Ai Vola I Isirieli Na Parofita 38 - AI VOLA TABU（FIJ1864）

A mataivalu i Koko, 1-6, kei na nona vere ca sa vakavotuni mai, 7-13. Ena cudruvi koya na Kalou, 14-23.

1A SA yaco vei au na vosa i Jiova, ka vaka.

2Na luve ni tamata, mo vaqara na matamu ki Koko, na vanua nei Mekoki, na nodra turaga na Rosi kei na Meseki kei na Tupali, ka parofisaitaka na kena,

3ka kaya,

Sa vosa vakaoqo na Turaga ko Jiova; Raica, sai au na nomu meca, Koko, na nodra turaga na Rosi kei na Meseki kei na Tupali:

4ia kaʼu na vakalesui iko kimuri, ka vakacoba na siwa ki na gusumu, ka kauti iko mai, kei na nomui valu kecega, na ose kei na tamata e vodo tu e na ose, era dui vakaisulu kecega e nai sulu ni valu kecega, e dua nai vavakoso levu, sai sasabai kai vakaruru kai seleiwau sa ra taura kecega:

5ko ira vata kei na Perisia, kei na Kusi, kei na Futi; era vakaisasabai ka vakaivakaruru-ni-ulu kecega:

6ko Komera, kei na nona mataivalu kecega; na mataqali i Tokarama mai na mata ni tokalau, kei na nona mataivalu kecega: sa na vuqa na mataqali ena tiko kei iko.

7Mo vakarau, ia dou vakarautaki, ko iko, kei ira na nomui vavakoso kecega era sa soqoni vata vei iko, ia ko iko, mo nodrai vakatawa.

8Ni sa oti na bogi e vuqa, ko na qai cudruvi: ni sa oti na veiyabaki, ko na qai lako mai ki na vanua sa kauti mai nai seleiwau, ka vakasoqoni mai na veimataqali e vuqa, io ki na veiulu-ni-vanua nei Isireli, a ya ka daulala tu ga: ka sa qai kauti mai na veimatanitu, a ra na tiko vinaka ko ira kecega.

9O na cabe mai me vaka na cava, o ua lako cake mai me vaka na o, mo dou ubia na vanua, ko iko, kei na nomu mataivalu kecega, ia koi kemudou vata kei na veimataqali e vuqa.

10Sa vosa vakaoqo na Turaga ko Jiova; Io, e na gauna dina ko ya ena qai tubu e lomamu e so na ka, o na vakananuma talega e dua na nanuma ca:

11ia ko na kaya, Au na lako cake yani ki na vanua sa koro ta wa vakabai; au na lako vei ira sa ra tiko vakacegu, sa ra tiko vinaka, sa ra tiko wale kecega ka sega na nodra bai, sa sega talega na nodrai vakadei se nai sogo;

12meʼu ia na veitokitaki kei na veivakayanaki; mo vagolea kina na ligamu ki na veiyasana lala sa tawa tale, io vei ira na lewe ni vanua sa ra vakasoqoni mai na veimatanitu, sa ra vakamanumanu ka vakaiyau, sa ra tiko e na loma ni vanua.

13Sai ira mai Sepa, kei Titana, kei ira na dauveivoli mai Tarisisi, kei ira kece na kena luve ni laioni, era na kaya vei iko, Me ia na veitokitaki ko sa lako mai kina, ne? me ia na veivakayanaki ko sa vakasoqoni ira mai kina li na nomui vavakoso? me taura na siliva kei na koula, me kauta tani na manumanu kei nai yau, me ia na veitokitaki levu, ne?

14O koya o qo mo ia kina na parofisai, na luve ni tamata, ka kaya vei Koko, Sa vosa vakaoqo na Turaga ko Jiova: E na siga ko ya ni ra qai tiko vinaka na noqu tamata na Isireli, mo na tawa kila kina, ne?

15Ia ko na qai lako mai na nomu yasana mai na yasayasa vakatokalau, koi kemudou vata kei ira na lewe vuqa, era vodo tu kece e na ose, nai vavakoso levu, kei nai valu kaukauwa:

16ia ko na cabe vakaivalu cake mai ki na noqu tamata na Isireli, me vaka na o me ubia na vanua; ena yaco e na gauna maimuri, kaʼu na qai kauti iko mai ki na noqu vanua, me ra kilai au na veimatanitu, niʼu sa vakarokorokotaki vei iko, Koko, e matadra.

17Sa vosa vakaoqo na Turaga ko Jiova; Sai iko li kaʼu a vosa kina eliu e na gusudra na noqu tamata na nodra parofita na Isireli, sa ra parofisai e na gauna ko ya me vuqa mada na yabaki kaʼu na qai kauti iko mai vei ira?

18Ia ena yaco e na gauna ko ya ni sa qai lako vakaivalu mai ko Koko ki na vanua ko Isireli, sa kaya na Turaga ko Jiova, ni na qai cabe cake mai na noqu cudru ki mataqu.

19Ia e na noqu vuvu, e na noqu cudru waqawaqa, kaʼu sa vosa, E dina, e na siga ko ya ena dua kina na yavavala levu e na vanua nei Isireli;

20ia ena yavavala e mataqu na ika ni waitui, kei na manumanu ni lomalagi, kei na manumanu ni vanua, kei na ka kecega sa qasi e dela ni soso, kei na tamata kecega sa tiko e dela i vuravura, ena talaraki sobu talega na veiulu-ni-vanua, ka lutu mai na Uluvatu, ia na bai kecega ena bale ki na soso.

21Ia kaʼu na kaciva mai na kenai seleiwau e na noqu veiulu-ni-vanua kecega, sa kaya na Turaga ko Jiova; ena dui kena mai na tamata yadua nai seleiwau ni kai nona.

22Ia kaʼu na ia na veilewai kaya e na mate dauveitauvi kei na dra; na uca luvu talega, kei na uca-vatu lelevu, na buka waqa, kei na sulifuri, kaʼu na vakatauca vua kei na nonai valu, kei na veimataqali e vuqa era tiko kaya.

23Ia kaʼu na vakalevulevui au, ka vakarokorokotaki au, niʼu sa vakatakilai e matadra na veimatanitu e vuqa, a ra na kila ni sai au ko Jiova.