tinikarua e na tabana o qo, ka dui caga tinikarua e na tabana ko ya.
13Sa qai vakarauta ko koya na matamata-ni-koro mai na daku ni valevale e dua ki na daku ni kenai sa: sa rabana e caga limasagavulu, a sa dui veidonui na katuba.
14A sa cakava ko koya nai yatu duru, a sa dui caga drau ka ruasagavulu, ka yala ki na duru ni lomanibai sa tu volita na matamata-ni-koro.
15Ta mai na mata ni matamata-ni-koro mai nai curucuru ka yala ki na mata ni curucuru ni matamata-ni-koro kiloma sa caga drau.
16A sa dui vakatuba qiqo na veivale vale, na tadrua talega ni dui kedra duru e tu voli e loma ni matamata-ni-koro, a sa dui vaka talega kina na kedrai lolo: ia na kedra katuba lalai sa tu voli eloma; ia ki na duru sa dui ceuti tu ga kina na balabala.
17Sa qai kauti au ko koya ki na lomanibai kisau, ka, raica, sa tu nai yatu vale, kei na raravatu sa caka tu me volita na lomanibai: sa yatolusagavulu na vale e dui donuya tu na raravatu.
18Ia na raravatu ki taba ni matamata-ni-koro ka balavu vata kei na matamata-ni-koro, sai koya na raravatu era.
19Sa qai vakarauta ko koya na kena raraba mai na mata ni matamata-ni-koro era ka yala ki na mata ni matamata-ni-koro kisau ni lomanibai eloma, a sa dui caga rua na drau kivakaki cake, kei na tokalau.
20Ia na matamata-ni-koro ni lomanibai esau o koya sa donuya na mata ni tokalau, sa vakarauta ko koya na kena balavu kei na kena raraba.
21Ia na kena veivalevale sa tolu e na tabana o qo ka tolu e na tabana ko ya; ia na dui kena duru kei na dui kenai lolo sai vakarau vata ga kei nai matai ni matamata-ni-koro: ia na kena balavu kei na kena raraba sa dui caga drau ka caga limasagavulu.
22Ia na kedra katuba lalai, kei na kedrai lolo, kei na kedra balabala, sai vakarau vata ga kei na matamata-ni-koro sa qaradonu ki cake; ia nai kabakaba sai vava vitu sa ra cabe cake kina; ia na kenai lolo sa tu ga ki matadra.
23Ia na matamata-ni-koro ni lomanibai eloma sa dui donuya na matamata-ni-koro ki na mata ni tokalau, kei koya ki cake; a sa vakarauta ko koya mai na matamata-ni-koro e dua ki na matamata-ni-koro kadua, a sa caga rua na drau.
24A sa qai kauti au ko koya kivakaki na mata ni ceva, ka, raica, sa dua na matamata-ni-koro sa donuya na mata ni ceva: a sa vakarauta na kena duru kei na kenai lolo, a sa vaka nai vakarau ga ko ya.
25A sa vakatuba o qo kei na kenai lolo sa tu voli, me vaka na katuba lalai ko ya: sa caga drau na kena balavu, ka caga limasagavulu na kena raraba.
26A sa dua kina na kenai kabakaba ei vava vitu, ia na kenai lolo sa tu kiliu: sa vakabalabala talega, e dua vaka, ka dua vaka, e na kena duru.
27A sa dua na matamata-ni-koro e na lomanibai eloma kivakaki na mata ni ceva: a sa vakarauta ko koya mai na matamata-ni-koro e dua ki na matamata-ni-koro kivakaki na ceva, a sa caga rua na drau.
28A sa kauti au ko koya ki na lomanibai kiloma e na matamata-ni-koro vakaceva; a sa vakarauta na matamata-ni-koro ki na mata ni ceva, a sa vaka nai vakarau ga ko ya;
29kei na kena veivalevale, kei na kena duru, kei na kenai lolo, a sa vaka nai vakarau ga ko ya; a sa vakatuba o qo kei na kenai lolo sa tu voli: a sa caga drau na kena balavu, ka caga limasagavulu na kena raraba.
30Ia na kenai lolo e tu volita sa dui caga limasagavulu na kena cecere, ka dui caga tini na kena raraba.
31Ia na kenai lolo sa donuya tu na lomanibai kisau; ia na balabala sa ceuti tu ga ki na kena duru: ia na kenai kabakaba sai vava walu.
32A sa kauti au ko koya ki na lomanibai kiloma kivakaki cake: a sa vakarauta na kena matamata-ni-koro, a sa vaka nai vakarau ga ko ya.
33Ia na kena veivalevale, kei na kena duru, kei na kenai lolo, sa vaka nai vakarau ga ko ya: a sa vakatuba o qo, kei na kenai lolo e tu voli: a sa caga drau na kena balavu, ka caga limasagavulu na kena raraba.
34Ia na kenai lolo sa donuya tu na lomanibai kisau; ia na balabala sa ceuti tu ga ki na kena duru, e na tabana o qo kei na tabana ko ya: a sai vava walu na kenai kabakaba.
35A sa kauti au ko koya ki na matamata-ni-koro ki na mata ni tokalau, a sa vakarauta ko koya, a sa vaka nai vakarau ga koya;
36a kena veivalevale, kei na kena duru, kei na kenai lolo; kei na kena katuba lalai e tu volita: a sa caga drau na kena balavu, ka caga limasagavulu na kena raraba.
37Ia na kena duru sa donuya tu na lomanibai kisau; ia na balabala sa ceuti tu ga ki na kena duru, ki na tabana o qo, kei na tabana ko ya: a sai vava walu na kenai kabakaba.
38Ia na kenai yatu vale, kei na kedra katuba sa volekata tu na duru ni matamata-ni-koro, ia maikea era dausilima kina nai soro kama.
39Ia e nai curucuru ni matamata-ni-koro sa rua kina na vata-ni-soro e na tabana o qo, ka rua na vata-ni-soro e na tabana ko ya, me vakamatei kina e delana nai soro kama kei nai soro ni valavala ca kei nai soro ni caka cala.
40Ia e na tabana e dua ki taudaku, e nai kabakaba mai na mata ni matamata-ni-koro sa donuya na tokalau, sa rua kina na vata-ni-soro; e na tabana talega kadua, mai na mata ni matamata-ni-koro, sa rua kina na vata-ni-soro.
41Sa va na vata-ni-soro ka tu vaka, ka va talega na vata-ni-soro ka tu vaka, e na taba ni matamata-ni-koro; e walu na vata-ni-soro, era vakamatea kina nai soro.
42Ia na vata-ni-soro o qo e dui va, na kei nai soro kama, sa caka e na vatu e ta, a sa dui caga tolu na kena balavu, ka dui caga tolu na kena raraba, ka dui caga rua na kena cecere: era dauviria talega kina nai yaya era vakamatea kina nai soro kama kei nai soro.
43A sa so na vata rabailailai sa vakarautaki voli tu kiloma: ia e na vata-ni-soro ga sa no kina na lewe-ni-manumanu sai soro.
44Ia maitaudaku ni matamata-ni-koro kiloma sa tu kina na nodrai yatu vale na dau-ni-meke, e na lomanibai kiloma, mai na taba ni matamata-ni-koro ki na mata ni tokalau; a sa donuya tu na mata ni ceva: e dua talega ka tu ki na taba ni matamata-ni-koro ki cake, a sa donuya tu na mata ni tokalau.
45A sa kaya vei au ko koya, Ai yatu vale o qo, sa donuya na mata ni ceva, sa nodra na bete, era taura na cakacaka ni vale.
46Ai yatu vale talega o qo sa donuya na mata ni tokalau sa nodra na bete, era taura na cakacaka ni cabocabo-ni-soro: sai ira o qo na luve i Satoki na luve i Levi, era torovi Jiova me cakacaka vei koya.
47A sa vakarauta ko koya na lomanibai, a sa caga rua na drau na kena balavu, ka caga rua na drau na kena raraba, a sa takiveilevu na veiyasana; kei nai cabocabo-ni-soro e na mata ni vale.
48A sa kauti au ko koya ki nai curucuru ni vale tabu, a sa vakarauta na duru ni curucuru, a sa dui caga tini ki na tabana o qo, ka dui caga tini ki na tabana ko ya: ia na kena raraba ni katuba sa caga ono ki na tabana o qo, ka caga ono ki na tabana ko ya.
49A kena balavu ni curucuru sa caga vasagavulu, kei na kena raraba sa caga ruasagavulu ka rua: a sa kauti au cake ko koya ki nai kabakaba era cabeta kina: a sa tu mai na duru lelevu ka volekata na duru wale, e dua vaka, ka dua vaka.
Who We AreWhat We EelieveWhat We Do
2025 by iamachristian.org,Inc All rights reserved.
