Ai Vola I Isirieli Na Parofita 17 - AI VOLA TABU（FIJ1864）

A rosa vakatautauvata ni ikeli e rua kei na vaini, 1-10, a ya sa vakatakilai kina na ca me yacovi Jerusalemi e na vuku ni sa vuki tani mai Papiloni ki Ijipita, 11-21. Sa yalayala na Kalou me tea e dua na sitari dina sara, 22-24.

1A SA yaco vei au na vosa i Jiova, ka vaka,

2Na luve ni tamata, mo cavuta yani e dua na vosa vakaibalebale, ka tukuna e dua na vosa vakatautauvata ki na mataqali nei Isireli;

3ka kaya, Sa vosa vakaoqo na Turaga ko Jiova;

E dua na ikeli levu, ka taba levu, ka taba balavu, ka vakalawe, ka veivolavolai, sa lako mai ki Lipanoni, ka kauta tani na vuso ni dua na taba ni sitari:

4na ulu ni tabana lalai sa cova ko koya, ka kauta ki na dua na vanua dauveivoli; e na dua na koro tamata dauveivoli sa tea ko koya.

5Sa kauta talega e so na sore ni kau ni vanua, ka tea ki na dua na were bulabula; sa kauta ko koya ki na bati ni wai levu, ka tea me vaka na wilou.

6A sa tubu, ka yaco me vaini leka e dautete yani, sa golevi koya na ikeli na kena tubucoke, ia na wakana, sa tu e rukuna: a sa yaco me vaini, ka vakatabana mai, ka tubu na tabana lalai.

7A sa dua talega na ikeli levu, ka taba levu, ka vakalawe: ka, raica, na vaini o qo sa vaqara yani na wakana vua, ia na tabana sa vakatala yani vua, me vakasuasuataka ko koya e na tova ni nonai teitei:

8e na qele vinaka e na bati ni wai levu sa tei kina, me tubu na tabana, ka vuataka na vuana, me sa vaini rogo.

9Mo kaya, Sa vosa vakaoqo na Turaga ko Jiova; Ena vakayacori li? na wakana ena sega beka ni cavuta ko koya, ka cebeta na vuana, me malai? na drauna kece e qai tubu ena malai ga, ka sega e na vuku ni kaukauwa levu se na tamata e lewe vuqa ni rawa kina na kenai cavuivuvu.

10Io, raica, ni sa tei, me na vakayacori li? ni sa qai tarai koya na cagi mai cake, me na sega beka ni malai sara yani? e na tova ka tubu kina ena malai ga kina.

11A sa yaco vei au na vosa i Jiova, ka vaka,

12Mo kaya mada ki na mataqali dautalaidredre, Dou sa kila, se segai, nai balebale ni ka o qo? mo kaya vei ira, Raica, sa lako mai ki Jerusalemi ko tui Papiloni, a sa kauti koya na kena tui, kei ira na kena turaga, ka kauti ira kaya ki Papiloni;

13a sa kauta e dua sa kawa ni tui, ka ia na veiyalayalati kaya, ka cakavi koya me ia na vosavavakini: a sa kauti ira talega na qaqa ni vanua:

14me sa matanitu kaisi mai, me kakua ni vueti cake, me na vakabauta ga na nona veiyalayalati me dei kina:

15a sa vuki tani vua ko koya ni sa talai ira na nona mata ki Ijipita, me ra solia vua na ose kei na tamata e lewe vuqa. Me na vakayacori li ko koya? me na bula beka ko koya sa cakava na ka vakaoqo? Se me vakacacataka li na veiyalayalati, ka bula ga?

16 Me vaka na dina ni noqu bula, sa kaya na Turaga ko Jiova, e na yasana dina ga ni tui ka buli koya me tui, ka nona vosavavakini sa beca, kei na nona veiyalayalati sa vakacacana, ni sa tiko ko koya e na loma i Papiloni ena mate ga kaya.

17Ena sega talega, e na nonai valu kaukauwa kei na nonai vavakoso levu, ni yaga vua ko Fero, me na viri suva, ka tara vale-kau ni valu, me muduka laivi kina na tamata e lewe vuqa:

18e na vuku ni sa beca ko koya na vosavavakini ni vakacacataka na veiyalayalati, io, raica, ni sa solia oti na ligana, ka cakava na ka kece o qo, ena sega ni bula ko koya.

19O koya o qo sa vosa vakaoqo kina na Turaga ko Jiova; Me vaka na dina ni noqu bula, na noqu vosavavakini ko ya sa beca ko koya, kei na noqu veiyalayalati ko ya sa vakacacataka, kaʼu na sauma dina ga ki na uluna.

20Ia kaʼu na tevuka vua na noqu lawa, ena coriti talega e na noqui cori, ia kaʼu na kauti koya ki Papiloni, ka ia na veilewai kaya maikea e na vuku ni nona lasu sa lasutaki au kina.

21Ia ko ira kecega era dro kaya kei ira kecega na nonai valu era na bale e nai seleiwau, ia ko ira sa vo era na dui vakasevi ki na mata ni cagi kecega: ia dou na kila ni sai au ko Jiova kaʼu sa cavuta.

22Sa vosa vakaoqo na Turaga ko Jiova; Ia kaʼu na kauta koi au na vuso ni sitari cecere, ka tea; mai na ulu ni tabana lalai kaʼu na cova e dua sa malumalumu, ia kaʼu na tea koi au e na dua na ulu-ni-vanua e cecere ka rewaicake:

23e na ulu-ni-vanua cecere nei Isireli kaʼu na tea: ia ena tubu cake na tabana, ka vuataka na vuana, me sa sitari rogo: ena tiko talega e rukuna na yavusa manumanu vakatabana kecega; e na yaloyalo ni tabana era na tiko kina.

24A ra na kila kecega na kau ni vanua ni sai au ko Jiova kaʼu sa vakasivoya na kau cecere, ka vakalevulevuya na kau lekaleka, ka vakamalaitaka na kau bulabula, ka vakabulabulataka na kau malai: oi au ko Jiova kaʼu sa cavuta ka cakava.