Ai Vola I Isirieli Na Parofita 19 - AI VOLA TABU（FIJ1864）

Sa lelevaki ira na luve ni tui, e na vosa vakatautauvata ni laioni cauravou sa rawai e nai keli, 1-9; sa lelevaki talega ko Jerusalemi, e na vosa vakatautauvata ni vaini sa malai, 10-14.

1IA ko iko, mo taurivaka na lele e na vukudra na turaga ni Isireli,

2ka kaya, A cava na tinamu? A laioni alewa: e na kedra maliwa na laioni sa koto ko koya, e na kedra maliwa na luve ni laioni sa susuga na luvena.

3A sa susuga e dua na luvena: sa tubu me laioni cauravou, a sa vakavulici me cova na kena; a tamata sa kania ko koya.

4A sa rogoca kina na veivanua; ia e na nodrai keli sa rawai kina, a ra sa kauti koya ni sa vesuki ki na vanua ko Ijipita.

5Ia ni sa raica na laioni alewa ni sa wawa tiko ko koya, ka sa yali na ka e namaka, sa qai kauta e dua tale na luvena, ka cakavi koya me laioni cauravou.

6A sa veilakoyaki tu e na kedra maliwa na laioni, ka yaco me dua na laioni cauravou, ka sa vakavulici me cova na kena, na tamata sa kania ko koya.

7A sa kunea ko koya na nodra vale vakaturaga e lala, a sa vakalalataka na nodra veikoro; a sa rusa na vanua, kei na ka sa sinai kina, e na vuku ni domo ni nona tagi.

8Sa qai mai vala kaya na veimatanitu e na veiyasana mai na veiqali, ka tevuka vua na nodra lawa: ia e na nodrai keli sa rawai kina.

9A ra sa sogolati koya ni sa vesuki, ka kauti koya vei tui Papiloni: era kauti koya ki na dua na koro kaukauwa, me kakua ni rogo tale na domona e na veiulu-ni-vanua nei Isireli.

10A tinamu, e vaka na vaini e na nomu dra, sa tei e na bati ni wai: sa vuavua ka vakadrauna sara e na vuku ni wai e levu.

11A sa vakatabana kaukauwa me nodra matanakilagi era ia na lewa, a sa cecere vakaidina ko koya e loma ni taba ni kau rugurugua, a sa raici vakacecere ko koya ni sa vuqa na tabana.

12Ia ka sa cavuivuvu ko koya e na cudru, sa biuti sobu ki na qele, ia na cagi mai cake sa vakamalaitaka na vuana: sa ramusu ka malai na tabana kaukauwa; sa katia na buka.

13Ia sa qai tei ko koya e na veikau, e na vanua mamaca ka viagunu.

14Asa lako tani na buka mai na dua na taba lailai ni tabana, a sa katia na vuana, a sa qai sega kina na tabana kaukauwa me matanakilagi me ia na lewa. Sa vakaoqo na lele, ia ena yaco me ka e lelevaki.