A Lele I Jeremaia 4 - AI VOLA TABU（FIJ1864）

Sa osimataka ko Saioni na nona tiko vakaca, 1-12. Sa vakatusa na nonai valavala ca, 13-20. Ena cudruvi ko Itomi, 21. Sa vakacegui ko Saioni, 22.

1NA kena mataca mai na koula! na kena roka tani mai na koula dina sara! sa veibiuyaki tu na veivatu ni vale tabu e na mua ni sala ni koro kecega.

2Na gone ni Saioni dredre, ka vakatauvatani kei na koula dina sara, sa ra qai nanumi vakaevei me bilo qele walega, na cakacaka ni ligana na dautuli bilo!

3Io na tavuto, era sa ucuna na mata-nisucudra, era sa vakasucuma na luvedra: o koya na gonealewa ni kai noqu, sa lomaqa mai, ka vaka na ositereji ni veikau.

4Sa kakabi na yamena na gone sa sucu tiko ki dela ni gusuna, ni sa viagunu: o ira na gone lalai era sa kere madrai, ka sa sega e dovia vei ira.

5O ira era daukana ka vinaka, era sa luveniyali mai e na sala ni koro: o ira era susugi ka vakaisulu e nai sulu damudamu, era sa mokota nai benubenu.

6Ni sa ka levu na caka cala ni gonealewa ni kai noqu, ka ka lailai nai valavala ca ni Sotoma, o koya ka vukici vakasauri sara, ka sega na liga e tauca.

7Sa ra savasava vakalevu na nona Tabu-tabu ka vakalailai na uca-vulavula, sa ra vulavula vakalevu ka vakalailai na wai-ni-sucu, sa ra yagodamudamu vakalevu ka vakalailai na rupi, sa vaka na safairi na yagodra.

8Sa loaloa mai na matadra ka vulavula na qilaiso: sa ra tawa kilai mai e na sala ni koro: sa kakabi na kulidra ki na suidra; sa malai, sa vaka na buka.

9Sa vinaka ko ira sa vakamatei e nai seleiwau ka ca ko ira sa mate e na dausiga: ni sai ira o qo era uru malua yani, ni ra laubasikataki e na viakania na vuata ni were.

10A ligadra na alewa dauloloma, sa vakasaqa na luvedra dina: era sa kedra kakana ni sa vakacacani na gonealewa ni kai noqu.

11Sa vakayacora ko Jiova na nona cudru; sa sovaraka na nona cudru katakata, a sa vakacaudreva na buka mai Saioni, a sa kania na kena yavu.

12Sa sega ni ra vakadinata na tui ni veivanua, kei ira kece na kai vuravura, ni na curu na vakacaoa kei na meca ki na matamata-ni-koro ni Jerusalemi.

13E na vuku ni valavala ca ni nona parofita, kei na caka cala ni nona bete, era vakadavea e lomana na kedra dra na yalododonu,

14era sa lako sese voli kina me vaka na mataboko e na sala ni koro, era sa vakadukadukalitaki ira e na dra, me dredre kina ni tawa tara na nodrai sulu.

15Dou lako tani, na tawa savasava, era a kacivaka vei ira, dou lako tani, lako tani, kakua ni dou tara: ni ra se ka dro tani, era sa kaya vakai ira na lewe ni veivanua, Me ra kakua ni tiko tale maikea.

16A cudru i Jiova, sa dui tawasei ira; ena sega ni golevi ira tale ko koya: a matadra na bete era sa tawa doka; o ira na qase era sa tawa lomana.

17Ia koi keda, sa malumalumu tu na matada ni waraka na nodai vukevuke tawa yaga: ni da yadra tiko, eda sa yadrava na vanua sa tawa vakabulai keda tawa.

18Era sa cicimuria na we ni yavada, eda dredre kina ni lako voli e na sala ni noda koro: sa voleka mai na kedai vakataotioti, sa oti na noda gauna; ni sa yaco na kedai otioti.

19Era sa totolo era vakasavi keda ka bera na ikeli ni lomalagi: e na ulu-ni-vanua, era sa cicimuri keda; mai veikau, era sa lawavaki keda.

20A cegu ni ucuda, o koya sa lumuta ko Jiova, sa rawai e na nodrai keli, ia ko koya eda a cavuta ni da kaya; E ruku ni yaloyalona eda na bula tiko e na kedra maliwa na lewe ni veivanua.

21Mo reki ka marau, na gonealewa ni Itomi, sa tiko e na vanua ko Usi; io vei iko talega ena lako yani kina na bilo: o na mateni, ka vakaluvawaletaki iko.

22Sa oti na nomu cudruvi e na vuku ni nomui valavala ca, o iko na gonealewa ni Saioni; ena sega ni kauti iko tani tale ko koya; ena cudruva na nomu caka cala, o iko na gonealewa ni Itomi; ena vakaraitaka ko koya na nomui valavala ca.