Ai Vola I Isirieli Na Parofita 18 - AI VOLA TABU（FIJ1864）

Sa vunauca na Kalou na vosa vakatautauvata ni vua-ni-vaini teitei, 1, 2. Sa tukuna ko koya na nonai valavala rua na tamata yalododonu, 3-9; vua na gone ca ni tamata yalododonu, 10-13; vua na gone yalododonu ni tamata ca, 14-18; vua na tamata sa qai veivutuni, 19-23; vua talega na tamata yalododonu ni sa vuki tani tale, 24. Sa tukuna ni sa dodonu na nonai valavala, 25-28. Sa vunauci ira me veivutuni, 29-32.

1SA yaco tale vei au na vosa i Jiova, ka vaka,

2A cava na kawana vei kemudou, ni dou sa taura na vosa vakaibalebale o qo, ka kaya, O ira na qase era sa kania na vua-ni-vaini, ia na batidra na luvedra sa mucu kina?

3 Me vaka na dina ni noqu bula, sa kaya na Turaga ko Jiova, ena sega tale na kawana vei kemudou me taura na vosa vakaibalebale o qo e Isireli.

4Raica, na yalo kecega sa noqu: me vaka na yalona na qase, sa vakakina na yalona na luvena, sa noqu ga: a yalo sai valavala ca ena mate o qori.

5Ia na tamata, kevaka e yalododonu ko koya, ka cakava na ka sa dodonu ka vinaka,

6ka sega ni kana e na veiulu-ni-vanua, se ta cake e na matana ki na nodra matakau na mataqali nei Isireli, se vakacacataki koya na wati ni kai nona, se torova e dua na alewa sa tawase tani,

7ka sega e dua e sa vakasaurarataka, ia na kenai vakarawarawa sa vakasuka ga vua sa sarava nai yau, ka sega e dua e sa koveraka, a nona madrai sa solia ga vua sa viakana, ka sa vakaisulutaki koya sa luvawale;

8sa sega ni solia na ka me vakaisausaumi tawa dodonu kina, kei nai yau sa tubu kina sa sega ni kauta, sa tarova ga na ligana mai na caka cala, a sa ia na veilewai dodonu vei ira na tamata,

9na noqu vunau sa muria ko koya, kei na noqu lewa sa vakabauta, me ia na cakacaka dina; ke sa yalododonu ga ko koya, ena bula vakaidina ga, sa kaya na Turaga ko Jiova.

10Kevaka ena sucu vua e dua na luvena sa dauvakacaca, se daulaba, se cakava e dua na ka vakaoqo,

11ka sega e dua na ka dodonu ko ya sa cakava ko koya, ia ka sa kana ga e na veiulu-ni-vanua, ka vakacacataki koya na wati ni kai nona,

12ka vakasaurarataka na dravudravua kei na luveniyali, ka ia na dau veikoveraki, kei na kenai vakarawarawa sa sega ga ni vakasuka, ia ki na matakau sa ta cake ga kina e na matana, kei na ka vakasisila sa cakava ga,

13ka solia nai yau me vakaisausaumi tawa dodonu kina, kei nai yau sa tubu kina sa kauta ga: ena bula lia ko koya? ena sega ga ni bula: na ka vakasisila kecega o qo sa cakava; ena mate vakaidina ko koya; na kena dra ena tu ga vua.

14Ka raica, kevaka ena sucu vua e dua na luvena, ka sa raica kecega nai valavala ca sa cakava ko tamana, ka sa veinanuyaka, ka tawa cakava na ka e vakakina,

15ka sa sega ni kana e na veiulu-ni-vanua, se ta cake e na matana ki na nodra matakau na mataqali nei Isireli, se vakacacataki koya na wati ni kai nona,

16se vakasaurarataka e dua, se maninitaka nai vakarawarawa, se ia na dau veikoveraki, a nona madrai sa solia ga vua sa viakana, kei koya sa luvawale sa vakaisulutaka,

17mai vua sa dravudravua sa tarova ga na ligana, nai voli ni ka e saravi kei nai yau e tubu kina sa sega ni kauta; a noqu lewa sa cakava ga, a noqu vunau sa muria; ena sega ni mate ko koya o qo e na caka cala nei tamana, ena bula vakaidina ga.

18Ia na tamana, e na vuku ni sa dauia na veivakasaurarataki, ka daukoveraka na wekana, kei na ka sa tawa vinaka sa cakava ga e na kedra maliwa na kai nona, raica, ena mate ga ko koya e na nona caka cala.

19Ia ka dou sa kaya, Sa vakaevei li? sa tawa cudruvi li na gone e na vuku ni caka cala nei tamana? Ke cakava na luvena na ka sa dodonu ka vinaka, ka vakabauta kecega na noqu vunau, ka cakava na ka o qori, ke na bula vakaidina ga ko koya.

20A yalo sai valavala ca, ena mate o qori. O koya na gone ena tawa cudruvi e na caka cala nei tamana, a tamana talega ena tawa cudruvi e na caka cala ni luvena: a nona caka dodonu na yalododonu ena tu ga vua, kei na nona ca na tamata ca ena tu ga vua.

21Ia na tamata ca, kevaka ena saumaki mai na nonai valavala ca kecega sa kitaka, ka vakabauta kecega na noqu vunau, ka cakava na ka sa dodonu ka vinaka, ena bula vakaidina ko koya, ena sega ni mate.

22A nona talaidredre kecega sa kitaka, ena sega ni cavuti vua: e na nonai valavala dodonu sa cakava ena bula kina ko koya.

23Meʼu vinakata vakalailai beka na nona mate na tamata ca, sa kaya na Turaga ko Jiova: ka sega ni sa saumaki ko koya mai na nona sala ca, me bula?

24Ia na yalododonu, ni sa saumaki ko koya mai na nona caka dodonu, ka kitaka na ka cala, ka cakava me vaka nai valavala vakasisila kecega sa cakava na tamata ca, ena bula beka ko koya? A nonai valavala dodonu kece sa cakava ena sega ni cavuti: e na nona talaidredre sa talaidredre kina, kei na nonai valavala ca sai valavala ca kina, e na ka o qori ena mate ga kina ko koya.

25Ia ka dou sa kaya, Sa sega ni dodonu nai valavala ni Turaga. Dou rogoca mada, na mataqali nei Isireli; Sa tawa dodonu na noqui valavala, ne? sa tawa dodonu beka ga na nomudoui valavala?

26Ni sa saumaki na tamata yalododonu mai na nona caka dodonu, ka caka cala, ka mate kaya; e na vuku ni nona caka cala sa cakava; ena mate kina.

27Ia, ni sa saumaki na tamata ca mai na nona ca sa kitaka, ka cakava na ka sa dodonu ka vinaka, ena Vakabula na yalona ko koya:

28e na vuku ni sa vakananuma, ka saumaki mai na nona talaidredre kecega sa kitaka, ena bula vakaidina ko koya, ena sega ni mate.

29Ia ka sa kaya na mataqali nei Isireli, Sa tawa dodonu nai valavala ni Turaga. Sa tawa dodonu li na noqui valavala, oi kemudou na mataqali nei Isireli? sa tawa dodonu na nomudoui valavala, se segai?

30O koya o qo kaʼu na dui lewai kemudou kina, na mataqali nei Isireli, me vaka na nomudou dui valavala, sa kaya na Turaga ko Jiova. Dou veivutuni, ka saumaki mai na nomudou talaidredre kecega; ena qai sega ni vu ni nomudou rusa na caka cala.

31Dou biuta tani vei kemudou na nomudou talaidredre kece, dou sa talaidredre kina; ka vakavouya na lomamudou kei na yalomudou: ni dou na mate mei cavai, na mataqali nei Isireli?

32Niʼu sa sega ni vinakata na nona mate ko koya sa mate, sa kaya na Turaga ko Jiova: o koya o qo dou saumaki mai kina, mo dou bula.